HOSEA
Thubu
Kamsaang pa Amos zawkciang kamsaang pa Hosea in BC 721 kum Samaria khua bo ma a ngim nga hunte sung in, Israel ii saksang kumpi ngam ah thuhil hi. A tuanin a mite ii Pathian tungah a thumaan laakna le milimte a biakna huvau thinbot hi. Hosea in hi a thumaan laakna uh sia a thumaan ngawl numei khat a teenpui hu in a tuasiatna lim la a, hangsan takin lak hi. A zi Gomer in ama tungah a thumaan ngawl bang keakin Pathian mite in Topa nusia zo hi. Hi thu hu in Israel tungah thukhenna tung tu hi. Ahihang a tawpna ah Pathian ii a mite a tawntung a itna ma kip tu a, ama in Israel a minam nga kik in a kizopna zongh a ngeina bang in puuapha kik tu hi. Hi ki itna thu sia hi bangin thin hong suu kammalte taw lak hi: “Israel awng, nang bangbangin hong thasua thei tu khi ziam? Nang bangbangin hong nusia thei tu khi ziam? Ka lungtang in tuabangin hong ngamtasak ngawl tu hi! Nang kong itna sia nasia lei lawlawm hi!” (11:8)
1
1 Hisia in Kumpi Uzziah, Jotham, Ahaz le Hezekiah te Judah ngam ah kumpi in a maan hun le Jehoash tapa Jeroboam Israel kumpi in a maan hun a, Beeri tapa Hosea tungah Topa ii piak thupuak ahi hi. Ref 1:1 2 Kum 15:1-7; 2 Khang 26:1-23; 2 Kum 15:32-38; 2 Khang 27:1-8 2 Kum 16:1-20; 2 Khang 28:1-27; 2 Kum 18:1—20:21; 2 Khang 29:1-32,33; e. 2 Kum 14:23-29
Hosea ii Zi le Tate
2 Topa in Hosea tungtawn a, Israel a paupui phitbel hunin Hosea tungah, “Pai in a, zi nei in; na zi in na vaang hong tang ngawl tu a, na tate ama bang lian ma hi tu hi. Tuasia bangma ka mite in kei hong nusia in, a thumaan ngawl te suak uh hi,” ci hi.
3 Tuabangin Hosea in Diblaim tanu Gomer kici numei khat teenpui hi. A ta phit tapa sia a sua zawkciang,
4 Topa in Hosea tungah, “A min ‘Jezreel’ phuakin, banghang ziam cile Israel kumpipa sia a taanghpupi Jehu ii Jezreel ah mihing a thalupte hu in hai ngawlin daan ka pia tu hi. Jehu ii kumpi khangngui ka bosak tu hi. Ref 1:4 2 Kum 10:11
5 Tua hun ciang Jezreel Kuam ah Israel ngalkap thahatna ka susia tu hi,” ci hi.
6 Gomer in a ta niina — numei khat nei hi. Topa in Hosea munah, “A min ‘a ki it ngawl’ Lo-Ruhamah ci in phuak in, banghang ziam cile Israel mite tungah ka itna ka lak nawn buatu a, ahibuale mawna ka maisak nawn buatu hi.
7 Ahihang Judah mite tungah ka itna ka lak tu hi, keima, amate ii Pathian, Topa in amate ka hun tu hi, ahihang ngal kisimna — namsau, thal le thaltang, ahibuale siphu le siphu ngalkapte ka zangh buatu hi,” ci hi.
8 Gomer in a tanuno noai a tensak zawkciang ama nau paai kik a, tapa dang khat nei hi.
9 Topa in Hosea mun ah, “A min ‘Ka mi hi ngawl’ Lo-Ammi ci in phuak in, banghang ziam cile Israel mite sia ka mi hi ngawl a, tuaciang kei sia amate ii Pathian ka hi bua hi,” ci hi.
Israel Kipuuapha kik tu
10 Israel mite a kisim zo ngawl, a kitee zo ngawl tuipi sen za bang suak tu hi. Tu in Pathian in amate mun ah, “Note ka mite hi ngawl nu hi,” ci hi, ahihang, “Note sia a nungta Pathian ii tate hi nu hi!” a ci ni hong theng tu hi. Ref 1:10 Rom 9:26
11 Judah mite le Israel mite kingawm kik tu hi. Amate mama in amate atu lampui khat teal tu a, khatvei ma a ngam a lei ah khangto in nuamsa kik tu uh hi. Hi hi, Jezreel ii ni sia ni thupi ni khat hi tu hi!