41
Joseph in Kumpipa Mang Khiaksak
1 Tua zawk kum nii zawkciang Egypt kumpipa in mang man a, a mang sungah Nile ngunhui ah ding a,
2 Nile ngun sung panin khuipui a thau, a zol sali pusuak to in, lopa ne tu kipan uh hi.
3 Tua zawkciang a ngawm, a ngu nguak a om khuipui salite pusuak to hi. Tua teng hong pai a, Nile ngunhui a khuipui dangte kungah dingin,
4 a ngawm khuipui salite in a thau khuipui salite netum uh hi. Tuasia ciang kumpipa khanglo hi.
5 Ama mu kikin mang dang khat man hi. A hui bup taknei in a min, taanghui sali sia kung khat tung pan hui hi.
6 Tuaciang senneal vui in theapsak in a ngeau singseng taanghui dang sali hong po hi,
7 a theap taanghui teng in a tak nei taanghui teng valhtum hi. Kumpipa khanglo a, mang maman ahi sia tel hi.
8 A zingsang ciang ama thinngim ahikom mitbum thiamte le Egypt mipil miciim theampo samsak hi. Ama in amate tungah a mang teng son a, ahizong kuama in a mang khiaksak thei ngawl hi. Ref 41:8 Dan 2:2
9 Tuasia ciang sapittui pia pa in kumpipa tungah, “Tuni in ka khialna kong pualaak kul hi.
10 Kei le anluum empipa tungah na thin uuk a, kumpi inncing ngalkap bupa inn sung thong sungah nong khum hi.
11 Zan khat ka nii in mang khat veve ka man uh a, ka mangte uh in khiakna tuatuam nei hi.
12 Tua munah kumpi inncing ngalkap bupa ii silapa, Hebrew tangvalno khat kote taw omkhawm hi. Ama tungah koma mangte ka son uh ciang a khiakna hong son hi.
13 Ama son bang tatakin piang a: kei sia ka nasep nong pia kik a, ahizong anluum empipa sia na thatlum hi,” ci hi.
14 Kumpipa in Joseph samsak a, thong sung pan thakhat ma in hong kipaipui hi. Joseph a mul meet thiangin, a puante a laih zawkciang kumpipa omna ah pai hi.
15 Kumpipa in ama tungah, “Mang khat ka man a, kuama in a khiakna hong son thei ngawl hi, nang sia mangkhia thei ci in hong kison hi,” ci hi.
16 Joseph in, “Kumpipa awng, kei hi thei hi ngawl hi, ahizong Pathian in mang khiakna maan hong son tu hi,” ci in zo hi.
17 Kumpipa in, “Ka mang sungah Nile ngunhui ah ka ding a,
18 limci in a thau khuipui sali, ngun sung pan hong pusuak to a, lohingte ne tu in kipan hi.
19 Tua zawkciang a ngawm a ngu nguak a om a dang khuipui sali hong pusuak to hi. Tuate sia Egypt ngam sungah ka mu ngei khuipui zawngkhal belte ahi hi.
20 Khuipui ngawmte in khuipui thaute netum a,
21 ahizong kuama in a neak hunlam he ngawl tu hi, banghang ziam cile amate sia nidang bangma in ngawm veve hi. Tuasia ciang ka khanglo hi.
22 Mang ka man kik a, taangkung khat tung pan a hui bup taknei in a min taanghui salite ka mu hi.
23 Tuaciang senneal vui in theapsakin a ngeau singseng taanghui sali hong po a,
24 tuaciang a theap taanghuite in a taknei taanghuite valhtum hi. Mitbum thiamte tungah ka mang ka son a, ahizong amate khat zongh in ka mang khiakna hong son thei ngawl hi,” ci hi.
25 Joseph in kumpipa tungah, “Na mangte nii ii a khiakna sia kibang hi; Pathian in a sep tu teng nang tungah hong son zo hi.
26 Khuipui thau salite sia kum sali hi a, taanghui a taknei salite zongh kum sali ma hi; a khiakna kibang hi.
27 A khak sang a hong pusuak khuipui ngawm sali le senneal vui ii a ngeausak singseng taanghui theap salite sia kialpi kum sali ahi hi.
28 Tuasia kong sonsa bangma hi — Pathian in a sep tu teng nang tungah hong lak zo hi.
29 Egypt ngamsung theampo ah kum sali sung an kihau mama tu hi.
30 Tua zawkciang kum sali sung kialpi tungin an hau hun kum teng kimangil cip tu hi, banghang ziam cile kialpi in ngam lalsak tu hi.
