2
1 Tuabangin vaannuai buppi sia kikhuangkhim hi.
2 A ni sali ni ciangin Pathian in a nasep teng man siat a, nasep tawlnga hi. Ref 2:2 Heb 4:4,10
3 Tua ni in ama in a bitphua nasep a khuangkhim a, a nasep tawlnga ahi hu in, a ni sali sia thupha pia a, ni thupi khatin tuam koi hi. Ref 2:2-3 Pu 20:11
4 Tuaciang vaannuai bitphuana sia tuabang teng ahi hi.
Eden Huan
Topa Pathian in vaannuai bup a vawt lai in,
5 leitung ah thingkung lopate om ngawl a, thaicii a po zongh om ngawl hi, banghang ziam cile ama in nguazusak ngawl a, lotho tu khat zongh om ngawl hi,
6 ahizong leinuai pan tui pusuakin, lei kawtsak hi.
7 Tuasia ciang Topa Pathian in lei pan leivui pawlkhat la in tuasia taw mihingpa khat vawt hi; ama in a naak sungah nuntakna a piangsak hu mopin tua mihingpa hong nungta hi. Ref 2:7 1 Cor 15:45
8 Tua zawkciang Topa Pathian in nisuana sang Eden ah huan khat vawt a, tua munah ama ii vawtsa mihingpa koi hi.
9 Ama in a et hoi thingkung namcin tua munah posak in, ngaphate ngasak hi. Huan laizang ah nuntakna a pia thingkung le a pha a sia heak theina a pia thingkung posak hi. Ref 2:9 Tpl 2:7; 22:2,14
10 Eden huan sungah lui khat luang a, huan sung tui kawtsak hi; Eden puasang a thet ciang tua sia ngun li in kikhen hi.
11 A masabel ngun sia Pishon hi a; Havilah ngam kiimvealin luang hi.
12 Tualai ah khamh ciitak om a, a om vazaak ngawl paaknamtui le suang manphate zongh om hi.
13 A niina ngun sia Gihon hi a; Cush ngam kiimvealin luang hi.
14 A thumna ngun sia Tigris hi a, Assyria ngam nisuana sangah luang hi, tuaciang ngun a lina sia Euphrates ahi hi.
15 Tuaciang Topa Pathian in Eden huan sungah a tho tu le a cing a keam tu in, mihingpa koi hi.
16 Pathian in ama tungah, “Huan sung thingkung khat pawpo ii nga na ne thei tu a,
17 a pha le a sia heak theina thingnga ngawlbuang na ne thei tu hi. Tua thingkung ii nga na ne buahet tu a; na ne le na neak ni ma in na thi tu hi,” ci hi.
18 Tuaciang Topa Pathian in, “Mihingpa sia ama nguak a om tu pha ngawl hi. Ama a hu tu in a kilawm koppui tu khat ka vawt tu hi,” ci hi.
19 Tua ahiciang Pathian in lei pan leivui pawlkhat la in, nganhing theampo le vacim theampo vawt hi. Tua zawkciang tua teng min a vaw tu in mihingpa ii mu tu in paipui a; ama ii min vaw bangin min nei siat uh hi.
20 Tuabangin mihingpa in vacim theampo le nganhing theampo min vaw siat a, ahizong ama a panpui thei tu a kilawm a koppui tu khat zongh om ngawl hi.
21 Tuasia ciang Topa Pathian in mihingpa mutthipsak a, a mut lanin a telngu khat laaksakin tua mun a sa khak kik hi.
22 Pathian in tua telngu taw numei khat vawt a, ama ii kungah paipui hi.
23 Tuasia ciang mihingpa in,
“Tu pepeet ciang, hisia in
keima ii nam bang mihing khat —
ka ngu pan a kila ngu le
ka sa pan a kila sa ahi hi.
Mihingpa sung pan a kila nu
ahikom ama ii min ‘numei’ hi,” ci hi.
24 Tua ahi hu in mihingpa khat in a nu le a pa nusia in a zi taw kingawm tu a, amate pumkhat suak tu uh hi. Ref 2:24 Mt 19:5; Mk 10:7-8; 1 Cor 6:16; Eph 5:31
25 Tua mihingpa le tua numei a pumnguak hi uh a, ahihang maizum ngawl uh hi.