10
Khaumawte
1 Tuaciang Topa in Moses tungah, “Kumpipa kungah pai in a, va kimu ta'n. Hi bangin amate sungah nalamdang laknate ka vawt thei natu in ahizong
2 nalamdang ka lak ciang, Egypt te a mawmaw bang ka sua sakna thute, na tu na tate tungah na son thei natu ahizong ama le a uliante thin ka sahsak hi. Note theampo in Topa ka hina nong he tu uh hi,” ci hi.
3 “Tua ahiciang kumpipa kungah Moses le Aaron pai in, “ Topa, Hebrew te ii Pathian in, ‘Kei tungah nong kiniamkhiak tu, bang tanvei hong nial lai tu ni ziam? Kei hong biak thei natu in, ka mite paisak in.
4 Nong nial lai le, zing ciangin na ngam sungah khaumaw kong puak tu hi.
5 Khaumawte tam mama tu a, lei maitang teng siincip tu hi. Ngial ii a lalsak ngawl, thingkung a taanglaite ngawngawn tuate in netum siat tu hi.
6 Tuate sia na kumpi innte, na uliante le na mihingte inn teng theampo dim tu hi. Tuate sia na taanghpupite mu ngeite sangin sia zaw tu hi,’ hong ci hi” ci uh hi. Tua zawkciang Moses kiheak in paisan hi.
7 Kumpipa uliante in kumpipa tungah, “Bang tanvei hisia pa in eite ngimna hong pia tu ziam? Topa a Pathian a biak thei natu in, Israel mite paisak in. Egypt ngam lal zo ci sia tel ngawl ni ziam?” ci uh hi.
8 Tua ahiciang Moses le Aaron kumpipa kungah kipaipui kikin kumpipa in amate tungah, “Note pai in, na Topa Pathian uh bia thei tu nu hi. Ahizong a kua teng tatak pai tu nu ziam?” ci hi.
9 Moses in, “Koma patangte le khanghaamte zongh pai siat tu khu hi. Kote in ka tapate le tanute, ka tuute le kealte, le ka khuite keng tu khu hi, banghang ziam cile Topa zatak piakna in poai khat vawt tu kul hi,” ci in zo hi.
10 Kumpipa in, “Na numeite le patangte kong paisak ngeingawl tu sia Topa min taw ka kiciam hi! Note in kei leedo nong sawm uh hunlam kician hi.
11 Suak thei ngawl hi! Na deina uh tuabang ahile pasal teng bek pai in Topa bia thei nu hi,” ci hi. Tua teng taw Moses le Aaron, kumpipa kung pan kihawlkeak hi.
12 Tuaciang Topa in Moses tungah, “Khaumawte hong kipuak natu in, Egypt ngam le lei tungah na khut laamto in. Tuate hong pai tu a, thingkung po theampo le ngial ii lalsak mong theampo netum tu hi,” ci hi.
13 Tua ahiciang Moses in a ciangkhut laamto a, Topa in nisuana sang pan sun le zan tawntung ngamsung vui vasak hi. Tuasia in a zingsang ciang khaumawte hong puak hi.
14 Khaumawte a hon a hon in hong theng a, Egypt ngamsung bup ah teang hi. Tua in a kimu ngeingawl le a kimu kik ngeingawl tu khaumaw hon tambel ahi hi. Ref 10:14-15 Tpl 9:2-3
15 Tuate in lei maitang vom mitmet in siin siat hi; ngial ii den mong theampo le thingkung tung thingnga theampo ne siat hi. Egypt ngamsung theampo ah thingkung le ankung tungah a hing khat zongh taang ngawl hi.
16 Tuasia ciang kumpipa in manlang takin Moses le Aaron samin, “ Topa na Pathian le note tungah ka maw zo hi.
17 Tu in, khatvei ka mawna hong maisak tavun a, hi a nasia daan piakna kei tung pan a laak keak natu in, Topa na Pathian tungah thu hong ngetsak tavun,” ci hi.
18 Moses in kumpipa nusia in Topa tungah thungen hi.
19 Tuaciang Topa in nisuana sang vui sia, a hat mama nitumna sang hui suaksak a, tua vui in khaumawte lento in Suez Tuidok sungah muutkeak hi. Egypt ngamsung theampo ah khaumaw khat zongh om nawn ngawl hi.
20 Ahizong Topa in kumpipa thin sahsakin ama in Israel te paisak ngawl hi.
Khuazing
21 Tuasia ciang Topa in Moses tungah, “Van ah na khut laamto in, tuaciang a saa mama hunlam a kiphawk tham liang khuazing taw Egypt ngam hong kituam siat tu hi,” ci hi.
22 Moses in a khut van ah laamto in, Egypt ngamsung theampo ni thum sung khuazing bikbek hi.Ref 10:22 Ps 105:28; Tpl 16:10
23 Egypt te khat le khat kimu thei ngawl a, tua hun sung kuama pusuak ngawl hi. Ahizong Israel te teenna munah khuavak nga hi.
24 Kumpipa in Moses samin, “Note pai in, Topa bia thei nu hi; numeite le patangte zongh keng tavun. Ahizong na tuu na keal le na khuite hi lai ah nusia tu nu hi,” ci hi.
25 Moses in, “Tuabang ahile Topa ka Pathian tungah meihal biakpiak natu le sangaw biakpiak natu ngannote nong sik kul tu hi.
26 Hi ngawl hi, ka ngannote paipui tu khu hi; khat zongh kinusia ngawl tu hi. Topa ka Pathian sangaw biakpiak natu in ngannote koma ii teal kul hi. A mun ka thet mateng, a bang nganno taw ama bia tu cisia ka he buatu uh hi,” ci in zo hi.
27 Topa in kumpipa thin sahsak a, amate paisak nuam ngawl hi.
28 Kumpipa in Moses tungah, “Ka muna ah om heak in! Nang hong musak kik nawn heak in! Kong mu kik ni in thi tu ni hi!” ci hi.
29 Moses in, “Nangma maan ni hi. Kei nong mu kik ngei nawn buatu hi,” ci in zo hi.