10
Ngamdangte taw Kiteenthaangna Bosak natu Ngealna
1 Biakinnpi mai ah Ezra kapin hi mawna khialnate pualaakin kunin a thunget laitak a kiim ah Israel te — pasalte, nupite le patangte — kikhawm a, nasia takin kap uh hi.
2 Tuaciang Elam bee le phung sung pan Jehiel ii tapa Shecaniah in Ezra tungah, “Ngamdang numeite teenpuina hangin Pathian taw ciampeal khu hi, ahitazong Israel atu in lam et om lai hi.
3 Tu in hi numeite le a tate puak kik natu in ih Pathian tungah a ciliap huai kamciamna khat vawt hamtang tu khu hi. Kote in nangma le Pathian thupiak a zakta dangte ii vawt tu hong ci bangin ka vawt tu uh hi. Pathian Thukham ii ci bangin ka vawt tu uh hi.
4 Tuasia in sep tu na vaipuak ahi hi. Kote na nungah om khu hi, tua hi a pai in a, seam suak vet in,” ci hi.
5 Tua ahiciang Ezra in Shecaniah ii a ci bangin thiampi lampuite, Levi lampuite le a taanglai mihon lampuite sep tu in kiciamsak hi.
6 Tua zawkciang ama sia Biakinnpi mai pan pai in Eliashib ii tapa Jehohanan inn sungah tumin zan taam hi, tua munah saltaangte thumaan ngawlnate hangin khuangai in om hi. Ama in bang mama ne ngawl dawn ngawl hi.
7 Saltanna pan a cia kik theampo Jerusalem khua ah a kikhop natu thu Jerusalem le Judah ngam mun theampo ah
8 mipi lampuite ii thupiak bangin kizasak hi. Ni thum sungin a pai ngawl a om le, a neisa theampo kimatsak tu a, taangpite sungah pawlmi suak thei nawn ngawl tu hi.
9 Tua ni thum sung, a tha kuana, ni kul ni in Judah le Benjamin ngam sungah a teang pasal theampo, Jerusalem khua ah pai in biakinn leitual ah kikhawm uh hi. Tua hun sung ngua tam mama zu ahikom khua hun phat ngawl hang le kikhopna a thupina hangin mipi theampo ling vakil uh hi.
10 Thiampi Ezra dingto in amate tungah, “Note in upna na nei bua uh a, ngamdang zi na nei uh manin, Israel tungah khialna na tungsak uh hi.
11 Tua ahiciang tu in na taanghpupite ii Pathian, Topa tungah na mawnate pualaak vun a, ama diksak bangin ngamta vun. Ih ngam sungah a teang ngamdangmite kung pan a tuamin om vun a, na ngamdang zite taw kikhen vun,” ci hi.
12 Mipite au in, “Na ci babangin vawt tu khu hi,” ci in zo uh hi.
13 Ahizong amate in, “Mihonpi tam leih a, ngua zongh tam mama hi. Hi bangin kote doipua sangah ding zo nawn ngawl tu khu hi. Hi mawna sungah eite tam mama kihel ih hi ciang, ni khat ni nii sungin a kiseam thei tu nasep hi ngawl hi.
14 Ih uliante Jerusalem ah taamsakin hi thu seam tahen. Tuasia ciang ngamdang zi nei pawpo in a kiciam hunin a khuapi tek pan tuabangin lampuite le a thukhente taw hong paikhawm tahen. Hi bangin sepna taw Pathian ii thin uukna sia thai thei tu hi,” ci thua uh hi.
15 Hi ngealna sia Asahel ii tapa Jonathan le Tikvah ii tapa Jahzeiah te sim ngawlin nial ngawl a, amate sia Melshullam le Levi mi Shabbethai te in panpui uh hi.
16 Saltanna pan a cia kikte in tua ngealna sia thukim ahikom thiampi Ezra in bee le phung lutang teng tung pan pasal upate panmun pia in, a min teng khum hi. Amate in a tha sawmna, ni khat ni in a thu kat kipan in,
17 tua zawk tha thum sungin amate in ngamdang zi neite taw kisai thu theampo kan siat uh hi.
Ngamdang Zi nei Pasalte
18 Hi sia in ngamdang zinei pasalte tepteena hi:
Joshua le a suapuite ii bee le phung pan Jehozadak ii tapate: Maaseiah, Eliezer, Jarib le Gedaliah te ahi hi.
19 Amate in a zite khul tu in kamciam pia a, a mawnate hangin tuutal khat taw sangaw biakpiakna nei uh hi.
20 Immer bee le phung: Hanani le Zebadiah
21 Harim bee le phung: Maaseiah, Elijah, Shemaiah, Jehiel le Uzziah
22 Pashhur bee le phung: Elioenai, Maaseiah, Ishmael, Nethanel, Jozabad le Elasah
23 Levi te:
Jozabad, Shimei, Kelaiah, (Kelita zongh kici), Pethahiah, Judah le Eliezer
24 Music thiamte:
Eliashib
Shallum, Telem le Uri
25 A dangte:
Parosh bee le phung: Ramiah, Izziah, Malchijah, Mijamin, Eleazar, Malchijah le Benaiah
26 Elam bee le phung: Mattaniah, Zechariah, Jehiel, Abdi, Jeremoth le Elijah
27 Zattu bee le phung: Elioenai, Eliashib, Mattaniah, Jeremoth, Zabad, le Aziza
28 Bebai bee le phung: Jehohanan, Hananiah, Zabbai le Athlai
29 Bani bee le phung: Meshullam, Malluch, Adaiah, Jashub, Sheal le Jeremoth
30 Pahath Moab bee le phung: Adna, Chelal, Benaiah, Maaseiah, Mattaniah, Bezalel, Binnui le Manasseh
31-32 Harim bee le phung: Eliezer, Isshijah, Malchijah, Shemaiah, Shimeon, Benjamin, Malluch le Shemariah
33 Hashum bee le phung: Mattenai, Mattattah Zabad, Eliphelet, Jeremai, Manasseh le Shimei
34-37 Bani bee le phung: Maadai, Amram, Uel, Benaiah, Bedeiah, Cheluhi, Vaniah, Meremoth, Eliashib, Mattaniah, Mattenai le Jaasu
38-42 Binnui bee le phung: Shimei, Shelemiah, Nathan, Adaiah, Machnadebai, Shashai, Sharai, Azarel, Shelemiah, Shemariah, Shallum, Amariah le Joseph
43 Nebo bee le phung: Jeiel, Mattithiah, Zabad, Zebina, Jaddai, Joel le Benaiah
44 Hi pasalte theampo ngamdang zineite veu hi. Amate in a zite khulin a tate taw ciasak siat uh hi.