5
1 “No thiampite awng, hi thu ngai vun! Israel mite awng, nadon vun! Kumpi bangkua sung a omte awng, ngai vun! No sia, thutang khen tu in hong kituat ahiciang — no tungah thukhenna hong theng tu hi! Note in Mizpah ah thaang khat, Tabor mual tungah ngen kikhak khat,
2 Acacia Khuapi ah dum thuk khat na suak uh a, na vekpi in daan kong pia tu hi.
3 Israel bangbang hi ziam, he khi hi — ama kei kung pan buu thei ngawl tu hi. Ama thumaan ngawl a, a mite sia kei hong bia tu in kilawm ngawl hi,” ci hi.
Hosea in Milim Biakna Kidop tu Thupia
4 Mite ngamtat siatna in amate ii Pathian kung a heakkik tu khak hi. Milim biakna in amate nasia takin len ahiciang, Topa saang ngawl uh hi.
5 Israel mite kiphatsak na in amate langpanin ausan hi. A mawnate in amate lutusak a, Judah mite zongh amate taw puk khawm uh hi.
6 Amate in a tuute le a khuite Topa tungah sangaw biakpiakna tu in pia ahihang amate atu phattuamna om ngawl hi. Amate in Topa mu thei ngawl uh hi, banghang ziam cile Topa in amate nusia zo hi.
7 Amate Topa tungah thumaan ngawl a; a tate Topa neisa hi ngawl hi. Tua hi a, tu in amate le a ngam a lei kisusia pal tu hi.
Judah le Israel Kido
8 Gibeah ah ngal dona lemle tum vun! Ramah ah patau daak saat vun! Bethaven ah minsial vun.note 5:8\xk Bethaven: See 4:15.\x* Benjamin mite awng ngal simin kuan vun.
9 Daan thuak tu ni hong theng tu a, Israel kisusia tu hi. Israel mite awng, hisia piang tatak tu hi!
10 Topa in, “Kei ka thin uuk hi, banghang ziam cile Judah lampuite in Israel simin, a ngam sut hi. Tua ahikom amate tungah namthuam bangin daan ka buak suk tu hi.
11 Israel in nenniam thuak a; a neisa tatak ahi leitang taan hi, banghang ziam cile huna piak tu a nei ngawlte munah huna ngen hamtang hi.
12 Israel tungah siatna le Judah mite tungah lalna ka tungsak tu hi.
13 “Israel in a ciinatna bangza ziam ci sia a kimu ciang le Judah in ama ii liammate a kimu ciang, Israel in Assyria kumpilianpa kungah hu ngenin pai hi; ahihang ama in a natna le a liammate damsak thei ngawl hi.
14 Keima in tawpi khat bangin Israel le Judah mite ka sim tu hi. Keima mama in amate ka balneen tu a ka nusia tu hi. Amate ka kaikeak ciang kuama in hun zo ngawl tu hi.
15 “Keima in a mawna a khialna hu in a thuak tu za in a thuak dong le kei hong zon kik mateng ka mite ka nusia tu hi. Ngimna a thuak ciang amate in kei hong zon tu hanciam tha tu uh hi,” ci hi.