3
Haman in Jew te Thalup Sawm
1 Tawmvei zawkciang Xerxes kumpipa in Haman a kici khat sia vuanzi lianbel in a za khanto hi. Haman sia Agag suan Hammedatha tapa ahi hi.
2 Zatakna piakna in Haman mai ah khupdin in a kun natu Kumpipa in a khutnuai ulian theampo tungah thupia hi. A dang teng in tuabangin zatakna pia napi Mordecai in nial hi.
3 Kumpi ulian dangte in kumpipa thupiakna sia banghangin zui nuam ngawl ni ziam, ci in dongh uh hi;
4 amate in ni khat zawk ni khat a zui natu sawsawl napi Mordecai in thudon nuam tuan ngawl hi. Ama in, “Keima in Jew mi hi a, Haman mai ah ka kun thei buatu hi,” ci in thiang son hi. Tua ahiciang amate in Mordecai ii ngamtatna a thuak zo ka tawm ci in ngaisun kawm ma in Haman tungah hi thu son uh hi.
5 Mordecai ii khupdin in a kun ngawlna thu Haman in a heak ciang a thinso hi,
6 tuaciang, Mordecai sia Jew mi a hina thu ama in a heak ciang Mordecai khat bek daan piak ngawl tu in, khensat hi. Ama in Persia kumpi ukna ngam bup ah a teang Jew mi theampo mot siat tu in ngeal hi.
7 Xerxes kumpipa ii kumpi a sep a kum sawm le kum nii kum, tha masa, Nisan tha in, a sawmna bang a vawt natu in bang ni bang tha phabel ziam he nuam ahikom “purim” a kici lai mee vawt tu in Haman in thupia hi. Adar tha, tha sawm le tha niina, ni sawm le ni thum ni in vawt tu khensat hi.
8 Tua ahiciang Haman in kumpipa tungah, “Na kumpi ukna ngamsung theampo ah a kithethaang le ngamke theampo ah a kimu minam khat om hi. Amate ii zui a ngeinate sia midangte a taw kibang ngawl hi. Tua banah na kumpi ukna ngamsung upadi te zui nuam ngawl ahikom tuate na koithong tu sia nang atu in pha ngawl hi.
9 Kumpipa awng, na lung a kim le, amate a kithalup natu in thutan in. Tuabangin thu na tan le kumpi ukna ngam vaihawmna sungah zak tu in kumpi sum le vanh manpha sungah keima ngunntang kilogramme 340,000 vaal kong piak tu in kong kamciam hi,” ci in son hi.
10 Kumpipa in tua thuthansakna sia zum thu a sua thei natu laitupna in a kizangh a khutzungbu suut a, Jew mite ngal Agag suan Hammedatha tapa Haman tungah pia hi.
11 Kumpipa in ama tungah, “Tua mite le a dangkate nangma aa hi; na uk bang po vawt in,” ci hi.
12 Tua ahiciang tha masabel ni sawm le ni thum ni in, Haman in kumpipa ii thuzeakte sam a, kumpi ukna sungah a om kampau nam theampo le amate ii zak lai taw pheen in at tu in thuthansakna khat sonin atsak hi. Tua lai sia ngamukte, ngamukmangte le uliante theampo tungah puak tu ahi hi. Tua lai sia Xerxes kumpipa min taw a kisuaksak hi a, a khutzungbu kituum hi.
13 Laitaite in hi thuthansakna sia kumpi ukna ngamsung a om ngamke theampo ah puak uh hi. Tuasia sungah Adar tha, ni sawm le ni thum ni, ni khat sungin Jew te theampo — a moi le a haam, numeite le patangte — a kimot natu thupiakna teng om hi. Amate kihesuak ngawlin kithat tu a, a neisa teng kilaaksak tu hi.
14 Tua ni hong thet ciang a kuama po a kingin thei natu in tua thuthansakna teng ngamke theampo ah ngammite heak tu in kizasak tu hi.
15 Kumpipa ii thupiakna taw Susa khuapi ah tua thutanna a heak kim natu in kizasak a, laitaite in tua thuthak sia ngamkete ah puak uh hi. Susa khuapi sungah a buaisak laitakin kumpipa le Haman tokhawm in zu ne uh hi.