10
1 Note a lal na hi uh hi! Note in ka mite zawthawk natu in a thukhaikim ngawl thukhamte na vawt uh hi.
2 Tuabangin mizawngte tung pan amate taw kisai a nga tuakte le amate ii thutang khenna nga natu te khaktanin na taansak uh hi. Tuate sia meingongte le tangate ii neisate na sutolzia uh ahi hi.
3 Pathian in note daan hong piak ciang note in bang na law tu uh ziam? Ama in ngam khuala khat panin ngimna, siatna note tungah hong tunsak ciang bang na law tu uh ziam? Hong hu tu zongin koisungah na tai tu uh ziam? Na nei na lamte koisungah na phual tu uh ziam?
4 Note ngal kisimna sungah hong kithatlum tu hi, ahibuale zong thongtaakte bangin hong kikai keak tu hi. Tuabang ngawngawn taw zongh in Topa thin uukna thai ngawl lai tu a; daan pia tu in a khut kivaan lai tu hi.
Assyria Kumpilianpa, Pathian ii Nazak
5 Topa in, “Assyria awng! Nang sia ka thin hong uuksakte daan piakna khetbuk khat bangin kong zangh hi.
6 Kei hong thin uuksak mite ahi Pathian sel minam khat a sim tu in Assyria ka puak hi. Keima in amate sia vanh suttol tu, vanh ngu tu le lampi tung a leivui bangin mite tuanhcil tu in ka sawl hi,” ci hi.
7 Ahihang Assyria kumpilianpa in ngoltol ngealnate nei hi. Ngam tam mama siatsak sawm hi.
8 Ama sia kiphasak in, “Ka ngalkap maangte sia kumpi veu ahi hi!
9 Keima in Calno le Carchemish khuapite, Hamath le Arpad khuapite ka zo zo hi. Samaria le Damascus ka zo hi.
10 Milim a bia tua kumpi ngamte daan pia tu in ka khut ka eal hi, a milimte sia Jerusalem le Samaria ah a om milimte sangin tamzaw hi. Ref 10:5-34 Is 14:24-27; Nah 1:1—3:19; Zep 2:13-15
11 Samaria le a milim theampo ka sucip siat zo a, tuabang keak ma in Jerusalem le tua munah a kibia milimte ka siasak tu hi,” ci hi.
12 Ahihang Topa in, “Zion mual tung le Jerusalem khua sungah ka nasep teng ka man ciang, Assyria kumpipa sia ama ii kisuantaakna le kiphatsakna theampo hu in daan ka pia tu hi,” ci hi.
13 Assyria kumpilianpa in, “Keima mama in a vekpi in vawt zo ing. Ka hat a, ka ciim a, ka pil hi. Ngam khat le ngam khat kilaklaw ngamngite bosakin amate kholsa vanhte ka sut siat hi. Keima in khuital khat bangin tualai ah a teang mite ka tuanhthal zo hi.
14 Leitung ngamte sia vacim bu khat taw kibang a, a tuuite ol zeang tak khoptua bangin keima in amate haunate ka khawmtua ziau hi. Kei hong lauthawn tu in a thaphil ngam le om bo; kei hong ausan tu in a kamkaa khat beak le om bo!” ci in kisuangtaak hi.
15 Ahihang Topa in, “Hei khat in a zangh pa sang lian zaw ing ci thei tu ziam? Thingatnam khat in a zangh pa sangin thupi zaw ziam? Khetbuk khat in mihing khat laamto ngawl a; mihing khat in khetbuk laamto hi,” ci hi.
16 Tu laitakin pha tak a, a kivaak phitphet tua mite daan pia tu in Vaanglianbelpa Topa in natna puak tu hi. Amate ii pumpi sungah a kuang tan mei khat om tu hi.
17 Israel te ii khuavak ahi, Pathian sia mei khat suak tu hi. Israel te ii a thiangtho Pathian sia meikuang khat suak tu a, tua in ni khat thu in na theampo, lingkung le lingpaakte ngawngawn kaanghtum tu hi.
18 Taam thuk te le lo ngampha te sia natsia khat ii mihing khat a lalsak bangin, siacipsak tu hi.
19 Duisung ah thingkung a taanglai tawm mama tu a, patang khat ngawngawn in a kung phaza sim thei tu hi.
Mihing Tawm Hong Heak kik tu
20 Israel mi a suakta teng in amate a mong siatsak dektak minam sia a suan nawn ngawl natu hun khat hong theng tu hi. Amate in Israel te ii a thiangtho Pathian Topa muang takpi tu hi.
21 Israel mite sung pan mihing tawm bek amate ii vaanglian Pathian kungah cia kik tu uh hi.
22 Tu in Israel mite sia tuipi hui a om senvui za in tam mama ahitazong mi tawm bek cia kik tu uh hi. Mihingte atu in lalna sia a kikoi sa hi a, thuak tu in a kilawm tatak ma ahi hi. Ref 10:22-23 Rom 9:27
23 Hi hi, Vaanglianpipa, Vaanglianbelpa Topa in vawt tu khi hi, a ci sa bangma in ama in ngamsung theampo ah siatna tungsak tu hi.
Topa in Assyria Daan pia tu
24 Vaanglianpipa Topa Vaanglianbelpa in Zion ah a teang a mite tungah, “Egypt te in note hong zawthawk vawt tawntung bangin, Assyria te in note hong zothaw hial zongin amate kiita heak vun.
25 Tawmvei no sungin, note daan kong piak sia ka man tu a, tua zawkciang amate ka lalcipsak tu hi.
26 Vaanglianbelpa Topa keima in, Oreb Suangpi ah Midian mite ka saat bangin, ka ciangkhut taw amate ka saat tu hi. Egypt mite daan ka piak bangin Assyria mite daan ka pia tu hi.
27 Tua hun hong thet ciang Assyria te ii khut sung pan note kong suaktasak tu a, amate hakkol sia note liangko tungah vanhngit hi nawn ngawl tu hi,” ci hi.
Ngalte in Sim
28 Ngalte ii ngalkaphonpi in Ai khuapi la zo hi! Amate in Migron khua kaantan zo hi! A nguai ante Michmash ah nusia uh hi!
29 Amate in mualciangh kaantan in Geba khua ah zan ngiak uh hi! Ramah khua mite lau in, Saul kumpipa ii khua Gibeah khua mite taikeak uh hi.
30 Gallim mite awng, au vun! Laishah mite awng, ngai vun! Anathoth mite awng, a pau zo vun!
31 Madmenah le Gebim khua mite a suatak natu in tai uh hi.
32 Tuni in ngalte Nob khua sungah om a, tua mun panin amate in Jerusalem khuapi, Zion Mual a khuttum lak uh hi.
33 Vaanglianbelpa Topa in amate sia thingbaakte heu bangin saattan tu hi. Amate sung pan a kiphasakbel le a saangbelte zongh kisaat tan in kiniamsak tu hi.
34 Ngam tawnghtol sungah thingte hei taw a kiphu tan bangin, Lebanon mual ah thing hoibelte ngawngawn a puk bangin, Topa in amate phuktan tu hi.