15
Moses ii La
1 Tuaciang Moses le Israel te in hi la Topa tungah sak uh hi:
“Ama in a minthang ngalzawna
khat nga ahikom,
Topa tungah la ka sa tu hi;
ama in siphute le a tung tote tuipi sungah lawn hi. Ref 15:1 Tpl 15:3
2 Topa sia a thahat
hong dalpa hi a;
Ama in kei hong hunpa hi.
Ama in ka Pathian hi a,
ka pok tu hi,
ka pa ii Pathian hi a,
ama ii letna thu la in ka sa tu hi. Ref 15:2 Ps 118:14, Is 12:2
3 Topa sia ngalhangpa hi a;
4 “Ama in Egypt ngalkaphonpi le
a siphu ngalleangte
tuipi sungah lawn hi;
a phabel a ulian teng
San Tuipi sung tuitaasak hi.
5 Tuipi thuk in amate khuum hi;
tuipi taw ah suangtum bangin tumsuk uh hi.
6 “ Topa awng na khut ziatsang,
thahat in lamdang a;
tua khut in ngalte semtham hi.
7 A tuanngen na ngualzawna taw
na ngalte na lawn thal hi;
na thin uukna a kuan ciang
taangphaw bangin amate kaanghtum hi.
8 Tuipi tungah na hu na muut ciang,
a sang in tui kiciangto hi;
tuasia pang khat bangin dingtang hi;
tuipi a thukbelna mun sia leitang ko suak hi.
9 A ngalpa in, “Amate ka del tu a,
ka pha tu hi;
a hauna teng ka hawm tu a,
ka dei theampo ka la tu hi;
Ka namsau ka dok tu a,
a nei theampo ka la tu hi,” ci hi.
10 Ahizong khatvei na husan taw
Topa awng, Egypt te tuita siat hi;
A kiitakhuai tui sungah
haak khiak bangin amate tumsuk uh hi.
11 “ Topa awng, pathiante sung pan
akua in nang taw kibang ziam?
Nang taw a kibang, a thiangtho,
a lamdang akua om ziam?
Akua in nangma aa bangin
nalamdang laknate le a nasia sepnate seam thei ziam?
12 Na ziatsang khut na vaan a,
leitang in ih ngalte valhlum hi.
13 Na kamciam bangin
na thumaan a, na suatak sa mite lam na pui hi;
na thahatna taw
na ngam thiangtho ah amate lam na pui hi.
14 Minamte in za zo a,
amate lau in liing uh hi;
Philistia mite lau in
patau mama uh hi.
15 Edom lampuite lau mama uh a;
Moab mi thahat te liing uh hi;
Canaan mite in
a thinhanna teng bosua hi.
16 Launa le patauna
amate tungah theng hi;
Topa awng, amate in
na thahatna mu uh hi,
saltanna pan na suatak
na mite ii a kaantan zawk mateng
amate launa taw cimaw in ding uh hi.
17 Nangma in amate paipui in
na mual tungah na omsak hi,
Topa awng, tua mun sia
nangma tatak ii na saksa
Biakinnpi, na inn atu in
na tealna mun ahi hi.
18 Topa awng, nangma sia
a tawntung le a tawntungin kumpi na hi tu hi.”
Miriam ii La
19 Israel te leiko tawn in tuipi kaantan hi. Ahizong Egypt siphu ngalleangte, siphute le a hawlte taw tuipi sungah a pai ciang, Topa in tui kingawm kiksak in, amate khuumcip hi.
20 Aaron suapuinu, kamsaang Miriam in a daalkual khuangno la in, numei theampo in a nung zui uh a, daalkual khuangnote tumin laam uh hi.
21 Miriam in amate lasak hi:
“ Topa tungah lasa vun
banghang ziam cile,
Ama in a minthang
zawna khat zo zo hi;
Ama in siphute le a tung tote
tuipi sungah lawn zo hi.”
Tui Khaa
22 Tuaciang Moses in Israel mite San Tuipi pan Shur sennealngam ah paipui hi. Ni thum sung sennealngam sungah pai a, ahizong tui mu ngawl uh hi.
23 Tuaciang amate Marah kicina munah pai a, ahizong tua munah tui khaa mama ahikom tui ne thei ngawl uh hi. Tua ahikom tua mun sia Marah kici hi.
24 Mipite in Moses phunsan in, “Bang tui ne tu khu ziam?” ci in dongh uh hi.
25 Moses in thinsung tak taw, Topa tungah thungen hi, Topa in thingbek khat lak a, tua thingbek tui sungah a lot ciang tua tui neakthei suak hi.
Topa in tua munah a nuntakpui tu thukhamte pia in, amate ze et si hi.
26 Ama in, “Keima ii maan ka sak sia na vawtna uh taw ka thu nong ni siat uh a, ka thupiakte na zui uh le Egypt te tungah ka tunsak natnate khat zongh kong tungsak buatu hi. Keima in Topa note hong damsakpa “Jehovah Rapha”
ka hi hi,” ci hi.
27 Tua zawkciangin amate sia ciktui sawm le nii le palm kung sawmsali a omna mun Elim theng a; tua mun tui hui ah ngiaphual saat uh hi.