31 An hau hun teng kimangil bit tu hi, banghang ziam cile hong zui tu kialpi sia lauhuai mama tu hi.
32 Mang nii a kipee in na matna sia Pathian in hi thu kipsak zo a, hai ngawlin tungsak tu cinopna ahi hi.
33 “Tu in mipil miciim thuhe pasal khat teal in a, ngam uk tu in koi in.
34 A dang vaihawm uliante ngam sungah koi kul a, kum sali an hau hun sungin lo ante ii see nga sua see khat la khol in.
35 Thu pia in a, hong tung tu kumphate sungah an theampo kaikhawmsak in, tuaciang amate thuneina taw khuapite sungah an kholin a, cingsak in.
36 Hi ante sia Egypt ngam ah hong tung tu kialpi kum sali sungah ngam sungah zeak tu in, a kikhol kholsa suak tu hi. Hi bang vaihawmna taw mihingte pukthi ngawl tu hi,” ci hi.
Egypt Ngam Ukpa in Joseph Kikoi
37 Kumpipa le a uliante in hi vaihawmna lungkim a,
38 kumpipa in amate tungah, “Joseph sangin a phazaw mi ih mu ngei buatu hi, ama sia a sungah Pathian thaa a nei mihing khat ahi hi,” ci hi.
39 Kumpipa in Joseph tungah, “Pathian in nang tungah hite theampo hong lak zo hi, tua ahikom nang saang a, a ciim zaw le thu thuk mu zaw kuama dang om ngawl ahi sia kilangh hi.
40 Ka ngam ukpa tu in nang kong koi tu a, nangma thupiakte ka mihingte theampo in zui tu hi. Nangma thuneina tungsia ah keima bek ka om tu hi. Ref 41:40 Sawl 7:10
41 Tu in Egypt ngamsung theampo a ukpa tu in panmun kong pia hi,” ci hi.
42 Kumpipa in a min tupna khutzungbu, a khutme pan suutin Joseph khutme ah bunsak hi. Ama in puantual neal a pha khat silhsakin a ngawng ah khamh khi khat awsak hi. Ref 41:42 Dan 5:29
43 A to natu in kumpi siphu ngalleang niina sia pia a, ama a cing ngalkapte a mai ah pai in, “Lam na awn vun! Lam na awn vun!” ci in ausak hi. Tuabangin Joseph sia Egypt ngamsung theampo a ukpa in panmun pia hi.
44 Kumpipa in ama tungah, “Keima in kumpi ka hi hi — nangma oaina om ngawlin Egypt ngamsung theampo ah kuama in a khut a peang ngawngawn laam thei ngawl tu hi,” ci hi.
45-46 Ama in Joseph sia Zaphenath Paneah ci in Egypt min thak pia a, a zi tu in Heliopolis khua thiampi khat ahi Potiphera ii tanu Asenath pia hi.
Joseph sia Egypt kumpipa na a sep kipatin kum sawmthum pha hi. Ama sia kumpi zum nusia in ngamsung theampo ah khualhaw kawkoai hi.
47 An hau hun kum sali sung in leitang pan an tam mama piang a,
48 tua teng theampo Joseph in kaikhawmin khuapi tengah kholsak hi. Ama in khua kiim a lote panin a piang ante sia a khuapi tek ah khol hi.
49 A ankholte sia tamlei ahikom Joseph in sim vanglak ngawlin, tee nawn ngawl hi — tua teng sia tuipi vaal senvui taw kibang hi.
50 Kialpi kumte hong tun ma in Joseph in Asenath taw tapa nii nei hi.
51 Ama in, “Pathian in ka thuakna theampo le ka pa innkuanpui theampo hong mangilsak hi,” ci hi. Tua ahikom a tapa masa min Manasseh phuak hi.
52 Ama in, “Ka ngim thuakna munah Pathian in tate hong pia hi,” ci ahikom a tapa niina ii min sia Ephraim phuak hi.
53 An hau in Egypt ii nopsakna hun kum salite hong bo a,
54 Joseph sonsa bangin kum sali kialpi kipan hi. Ngamdang theampo ah kialpi tung a, ahizong Egypt ngamsung teng ah an om hi. Ref 41:54 Sawl 7:11
55 Egypt te ngilkial tu hong kipat ciang kumpipa tungah an ngen uh hi. Tuaciang kumpipa in amate Joseph kungah pai in, ama ci bang a vawt natu in thupia hi. Ref 41:55 Jn 2:5
56 Kialpi nasia vaial in ngam bup ah hong kizel a, tua ahiciang Joseph in ankholna inn theampo hongin Egypt te tungah antang zuak hi.
57 Mun theampo ah kialpi nasia mama tung ahikom leitung mun theampo pan mihingte Joseph kungah antaw tu in Egypt ah hong pai uh hi.