8
Ih Thiampi Lianbel Jesus
1 Ih sawson theampo ii bulpi in, tuabangin eite ii Thiampi Lianbel khat ih neina thu ahi hi. Tua pa in vantung ah Vaanglian Pathian tokhum ziatsang ah to hi.Ref 8:1 Ps 110:1
2 Ama in mihingte ii sak ahi ngawl, Topa ii sak buk tatak ahi A Thiangthobel Mun ah Thiampi Lianbel seam hi.
3 Thiampi Lianbel theampo sia Pathian tungah piakkhiatnate le nganhing taw biakpiaknate a pia tu in, a kisep ahi hi. Tua ahi bangma, ih Lianbelpa zongh in, na khat peuma a piak nanak tu ahi hi.
4 Jew te Thukham deina bangin letsong a pia tu in thiampite om ahi nungsang, hi leitung ah ama hong om le zong thiampi hi ngawl tu hi.
5 A tatakin ci leang ama ii a thiampi nasep in vantung a sia a zui hi a, tua ii limh bek ahi hi. Tua in Moses ii sepna sia bangma ahi hi. Ama in Puanbuk Thiangtho a sak tu ciangin, Pathian in, “Mualtung ah hong kilak sia ii lim bang tatakin, na theampo na vawt hamtang in,” ci hi.Ref 8:5 Pu 25:40
6 Ahihang tu in, Jesus a ki aap thiampi nasepna sia amate aa sangin lianzaw a, Pathian le a mihingte kilaklaw ah a vawt thuciamna sia zongh amate aa sangin, a phat zawk bangma ahi hi. Banghang ziam cile tua thuciamna sia a phazaw nate kamciam piaknate tungah kidoppha ahi hu hi.
7 A masa thuciamna sia ah khialna om ngawl hi thong le, a niina thuciamna sia kul ngawl tu hi.
8 Ahihang Pathian in, a mite tungah khialna mu ahikom thu a sonna ah,
“Topa in,
Israel mite le Judah mite taw
thuciamna thak khat,
ka vawt tu hun hong theng tu hi.Ref 8:8-12 Jer 31:31-34
9 Amate ii taanghpupite taw
thuciamna ka vawt bang ahi buatu hi.
A khut uh pan kai in, Egypt pan
ka pusuapui hunlai bang ahi buatu hi.
Amate taw ka vawt thuciamnate
tungah a thumaan bua uh hi,
tua ahikom amate ka awlmawk bua hi.
10 Tu in hisia in, maisang
hong pai lai tu hun sungah,
Israel mite taw ka vawt tu
thuciamna ahi hi, Topa in ci hi:
Ka thukhamte amate thinsung ah ka koi tu a,
a lungtang tungah ka at tu hi.
Kei sia amate ii Pathian ka hi tu a,
amate sia keima ii mite ahi tu hi.
11 Amate kuama in a minam puite
a hil sawn a kul nawn buatu hi.
‘Topa he vun,’ zongh amate tetek
tungah a kici buatu hi.
Banghang ziam cile amate in
kei hong he siat tu a,
a nobel panin a lianbel dongin
hong he tu hi.
12 A mawnate uh ka maisak tu a,
a khialnate uh ka ciamtee
nawn buatu hi,” ci hi.
13 Pathian in thuciamna thak sia a son ciangin, a masa sia a lui suaksak hi; tuaciangin bang khat pawpo a lui a tul sate sia hai ngawlin bomang tu hi.