10
1 Israel mite sia a ngathiam sapitkung khat taw kibang hi. A ci thei vaial ciang biaknatau tam seseam vawt uh hi. A leitang panin a piang a tam seseam ciang a biak uh suangkhuam thiangthote zepna hoisak vaial uh hi.
2 A lungtang uh theam nopna taw a kidim mite sia tu in a mawnate hu in a thuak kul tu hi. Pathian in a biaknataute sutham tu a, a khuam thiangthote susia tu hi.
3 Hi mite in hai ngawlin, “Eite kumpi ih nei ngawlna in Topa ih kiitak ngawl hang ahi hi. Ahihang kumpi khat in ei atu in bang hong vawtsak thei tuan tu ziam?” ci tu uh hi.
4 Amate in a luithawthong kamte pau in, a maan ngawl kamciamte pia a, a kizangh thei ngawl kilem natu thukimnate vawt uh hi. Thutang sia thutang ngawl suak zo a, lothawna sa sungah a nguu nei lopate bangin po hi.
5 Samaria khuapi ah a teang mite lau in, Bethel ah khamh khuital a bo hu in khuangai tu uh hi. Amate le milim biakna ah a seam thiampite sia tuasia thangai in kap tu uh hi. A khamhcii kizepna hoi teng a kihawkeaksak ciang amate mau tu uh hi.
6 Tua milim sia a kumpilianpa maivil natu in Assyria ah kipua tu hi. Tua ngaisut piakna bang a zui hu in Israel minpaan tu a, kimaizumsak tu hi.
7 Tui tungah a laam thingbek khat bangin a kumpipa kipaipui tu hi.
8 Israel mite ii milim biakna mun ahi Aven mualdawn biakbukte kisusia tu hi. Lingkungte le lophungte in a biaknataute khunel tu hi. Mite in mualpite tungah, “Hong seal tavun!”, tuaciang mualnote tungah, “Hong siin tavun!” ci in sam tu uh hi. Ref 10:8 Lk 23:30; Tpl 6:16
Topa in Israel tungah Thukhenna pia
9 Topa in “Gibeah ah mawna a vawt hun pan kipan Israel mite kei tungah mawna a vawt uh kheal ngawl hi. Tua ahikom Gibeah ah ngal in amate lap tu hi. Ref 10:9 Thkte 19:1-30
10 Hi mimawte ka sim tu a, daan ka pia tu hi. Minam tuatuamte kikaizawnin amate langpan tu a, amate mawna a tam hu in daan kipia tu hi.
11 “Israel sia khatvei lai in a pha takin taangcil tu a kihil sa, taangcil nuamin a kinging khuila khat taw kibang hi. A ngawng hoi sia tungah hakkol khat bulsak in nasep hamsa zaw seamsak tu in ka khensat hi. Judah in lo thawna thingha sia ka kaisak a, Israel in lei kalthapna thik-ha ka kaisak hi.
12 Keima in, “Noma atu in leithak tho vun a, thutang suana ciingin, kei nong biakna pan a piang tu thuphate at vun. Na Topa ahi kei sangah nong kiheak tu hun zo a, tuaciang kong pai tu a, no tungah thupha kong buak tu hi,” ci hi. Ref 10:12 Jer 4:3
13 Ahihang siatna thaicii na ciing uh a, tuate anlaak in na nei uh hi. Na leilotnate pan a piang a ngate na ne zo uh hi.
“Na siphu ngalleangte le ngalkap tam na neina na suan hu in
14 na mite tungah ngal hong theng tu a, na kulh theampo kisusia tu hi. Tua ni in Kumpi Shalman ii Betharbel khuapi ngal sungah a lalcipsak le, nute le a tate a kisuklup siat ni bang hi tu hi.
15 Tua in no, Bethel mite ii a kiitakhuai siatna na vawt uh hu in hong tung tu thu ahi hi. Ngal kido a kipat po ciang Israel kumpipa thi tu hi,” ci hi.