2
Tawntung Kilemna
(Micah 4:1-3)
1 Hisia sia Judah le Jerusalem taw kisai, Amoz ii tapa Isaiah tungah Pathian thu piak ahi hi:
2 Maisang hunin
Biakinnpi dinna mun ahi, hi mual in mual theampo sung pan a saangbel hi tu a,
mualno theampo tungah dokto tu hi.
Tua munah minam tam mama kikaikhawmin hong pai ngeingui tu a,
3 tuaciang a mihingte in,
“ Topa ii mual, Israel te ii
Pathian Biakinnpi ah kaato tawng.
Ama in ih sep tu a dei sia
ih sep thei natu in hong hil tu hi;
ama tealsa lampite ih tawn tu hi.
Banghang ziam cile Jerusalem pan
Topa ii hilcianna hong pai tu a;
Zion panin ama in a mihingte tungah thu son tu hi,” a ci tu hi.
4 Ama in minam liante sungah
thu nawngkaite khensat tu hi.
Amate in a namsaute lo thawna tumanh le
a teite thingbaak heuna namte in seak tu uh hi.
Ngam khat le ngam khat kido kik ngei nawn ngawl tu a,
ngal sim tu in kithoai kik nawn ngawl tu hi. Ref 2:4 Jol 3:10; Mic 4:3
5 Tu in, Jacob suan le paalte awng, Topa hong piak khuavak sungah kalsuan tek tawng!
Kisaktheina Kilalcipsak tu
6 Pathian awng, Jacob suan le paal, na mite na nusia zo hi! Ngam le lei sia nisuana sang pan le Philistia pan mitbum nasepnate taw kidim zo hi. Mihingte in ngamdang ngeinate zui hi.
7 Amate leitang sia ngunn le khamh taw kidim a, amate ii sum le vanh manphate bo hun nei nawn ngawl hi. Amate ngam sia siphu taw kidim a, a siphu ngalleangte sim zawk hi ngawl hi.
8 Amate ngam sia milimte taw kidim a, amate khut taw a vawt tawm uhte ma amate in bia uh hi.
9 A vekpi in kiniamsuksak tu a, kimaizumsak tu hi. Amate mawna maisak heak in Topa awng!
10 Topa ii thin uukna pan le a vaangletna le a minthannate pan a suatak natu hanciam in, amate sia mualkawm suanghawng sung ahibuale leihawng tawna sungah buu tu uh hi! Ref 2:10 Tpl 6:15; 2 Th 1:9
11 Mihingte kiphatsakna le, mihingte kisaktheina a kilalsak tu ni khat hong theng tu hi. Tuasia ciang Topa bekma kipok tu hi.
12 Tua ni ciang Vaanglianbelpa Topa in a vaanglian theampo le, a kiphasakte, a kiliansakte theampo niamsuksak tu hi.
13 Ama in Lebanon Cedar kung saangte le Bashan ngamsung oak thingkung te theampo susia tu hi.
14 Ama in mualpite le mualnote tamkimsak in,
15 tausaang theampo le a muanhuai kulh pangte theampo kikimsak tu hi.
16 Ama in a lianbel le a hoibel teambawte ngawngawn tum suksak tu hi.
17-18 Mihing kiphatsak nate bo tu a, mihing kisakthei nate kilalsak tu hi. Milimte mangthang siat tu a, tua ni in Topa bekma kipok tu hi.
19 Topa in leitung lok tu in hong pai ciang, mihingte in Topa ii thin uukna pan le a vaangletna le a minthannate pan a suatak natu hanciam in, ahibuale leihawng tawna sungah buu tu uh hi.
20 Tua ni hong thet ciang, khamh le ngunn taw a vawt sa milimte, amate ma in vawkkeak tu a, tuate sia buite le bakte nusiat tu uh hi.
21 Topa in leitung lok tu in hong pai ciang, mihingte in Topa thin uukna, vaangletna le a minthannate pan, a suatak natu hanciamin leihawngte sung le mualkawm suanghawngte sungah buu tu uh hi.
22 A thithei mihingte muanin nei nawn heak vun. Amate in bang kimanna nei uh ziam?