12
Pathian ii Abram A sapna
1 Pathian in Abram tungah, “Na ngam, na bee le phungte le na pa inn nusia in a, kong lak natu ngam ah pai in. Ref 12:1 Sawl 7:2-3; Heb 11:8
2 Suan le paal tam mama kong pia tu a, amate minam lian khat suak tu uh hi. Nang sia thupha naak na hi natu in, thupha kong pia tu a, na min kong thangsak tu hi.
3 Nangma thupha hong piate
thupha ka pia tu a,
Ahihang nangma hong haamsiatte ka haamsiat tu hi.
Nang tungtawnin minam theampo
thupha ka pia tu hi,” ci hi. Ref 12:3 Gal 3:8
4 Abram kum sawmsali le kum nga a phak ciang Topa ci bangin Haran pan dingkhia hi; tuaciang Lot in zui hi.
5 Abram in a zi Sarai, a naupa ii tapa Lot, amate nei le lamh theampo le Haran pan a nga sila theampo Canaan ngam zotpui hi.
Amate Canaan ngam a thet ciang
6 Abram sia tua ngam kaantan in Shechem khua ah om mun thiangtho ahi Moreh ii thingkung thiangtho a thet dong paisuak hi. Tua hun in Canaan te tua ngam ah teang lai hi.
7 Abram kungah Topa kilangh a, “Na suan le na paalte tungah hi ngam ka pia tu hi,” ci hi. Tua zawkciang Abram in, ama ii kungah a kilangh Topa atu in biaknatau khat vawt hi. Ref 12:7 Sawl 7:5; Gal 3:16
8 Tua zawkciang Abram sia thangsang Bethel khuapi ii nisuana sang mualtung ngam ah kikhiin in nitumna sangah Bethel, nisuana sangah Ai khuate kilaklaw ah a ngiaphual saat hi. Tua mun zongh ah ama in biaknatau khat vawtin Topa bia hi.
9 Tua zawkciang ama mun khat pan mun khat kikhiin in Canaan ngam thangsang ah pai hi.
Egypt ah Abram
10 Ahihang Canaan ngam sungah kialpi tung a, tua kialpi nasia ahikom tawmvei sung a teang tu in thangsang a om Egypt ah Abram paisuk lai hi.
11 Egypt ngamsung tum tu in ngamngi a kan dek ciang a zi Sarai tungah, “Nang sia numei mealpha khat na hi hi.
12 Egypt te in nang hong mu ciang nang sia keima zi hi hong ci tu uh a, amate in keima hong thatin nang hong nungtasak tu hi.
13 Amate tungah a suapuinu khi hi na ci in; tuasia ciang nang hangin kei ka suakta tu a, pha takin hong vawt tu hi,” ci hi. Ref 12:13 Pian 20:2; 26:7
14 Ama ngamngi kaanin Egypt ngam a tum ciang Egypt te in a zi mealphat hunlam mu uh hi.
15 Zum uliante pawlkhat in ama a mu ciang a mealphatna kumpipa tungah son hi; tua ahikom kumpi inn sungah kipaipui hi.
16 Tua nu hangin kumpipa in Abram phat vawt a, ama ii tungah tuu, keal, khui, laa, silate le kalaohte a hon a hon in pia hi.
17 Ahizong kumpipa in Sarai a laak hu in Topa in ama le a kumpi inn sungah a teang mite tungah natna ngilote tungsak hi.
18 Tuasia ciang kumpipa in Abram sam a, “Banghangin hi bang hong vawt thong ni ziam? Ama na zi ahi sia banghang hong son ngawl ni ziam?
19 Banghangin na suapuinu hi ci a, ama ka zi tu in ka laak tu hong oai ni ziam? Hi sungah na zi om hi; ama la in a, pusuak vun!” ci hi.
20 Kumpipa in a mite thupia a, amate in Abram sia a zi le a neisa theampo taw a ngam pua sangah pusuaksak uh hi.