14
Saltanna pan Heak kikna
1 Topa in ama ii mihing Israel te khatvei ma hesuak kik leleau tu a, ama aituam mi in teal tu hi. Topa in amate a leitang tungah teangsak kik tu a, ngamdangmite pai in tua munah amate taw teang khawm tu uh hi.
2 Topa ii Israel mite a piaksa ngam ah a cia kik natu in minam tam mama in hu tu a, tua munah minamte sia Israel ii sila suak tu uh hi. Khatvei lai in Israel te a mante sia tu in Israel te in man tu a, khatvei lai amate a zothawte sia Israel mite in uk tu hi.
Mithi Khua ah Babylon Kumpipa
3 Topa in Israel mite natna ngimna a thuakna pan le nasep ham a kisepsakna panin damna le tawlngak toithaina pia tu hi.
4 Topa in hi bang a piak ciang, Israel mite in Babylon kumpipa sia:
“A ngilo kumpipa pukvawk zo! Ama in kuama zawthawk vawt kik ngei nawn ngawl tu hi!
5-6 Thin uukna taw a mite a zawthawk vawtte le, a zaw sa minamte a vawtsia tan tawntung a tatsia ngamukte ii thahatna Topa in bosak zo hi.
7 Tu tak ciang leitung bup ah tawlngakna le kilemna om a, kuama po thinnuam lungnuam in lasa uh hi.
8 A zataak kumpipa hu in Lebanon ngam a om cypress le cedar thingkungte lungdam uh hi, banghang ziam cile tu in ama thi zo a, amate a phuktan tu kuama om nawn ngawl hi!
9 “Babylon kumpipa muak tu in mithi khua kinging hi. Leitung ah a thahat mite ii thaate vak hiithuut kawkoai hi. Kumpite ii thaate sia a kumpi tokhumte pan tho uh hi.
10 Amate a vekpi in ama ausan in, ‘Tu in nang sia koma bangma in thazawm zo ni hi! Nang sia koma khat bangma na hi hi!
11 Tengtongh music te taw hong kipok bul hi, ahihang tuciang hi mun mithi khua theng ni hi. Thanhte na luppha hi a, lungte na puanvan ahi hi.’
12 “Babylon kumpipa nikonghong aksi awng, vantung panin na taak suk zo hi! Nidangin minamte na zo a, ahizong tu in lei ah hong kikhiasuk zo ta hi. Ref 14:12 Tpl 8:10; 9:1
13 Nangma in, vantung ah kaato in, na kumpi tokhum sia a saangbel aksite ii tung pek ah koi tu in na khensat hi. Nangma in pathiante kikhopna tua saksang mual tungah kumpi khat bangin to tu in na kingaisun hi.
14 Nangma in meei dawnte ah ka kaato tu a, Vaanglianbelpa taw ka kibang tu hi, na ci hi.
15 Ahizong mithi khua a thuk belna munah nang hong kipuak suk zo zaw hi. Ref 14:13-15 Mt 11:23; Lk 10:15
16 “Mithite in nang hong salh tu a, lamdang sa in hong kamkat tu hi. Amate in, ‘Hisia pa in leitung lok a, kumpi ngamte a liingsak pa hi ngawl ziam?
17 Hisia pa in khuapite lalcipsakin, leitung sennealngam a suaksak pa hi ngawl ziam? Hisia pa in a thongtaakte suatak ngeingawl, a inn uh ah a ciasak ngeingawl pa hi ngawl ziam?’ ci in dongh tu hi.
18 Leitung kumpi theampo sia amate ii a nasia mama thaankuul ah kiphum uh a,
19 ahihang nangma in thaankuul nei ngawlin, na luang sia a muatcip tu in kivawk hi. Na luang sia ngal kisimna sungah a kithatlum ngalkapte ii luangte in khunel a, suanghawng sung khat ah kivawk khawmin kituanhcil hi.
20 Nangma in na ngam susia a, na mite mama na thatlup hu in nang sia kumpi dangte bangin hong kiphum ngawl tu hi. A tatsia na innkuan sungah kuama nungta ngawl tu hi.
21 Mihon kithalupna kipan hen! Hi kumpipa ii tapate sia a taanghpupite mawnate hangin thi tu uh hi. Amate kuama in leitung uk ngei nawn ngawl tu a, khuapite saat zo ngei nawn ngawl tu hi,” ci in nunau tu uh hi.
Pathian in Babylon Lalcipsak tu
22 Vaanglianbelpa Topa in, “Babylon simin, ka siasak tu hi. Keima in nausente pan kipan kuama ka khoaikhe buatu hi, a nungta kuama om ngawl tu hi. Keima, Topa in, ka son zo hi.
23 Keima in Babylon khuapi buannawng pui khat ka suaksak tu a, tua munah simbute teang tu hi. Babylon sia munphia khat taw ka phiat tu a, tua in na theampo phiatkeak tu hi. Keima vaanglianbelpa Topa in ka son zo hi,” ci hi.
Pathian in Assyria Mite Lalcipsak tu
24 Vaanglianbelpa Topa in: “Ka ngeal bangin piang tu hi. Vawt tu in ka khensat sa bangin kivawt tu hi. Ref 14:24-27 Is 10:5-34; Nah 1:1—3:19; Zep 2:13-15
25 Israel, ka ngam sungah Assyria te ka lalcipsak tu a, ka mualte tungah amate ka tuanhcil tu hi. Ka mihingte sia Assyria te ii hakkol pan le a puak tu a vanhngitte pan ka suatak tu hi.
26 Hi ngealna sia leitung atu hi a, minamte daan pia tu in ka khut ka vaan hi,” ci in kiciam hi.
27 Vaanglianbelpa Topa in hisia vawt tu in khensat zo hi; ama in daan pia tu in a khut vaan zo a, kuama in khaam thei ngawl hi.
Pathian in Philistine te Lalcipsak tu
28 Hi thu sia Ahaz Kumpipa ii thi kumin, a kipualaak thu ahi hi. Ref 14:28 2 Kum 16:20; 2 Khang 28:27
29 Philistia mite awng, note hong saat ciangkhut sia kithiaktan hi, ahihang note lungdamna tu thu om ngawl hi. Ngul khat a thi ciang, a ngilo zaw khat a taangin hong pai hi. Ngul ii tuui panin a leang thei ngulpui khat keu hi. Ref 14:29-31 Jer 47:1-7; Eze 25:15-17; Jol 3:4-8; Amo 1:6-8; Zep 2:4-7; Zec 9:5-7
30 Topa in ama mi a cimaw mizawngte ii tuucing pa hi tu a, thinmuang takin nungtasak tu hi. Ahizong ama in no Philistine mite tungah nasia takin kialpi hong tungsak tu a, khat zongh hong hingkhoai ngawl tu hi.
31 No Philistine khuapi theampo awng, huna ngenin kapin au vun! Na vekpi uh in lauthawngin om vun! Saksang pan ngalkapte hong paina leivui khu sia meei bang hi a — tua ngalkaphon sungah a lauthauh khat zongh om ngawl hi.
32 Philistia ngam pan hong pai kamtaite tung bangbang son tu khu ziam? Topa in Zion khua kipsak zo hi, tuaciang a ngim nga ama ii mite sia tua munah ngammuanna nga tu hi, ci in amate ka son tu uh hi.