23
Thutang le A pha a kilawm thukhenna
1 “A maan ngawl kamdawn kizelsak heak vun a, a maw sia hu nuamin leilot tetti pang heak vun. Ref 23:1 Pu 20:16; Thiam 19:11-12; Thkna 5:20
2 Mihing a tamzawte ii khialna a vawt ciang le thutang khenna pan lam a pialsak tetti a pan ciang amate zui heak vun.
3 Mizawng khat thu a kisitna ah ngum tuan heak vun. Ref 23:3 Thiam 19:15
4 “Na ngalpa ii khui ahibuale a laa a tai na mu uh le ama kungah puak kik vun.
5 Ama ii laa a vanh taw a puk na mu le a laa phokpui vun a; paisan heak vun. Ref 23:4-5 Thkna 22:1-4
6 “Mizawng khat thukhenzum a thet ciang thutang khenna taansak heak vun.
7 A maan ngawlin ngual mawsiat heak vun a, mawnei ngawl khat that heak vun, banghang ziam cile tuabangin a sia a vawt peuma ka mawsak tu hi.
8 Sumnguk ne heak vun, banghang ziam cile sumnguk in mihingte a maan bang musak ngawlin, a maw ngawlte mailam lalsak hi. Ref 23:6-8 Thiam 19:15; Thkna 16:19
9 “Ngamdangmi khat vawtsia heak vun; ngamdangmite ii a thinsung thuakzia na he uh hi, banghang ziam cile Egypt ah note ngamdangmite na hi uh hi. Ref 23:9 Pu 22:21; Thiam 19:33-34; Thkna 24:17-18; 27:19
A Kum Sali Kum le A Ni Sali Ni
10 “Kum luk sung na lo ah thai na ciing tu uh a, an piang teng na kaikhawm tu uh hi.
11 Ahizong kum sali kum sia tawlngasakin tua lo pan a piangte bangma la heak vun. Lo sung pan a lipote mizawngte in ne tahen a, a taanglai teng ngamsate in ne tahen. Na sapithuan le na olive kungte zongh tuabang ma in hi tavun. Ref 23:10-11 Thiam 25:1-7
12 “Nipi khat sung ni luk naseam in, ahizong ni sali ni in naseam heak vun, tua hile note na hong sepsak na silate le ngamdangmite, na ngannote zongh tawlnga thei tu uh hi. Ref 23:12 Pu 20:9-11; 31:15; 34:21; 35:2; Thiam 23:3; Thkna 5:13-14
13 “Keima, Topa ii kong son theampo hong ngai tavun. A dang pathiante tungah thungen heak vun a; a min zongh lo heak vun.
Poaipi Lian Thum
(Pusuana 34:18-26; Thuhil kikna 16:1-17)
14 “Keima patoaina in kum khat sung thumvei poaipi khaam vun.
15 Kong thupiakna sa taw kizui in Egypt na nusiat tha ahi, Abib tha sungin Tol saw ngawl Anluum Poaipi khaam vun. Tua poaipi ni sali hun sung tol taw kivawt anluum peuma ne heak vun. Biakpiak natu khat keng ngawlin kei hong bia tu in hong pai heak vun. Ref 23:15 Pu 12:14-20; Thiam 23:6-8; Mi 28:17-25
16 “Anlaak tu na kipat uh ciang Anlaak Poaipi khaam vun.
‘Na sapithuan le na thingnga huan pan thingngate na kaikhop uh ciang tangngam hun sungin Anlaak Poaipi khaam vun. Ref 23:16 Thiam 23:15-21; Mi 28:26-31; Thiam 23:39-43
17 Kum sim hi poaipi thumte ah keima, Topa na Pathian hong bia tu in na mite theampo hong pai nanak tu uh hi.
18 “Nganhing khat taw biakpiakna nong vawt uh ciang tol saw anluum hong pia heak vun. Hi poaipi te sungah sangaw biakpiakna nong vawt uh ciang nganhing thaute sia a zingsang ciang dongin koi heak vun.
19 “Kum simin na lo anpal sia Topa na Pathian inn sungah hong paipui tavun. Ref 23:19 Thkna 26:2; Pu 34:26; Thkna 14:21
“Tuuno ahibuale kealno sa, a nu noaitui sungah huan heak vun.
Kamciamnate le Kihilnate
20 “Na khualhawna ah hong cing tu le ka vawtkholsa munah hong paipui tu in na mai ah vantunglalang khat ka paisak tu hi.
21 Ama thudon in, a thu ni tavun. Ama leedo heak vun, banghang ziam cile keima sawl hi a, tuabang leedona sia hong maisak ngawl tu hi.
22 Ahizong ama ii thu ni in kong thupiak theampo na seam uhle na ngalte theampo kong simsak tu hi.
23 Na mai ah ka vantunglalang pai in, Amor te, Hit te, Periz te, Canaan te, Hiv te le Jebus te ngam ah hong paipui tu a, tuaciang amate ka sucip siat tu hi.
24 Amate ii pathiante mai ah kunin bia heak vun, amate ii biakna ziate zui heak vun. A pathiante suksiat sakin a suangkhuam thiangthote sutham vun.
25 Topa na Pathian keima nong bia uh le an le tui taw thupha kong pia tu a, note natna theampo kong laaksak siat tu hi.
26 Na ngam na lei ah numei nautol om ngawlin, a tasel zongh om ngawl tu hi. Keima in note khansauna kong pia tu hi.
27 “No hong langpan mihingte in keima hong kiitak natu in ka vawt tu hi; na do ngalte sungah buaina ka omsak tu a, note kung pan na ngalte theampo kilee in ka taisak siat tu hi.
28 Na ngalte ka patausak tu hi; note 23:28 Ka ngalte sungah khuaingalte ka puak tu hi. note maisang nawt in na pai uh ciang Hiv mite, Canaan mite, le Hit mite ka notkeak tu hi.
29 Kum khat sungin amate ka notkeak siat buatu hi; notkeak siat thong leng tua ngam sia ngamtongta suak tu a, note atu in ngamsate tam leih tu hi.
30 Tua sangin tua ngam a lua khom tu mihing na om thei mateng tawtawm in ka not tu hi.
31 Na ngamngi uh kong vawtsak tu a, Aqaba Tuidok pan Mediterranean Tuipi dong le sennealngam pan Eupharates Ngun dong hi tu hi. Tua ngam ah a teangte tungah vaang neina kong pia tu a, maisang na manaw uh ciang na notkeak tu uh hi.
32 Amate taw ahizong a pathiante taw ahizong thukimna peuma vawt heak vun.
33 Tua mihingte na ngam sungah teangsak heak vun; na teangsak uh le amate in kei tungah na maw na khial natu hong vawt tu hi. A pathiante na bia uh le note atu in hong thisak thei thaang hi tu hi,” ci hi.