5
Khuavak sungah Nuntakzia
1 Note sia Pathian ii it a tate na hi uh komin, ama bang na hi natu hanciam vun.
2 Christ in hong it a, Pathian diksak ngimnamtui biakpiakna le sangaw biakpiakna bangin, a nuntakna hong piak bangma, itna in na nuntakna uh uksak vun.Ref 5:2 Pu 29:18; Ps 40:6
3 Note in Pathian ii mihingte na hi bangma in, numei le pa paktatna, a thasiathuai nuntakna le duhopnate note sungah son tu in zongh na nei vet heak vun.
4 Kampauna sungah a kiihuai, a nin kammal le zummawk kammalte na zak tu uh zongh kilawm ngawl a, Pathian tungah lungdamkona kam na pau tu uh hizaw hi.
5 A kuama po a paktatte, a thasiathuai a, a kithoaite le a duhopte duhop sia milim biakna nam khat hi in Pathian le Christ Ngam lua ngeingawl tu hi ci sia pha takin na he uh hi.
6 Mawmawt kammal taw kuama in theamsak heak vun; hi thute mama hu in, Pathian ii thin uukna sia ama ii thu a ni ngawlte tungah tung tu hi.
7 Tua ahikom tuabang mihingte taw kizopna nei heak vun.
8 Noma mama zongh khuazing sungah om ngei na hi uh hang Topa mihingte na sua uh ciangin, khuavak sungah na om uh hi. Tua ahiciang khuavak ii neisa mihingte bangin na nungta tavun,
9 tua khuavak in na a pha theampo, thutang suana le thumaanna hong puak hi.
10 Topa ii diksak thute sin vun.
11 Mihingte ii sep le vawt khuazing taw a kipawl a mannung ngawlte na thutha heak vun a, tua ngamtatnate khuavak sungah then siat zaw tavun.
12 Amate ii khuazing sungah a sep a vawt kute sia son tu zongh in maizumhuai lei hi.
13 Tuaciang na theampo khuavak sungah hong kipusua tak ciang, amate pianzia babang thiang takin hong kilangh tu hi;
14 banghang ziam cile a thiang takin a kilangh na khat pawpo sia khuavak suak hi. Tua hu in hi bangin kici hi;
“A mutthippa awng, khanglo in,
tuaciang thina pan tho in,
tua hile Christ sia nang tungah
hong taang tu hi.”
15 Tua ahikom na nuntakzia kidawm in, heakmeal nei ngawlte bangin na nungta heak vun a, a ciimte bangin na nungta vun.
16 Hunpha na nga simin, a pha in zangh in, banghang ziam cile tu hun in ngitlo hun ahi hi.Ref 5:16 Col 4:5
17 Tua ahikom mawmaw heak vun a, Topa in nang sia bang vawt le hong oai ziam cisia na heak tu in na hanciam vun.
18 No hong lalsak thei, sapittui na kham heak vun: Thaa taw na kidim zaw tavun.
19 Psalm late, biakna late le la thiangtho te ii kammalte taw khat le khat na kipaupui tavun; biakna late le psalm late sa in, na thinsung theampo taw Topa pok vun.
20 Topa Jesus Christ min taw na theampo atu in Pathian ahi Pa tungah a tawntungin lungdam ko tavun.Ref 5:19-20 Col 3:16-17
Zite le Pasalte
21 Christ na thasiana uh taw khat le khat tungah thu kinitna nei tavun.
22 Zite awng, Topa ii thu na nit uh bangin na pasalte ii thu ni tavun.Ref 5:22 Col 3:18; 1 Pe 3:1
23 Banghang ziam cile Christ in pawlpi tungah thu a nei bangma in, pasalte in zite tungah thu nei hi: tuaciangin Christ sia a pumpi ahi pawlpi ii Hunpa ahi hi.
24 Pawlpi in Christ tungah thunitna a nei bangma in, zite in pasalte tungah a khawng a kheakin thunitna nei tahen.
25 Pasalte awng, na zite it vun. Christ in Pawlpi it a, a nuntakna a piak bangin na zite na it vun.Ref 5:25 Col 3:19; 1 Pe 3:7
26-27 Pawlpi sia thiangtho a, sit baang ngawl, paubanna om ngawl a, Pathian kammal ahi tui taw a kisilthiang zawkciang Pathian tungah tua pawlpi a ki aap thei natu in pawlpi atu Christ kipia hi.
28 Tuabang ma in pasalte in amate pumpi a it bangma in, a zite a it natu ahi hi. Pasal khat a zi a itpa in, ama le ama ki it ahi hi.
29 Kuama in ama ii pumpi a ensan a om bua hi. Christ ii pawlpi tungah a vawt bangma in, mihingte in a pumpi sia anvaak in ou zaw hi;
30 banghang ziam cile eite in ama pumpi ii nate ih hi hi.
31 Laithiangtho ii, “Hi thu hangin pa khat in a nu le a pa nusia tu a, a zi taw a kop tu hi. Tuaciangin amate nii sia khat suak tu hi,” a ci bangma ahi hi.Ref 5:31 Pian 2:24
32 Laithiangtho sungah a thuk mama thuku khat kipualaak a, tua thu in Christ le pawlpi atu ahi hunlam ka tel hi.
33 Ahihang tuasia in note tung zongh ah kizangh thei hi; pasal khat simin ama le ama a ki it bangin a zi it tu a, zite khat simin a pasal zakta tu uh hi.