2
Biakinnpi Thak ii A Nasiatna
1 Tua kum, a tha sali tha, ni 21 ni in Topa in kamsaang pa Haggai tungtawnin paupui kik hi.
2 Ama in Haggai tungah Shealtiel tapa Judah ngamuk mangpa Zerubbabel, Thiampi Lianbel Joshua le mite tungah hi bang in sonsak hi, Ref 2:3 Ezra 3:12
3 “No sungah mihing khat po in Biakinnpi bangza in nasia ngei kana ziam ci sia a ciamtee lai na om uh ziam? Tu in bangbangin na mu uh ziam? Tu a sia, son thamman ngawl bang hi nanak tha tu hi.
4 Ahizong tu in note khat zongh thinkiam heak vun. Na seam vun banghang ziam cile no taw keima kong omkhawm hi.
5 Egypt ngam pan nong pusua uh lai in a tawntung note taw kong omkhawm tu hi ci in kamciam kong pia hi. Tu zonghin note taw kong omkhawm nginge lai hi, tua ahikom lau heak vun. Ref 2:5 Pu 29:45-46
6 “Hai ngawlin vantung le leitung, lei le tuipi ka lok tu hi. Ref 2:6 Heb 12:26
7 Minam theampo ka lawnthal tu a, amate sumngum theampo hi lai ah hong kipuak tu hi, tuaciang Biakinnpi in hauna taw kidim tu hi.
8 Simleitung a ngunn le khamh theampo keima aa ahi hi.
9 Biakinnpi thak in a lui sia sangin nasia zaw tu hi, tuaciang tualai ah ka mite maa vanna le kilemna ka pia tu hi,” cisak hi. Vaanglianbelpa Topa in son zo hi.
Kamsaangpa in Thiampite Thu dongh
10 Darius ii kumpilian a sep zawk a kum niina, a tha kua tha, ni 24 ni in Vaanglianbelpa Topa in kamsaangpa Haggai paupui kik hi.
11 Ama in, “Thiampite tungah hi dokna huvau thukhensatna khat ngen in:
12 Sonteena in sangaw biakpiakna sungah a kithiansua sabak khat a thiampi puantual sungah tun ci tawng. Tua zawkciang ama in a puantual taw anluum, an min sa, sapittui, olive thau, ahibuale an nam khat pawpo thutha le, tua an zong thiangsak tu ziam?” ci hi.
Tuabang a dok ciang Thiampite in, “Thiangsak ngawl tu hi” ci in zo uh hi.
13 Tuaciang Haggai in, “Sonteena, mihing khat in mithi a tham hu in nin hi ci tawng. Tua zawkciang ama in hi ante khat pawpo a tham le tuate zongh ninsak tu ziam?” ci in dongh hi. Ref 2:13 Mi 19:11-22
Thiampite in, “Ninsak tu hi,” ci in zo hi.
14 Tuasia ciang Haggai in, “ Topa in, hi ngam sungah mite le a piansak nate theampo tungah a piangte a kibangma hi ci hi; tua ahikom biaknatau tungah a piak theampo ninsak hi,” ci hi.
Topa in A Thupha Piak tu Kamciam
15 Topa in “No tungah hong piangsate mu thei ngawl nu ziam? Biakinnpi na sakkik ma in,
16 ansaal khat ah an kilogramme za nii mu tu in muangmaw a, na pai uh hang kilogramme za khat bek om hi. Bung khat sung pan sapittui litre zakhat duup tu in na pai uh hang sawmli bek om hi.
17 Na ciin sa na theampo lalsak tu in vuisa le ngialtang kong puak hi, ahizong na kisiik kik tuan bualai uh hi.
18 Tuni sia tha kua tha, ni kul le ni li ni hi a, Biakinnpi tawdap phaana a kiman ni hi. Tu pan kipan bang hong piang tu ziam en tavun.
19 Antang om nawn ngawl a, sapitkungte, theikungte, talee te le olive kungte nga ngawl lai ahitazong, tu pan kipan thupha kong pia tu hi,” ci hi.
Topa in Zerubbabel Kamciam Pia
20 Tua tha, ni 24 ni ma in Topa ii Haggai tungah hi thupuak a niina sia,
21 Judah ngamuk mangpa Zerubbabel atu in puak hi: “Keima in van le lei lok tu in kithoai khi hi,
22 kumpi ngamte lumletin a thahatna ka bosak tu hi. Ngalleangte le a hawlte ka sawnthal tu hi; siphute thi in, a tung tote khat le khat kithatlum tu hi.
23 Tua ni ciang ka naseampa Zerubbabel awng, nang kong la tu a, keima min suangin a uk tu in panmun kong pia tu hi. Nangma kong teal sa khat na hi hi.” Vaanglianbelpa Topa in son zo hi.