18
Abraham tungah Tapa Khat Kikamciam
1 Topa sia Mamre thingkung thiangthote kungah a om Abraham tungah kilangh hi. Abraham sia a puanbuk kongbiang ah sun nisatbel laitakin to hi,
2 ama khua a etto le tuak san ah mihing thum a ding mu hi. Ama in amate a mu po ciang kimu tu in tai hi. A maitang lei a phak dong kunsuk in, Ref 18:2a Heb 13:2
3 ama in, “Syate awng, nong hesuakna in hong baang ngawlin ka inn hong kaantan heak vun; hi sungah note leangna hong do tu in om khi hi.
4 Na peang sil natu tui kong toai tu a; hi thingkung nuai ah na tawlnga tu uh hi.
5 An tawm kong pia tu a, tua an in na khualhawna ah hong thahatsak tu hi. Vaang nong piakna taw ka inn hong zuan zo na hi uh ciang, zin hong dosak tavun,” ci hi.
Amate in, “Lungdam ung; hong saang khu hi,” ci in zo kik uh hi.
6 Abraham a puanbuk sungah tai in Sarah tungah, “Na anvui a pha belte ip khat la in anluum in em paih in ” ci hi.
7 Tua zawkciang ama in a nganhon omna ah tai in khuino thau a limcibel khat tealin, a naseampa tungah aap a, neak thei tu in vawtsak memeang hi.
8 Ama in amate mai ah khuinoai diat, khuinoai, khuisa le an hong lui hi. Ama mama in tualai thingkung nuai ah leangna do in an nesak hi.
9 Tua zawkciang leangnate in ama tungah, “Na zi Sarah koisung om ziam?” ci in dongh hi.
Ama in, “Puanbuk sungah ama om hi,” ci in zo hi.
10 Amate khat in, “Tu zo tha kua ciang kong pai kik tu a, na zi Sarah in tapa khat nei tu hi,” ci hi.
Sarah in a pasal nungsang puanbuk kongkha pan ngai hi. Ref 18:10 Rom 9:9
11 Abraham le Sarah sia huai mama zo a, Sarah sia a tha sim numei ngeina kang zo hi.
12 Tua ahikom Sarah ama nguakin nui a, “Tu in kei sia ka kum tamin huai zo a, numei le pa nopsakna nei thei lai tu khi ziam? Ka pasal zongh le huai zo si hi,” ci hi. Ref 18:12 1 Pe 3:6
13 Tuasia ciang Topa in Abraham tungah, “Banghang Sarah nui a, ‘Ka kum a haam mama zawkciang ta nei thei takpi lai tu khi ziam?’ banghang ci ziam?
14 Na khat pawpo Topa atu in a haksa leilam om na ziam ? Kong ci sa bangin tu zo tha kua ciang kong pai kik tu a, Sarah in tapa khat nei tu hi,” ci hi. Ref 18:14 Lk 1:37
15 Sarah lau ahikom, tuasia nial hi. Ama in, “Kei ka nui bua hi” ci hi.
Ama in, “Ahi ma hi, nui ni hi” ci in zo kik hi.
Abraham in Sodom atu Hesuak Ngetsak
16 Tua zawkciang leangnate in nusia a Sodom khua a etsuk thei natu munah pai uh hi, Abraham in amate tha hi.
17 Tuaciang Topa in, “Ka hi tu thu teng Abraham tungah ka iim buatu hi.
18 Ama ii suan le paalte minam lian khat le a thahat minam khat suak tu a, ama tungtawnin minam theampo thupha ka pia tu hi.
19 A tapate le a suan a paalte tungah ka thu ni a, thumaan thutang a vawt natu, thu a piak natu in ama ka teal zo hi. Tuabang a vawt uh le ka kamciamsa bangin ama ta tu ka hisak siat tu hi,” ama le ama kici hi.
20 Tuasia ciang Topa in Abraham tungah, “Sodom le Gomorrah a kimawsiatna, nasia mama a, a mawna uh lian mama hi.
21 A kimawsiatna ka zaak teng maan ziam maan ngawl ziam kantel tu in ka paisuk kul tu hi,” ci hi.
22 Tua zawkciang Abraham ii leangnate nii sia Sodom sangah pai a, ahizong Topa sia Abraham taw taanglai hi.
23 Abraham in Topa neak a, “A mawbaang ngawlte a mawte taw susia khawm takpi tu ni ziam?
24 Sodom khuapi sungah mawbaang ngawl mihing sawmnga om le khuapi bup lalsak tu ni ziam? Tua sawmnga te huu tu in tua khuapi khoaikhe ngawl tu ni ziam?
25 Mawbaang ngawlte a mawte taw thatlum khawm ngeingawl het tu ni hi. Tuasia suak thei ngawl hi! Tuabang vawt thei ngawl tu ni hi. Tuabang vawt thong lete a mawte bangma in a mawbaang ngawlte zongh daan thuak tu hi thong hi. Hi thei ngawl tu hi. Leitung theampo ii thukhenpa in thu a maan in a khen kul tu hi,” ci hi.
26 Topa in, “Sodom khuapi sungah a mawbaang ngawl mihing sawmnga mu leng, amate hangin khuapi bup ka khoaikhe tu hi,” ci in zo hi.
27 Abraham in, “ Topa awng, hi bangin hangsan takin kong ci kik sia nong hesuakna in hong maisak ta'n. Kei mihing khat hi lel a, nang tungah thu khat pawpo son natu thu ka nei bua hi.
28 Ahihang a mawbaang ngawl mihing sawmnga om zo ngawlin sawmli le nga bek om thei tha tu hi. Mihing nga a kisapna hangin khuapi bup na lalsak veve tu ziam?” ci kik hi.
Topa in mimaw ngawl sawmli le nga mu leng tua khuapi ka lalcipsak buatu hi,” ci in zo kik hi.
29 Abraham in, “Sawmli bek om le eh!” ci kik hi.
Topa in sawmli om le ka lalsak buatu hi,” ci in zo kik hi.
30 Abraham in, “ Topa awng, nong hesuakna in na thin uuk heak in a, thu khat kong dongh lai tu hi. Sawmthum bek om le bangbang ahi tu ziam?” ci hi.
Ama in, “Sawmthum ka mu le ka lalsak buatu hi,” ci hi.
31 Abraham in, “ Topa awng, nong hesuakna in nang tungah kong ci ngam lalai na hong maisak ta'n. Kul bek kimu luilam le eh! ” ci hi.
Ama in, “Kul ka mu le khuapi ka lalsak buatu hi,” ci hi.
32 Abraham in, “ Topa awng, nong hesuakna in thin uuk heak in a, khatvei bek hong pausak lai ta'n. Sawm bek kimu le eh?” ci hi.
Ama in, “Sawm a om le ka lalsak buatu hi,” ci hi.
33 Abraham taw a thu son tu teng a man zawkciang, Topa paisuak a, Abraham sia inn ah cia kik hi.