3
Thukham ahibuale Upna
1 Galatia mihing mawmawte awng! Akua in hong bum ziam? Jesus Christ ii thinglamtee tungah a thina thu sia na mittang uh taw, thiang takin na mu thei tu in hong kilak zo hi!
2 Hi thu khat sia hong son tavun: Pathian Thaa sia Thukham ii deina, na zuina uh panin, saang nu ziam maw, lungdamna thu za a, na upna uh pan nga hizaw nu ziam?
3 Bangbangin tu zata in mawmaw thei nu ziam! Pathian Thaa taw kipan phot nu hi; tu in noma thahatna taw khup sawm nu ziam?
4 Na heaksa theampo no atu in bangma mama hi ngawl ahi ziam? Tawm peuma khiakna nei nanak tu hi!
5 Pathian in Thaa hong pia a note sungah nalamdang lakna hong vawt sia Thukham ii deina na zui uh hang ziam maw lungdamna thu za a na up uh hang ziam?
6 Abraham tungah thupiangte ngaisun vun; laithiangtho in, “Ama in Pathian um a, ama upna hangin Pathian in thumaan thutang in saang hi,” ci hi.Ref 3:6 Pian 15:6; Rom 4:3
7 Tua ahiciang Abraham suan tatakte sia upna a nei mihingte ahi hi, ci in na tel natu ahi hi.Ref 3:7 Rom 4:16
8 Pathian in Gentile te sia upna tungtawnin thutang suaksak tu hi ci in laithiangtho in sonkhol hi. Tua ahikom laithiangtho in Lungdamna Thupha sia Abraham tungah, “Nang tungtawnin Pathian in mihing nam theampo thupha pia tu hi,” ci in son hi. Ref 3:8 Pian 12:3
9 Abraham in um a thupha kipia hi; tua ahikom a umte theampo ama bangin thupha kipia hi.
10 Thukham zuina a suangte sia haamsiatna nuai ah nungta hi. Banghang ziam cile laithiangtho in, “A kuama po Thukham laibu sungah a ki at teng a vekpi in a zui tawntung ngawlte sia Pathian ii haamsiatna nuai ah om hi!” ci hi.Ref 3:10 Thkna 27:26
11 Tu in Thukham taw Pathian mai ah kuama thutang kisuaksak ngawl ci sia kitel thiang hi, banghang ziam cile laithiangtho in, “Upna tungtawnin Pathian mai ah thutang a kisuaksak sia bek nungta tu hi,” ci hi.Ref 3:11 Heb 2:4
12 Ahihang Thukham in, upna taw a kisaina bangma om ngawl hi. “A kuama po thukham deina a vekpi in a seam peuma nungta tu hi,” laithiangtho in ci zaw hi.Ref 3:12 Thiam 18:5
13 Ahihang Christ in ei atu a kihaamsiatna taw Thukham ii hong puak haamsiatna panin eite ama in hong tan zo hi! Banghang ziam cile laithiangtho in, “A kuama po, thing tungah a kikhai sia in Pathian ii haamsiatna nuai ah om hi,” ci hi.Ref 3:13 Thkna 21:23
14 Upna tungtawnin Pathian ii hong kamciamsa Thaa ih nga natu le Abraham tungah Pathian kamciamsa thuphate, Christ Jesus tungtawnin Gentile te tungah a kipiak thei natu in, Christ in tuabangin vawt ahi hi.
Thukham le Kamciam
15 Ka suapuite awng, ni sim a piang sonteena khat kong zangh tu hi: mihing nii in na khat tungtaang ah thukim in lungkimna lai a vawt uh le kuama in tua thukimna paltan thei ngawl a, belap thei ngawl hi.
16 Tu in, Pathian in Abraham le ama ii suan pa tungah kamciamte pia hi. Laithiangtho in mihing a tam cina a lak “a suan a paalte” ci kammal zangh ngawlin, mihing khat bek a cinopna “a suan” ci kammal sia Christ a cinopna hi.
17 Ka son nop sia Pathian in Abraham taw thuciamna vawt a, ka kholet tu hi, ci in kamciam pia hi. Kum zali le kum sawmthum zawkciang a kipia Thukham in tua thuciamna paltan in Pathian kamciam sia phiat thei ngawl hi.Ref 3:17 Pu 12:40
18 Banghang ziam cile Pathian letsong sia Thukham tungah kibulphu hile, ama kamciam tungah kibulphu ahi nawn bua hi. Ahizong ama ii kamciam hangin Pathian in Abraham sia tua letsong pia hi.Ref 3:18 Rom 4:14
19 Tua ahile Thukham ii tupna in bang ziam? Tatkhialna sia bang ziam ci in a lak tu in a kibelap ahi hi, tuaciang tua Thukham sia kamciam a kipiakna pa, Abraham ii suan sia hong pian mateng a kho tu in a kingaisun ahi hi. Thukham sia vantunglalangte in hong thaaksuk a, mihing khat in a kilaklaw ah palai hong seam hi.
20 Ahihang mihing khat nguak sepna sungah palai kul ngawl hi; tuaciang Pathian sia khat ahi hi.
Thukham ii Tupna
21 Tua ahile Thukham sia Pathian kamciamte taw a kileebul ziam? Kileebul ngawl het hi! Banghang ziam cile mihingte in nuntakna hong pia thei Thukham khat a saang zo le tua thukham zuina taw mihing sim in Pathian mai ah thutang kisuaksak thei tu hi.
22 Ahihang laithiangtho in leitung bup sia mawna vaangletna nuai ah om hi, ci hi; tua ahikom Jesus Christ ih upna bulphu a, a kipia kamciam sia, ama a umte tungah kipia hi.
23 Ahihang upna nei natu hun hong thet ma in Thukham in hi hong pai tu upna hong kipualaak mateng eite theampo thongtaak bangin hong khabil hi.
24 Tuaciangin Upna tungtawnin Pathian mai ah thutang ih sua thei natu in, Thukham in Christ ii hong pai mateng hong uk hi.
25 Tu in upna nei natu hun sia hisung hong theng zo ahikom, Thukham in eite hong uk nawn bua hi.
26 Note theampo sia upna tungtawnin Christ Jesus taw na kipumkhatna uh hu in Pathian ii tate na suak siat uh hi.
27 Note Christ taw na kipumkhatna sungah na ki baptize uh a, tuaciang Christ ama mama ii nuntakna taw puan bangin hong kisilhsak zo cinopna hi.
28 Tua ahikom Jew te le Gentile te, silate le sila ahi ngawlte, pate le numeite kilaklaw tek ah kilamdanna om nawn ngawl hi; Christ Jesus taw na kipumkhat uh ciangin note theampo sia pumkhat na hi uh hi.
29 Christ ii neisa na hi uh le, Abraham suante na hi uh a, Pathian hong kamciam sate na saang tu uh hi.Ref 3:29 Rom 4:13