18
Moses kungah Jethro Haw
1 Moses ii sunghpa, Midian thiampi Jethro in Moses ii Israel te Egypt ngam pan a pusuapui lai Pathian ii Moses le Israel mite atu a sepna thu theampo za hi.
2 Tua ahiciang, Moses kungah ama pai in, nungsangah a kinusia Moses ii zi Zipporah, Ref 18:2-3 Pu 2:21-22
3 le a tapate nii Gershom le Eliezer tonpui hi. Moses in, “Ngamdang khat ah ngamdangmi khat hi zo khi hi,” ci hi; tua ahiciang a tapa khat ii min Gershom phuak hi. Ref 18:3 Sawl 7:29
4 Ama in, “Egypt kumpipa ii hong thalup natu pan ka pa ii Pathian in hong hu in, hong hun hi,” ci si hi; tua ahikom a tapa khat sia ii min, Eliezer phuak hi.
5 Moses ii ngiaphual saatna mual thiangtho, sennealngam ah Jethro sia Moses ii zi le a tapate nii taw hong pai uh hi.
6 Ama in amate paina thu Moses tungah zasak hi,
7 tua ahikom a muak tu in Moses pai a, ama mai ah kunin namh hi. Khat le khat nat le dam teng a kidok zawkciang Moses ii puanbuk sungah tum uh hi.
8 Moses in Jethro tungah Topa ii Israel te a hut natu in kumpipa le Egypt mihingte tungah a vawt theampo son hi. Lampi ah mihingte in haksatna a thuakna le Topa ii a hutna teng zongh son hi.
9 Jethro in hi thu teng a zaak ciang lungdam in,
10 “Kumpipa le Egypt mite khut sung pan hong hun Topa pok vun! Ama ii mite saltanna pan a hun Topa pok vun!
11 Topa sia pathian theampo sangin a let zawkna tu in ka he hi, banghang ziam cile Egypt te in Israel te tua bang a zawnsak vawt ciang Topa in hi bang seam hi,” ci hi.
12 Tuaciang Jethro in meihal biakpiakna buppi le a dang sangaw biakpiaknate Pathian tungah pia a; Aaron le Israel lampuite theampo, ama taw biakpiakna an thiangtho nekhawm tu in pai uh hi.
Thukhente Panmun Piakna
(Thuhil kikna 1:9-18)
13 A zing ciang Moses, a mite kihaunate lemtua in, zing pan nitak dong komla hi.
14 Moses ii nasep tu theampo Jethro in a mu ciang, “Mipite atu in na sep teng bang hi thong ziam? Banghangin na theampo nangma bek in seamin, hi lai ah thu hong dongh tute zing pan nitak dong dingsak ni ziam?” ci in dongh hi.
15 Moses in, “Mihingte in Pathian ii deina a heak natu in, kei kungah hong pai ahikom hi bangin ka sep kul hi.
16 Mihing nii thu a nei ciang kei kungah hong pai uh a, a maw le a tang thukhensakin amate tungah Pathian thupiakte le thukhamte ka son hi,” ci in zo hi.
17 Tuaciang Jethro in, “Na nasepzia maan ngawl hi.
18 Nangma le hi mihingte in na tha uh zawm law tu nu hi. Hite nang nguak sep tu in tam leih hi.
19 Tu in ngaisutna pha pawlkhat hong piasak ta'n, tuaciang Pathian in nangma hong ompui tu hi. Mipite atu in palai na hi tu sia pha hi, amate thu kineinate Pathian mai ah na puak tu hi.
20 Topa thupiakte na hil tu a, a nuntak tu zia le a nasep tu teng ama tungah na son tu hi.
21 Tua banah mipil mithiam pawlkhat tealin a, mihingte lampui tu in koi in: tuate sia mihing a tul, a za, a sawmnga le a sawm sim te ii lampuite hi tu hi. Amate sia Pathian a kiita mihing muanhuai le sumnguk ne thei ngawlte ahi kul tu hi.
22 Amate sia mihingte atu a seam top tu thukhenpa hisak in. Thu nozaw teng amate in khensak in a, ahizong thu haksa theampo nangma kungah puaksak in. Tuasia in na vanhngitte hong dawn tu a, nang atu in olzaw tu hi.
23 Pathian thupiak bangin, seam lete nangma zongh na thazawm ngawl tu hi, mihing theampo zongh a thu thiang in inn ah cia thei tu uh hi,” ci hi.
24 Moses in Jethro ii ngaisut piakna saang a,
25 Israel te sung pan mipil mithiamte teal hi. Ama in tua te sia mihing a tul, a za, a sawmnga le a sawm sim te ii lampui tu in panmun pia hi.
26 Amate in mite atu a seam top tu thukhenmangte hi a, thu haksate Moses tungah puakin thu nozaw te ahile amate in khen hi.
27 Tua zawkciang Moses in Jethro mangpha thaakin, Jethro a inn ah cia hi.