46
Kumpipa le Poaite
1 Vaanglianpipa Topa in, “Suum sungnung tumna nisuana sang kongpi vang sia, ni luk nasep sung kikhak tu a, ahihang Sabbath le Thadet Poai ah kihong tu hi.
2 Kumpipa sia suum puanung pan kongpi vang tawnin sungtanna inndoi sungah pai tu a, thiampite in ama ii pum bup sangaw biakpiaknate le kipawlkhop biakpiakna a vawt hun sung teng kongpi khuamte hui ah ding tu hi. Tua mun kongpi ah ama in biakna a vawt kul tu a tua zawkciang pusuak kik tu hi. Kongpi sia nitak dong kikhak ngawl het tu hi.
3 Sabbath sim le Thadet Poai simin, mihingte theampo zongh in kunin kongpi mai ah Topa bia tu uh hi.
4 Sabbath ni in kumpipa in Topa tungah a mealhem ngawl tuuno luk le tuutal khat, pum bup meihal biakpiak natu in paipui tu hi.
5 Ama in tuutal khat simin antang litre sawm le sali le a lang biakpiakna in paipui tu a, tuaciang tuuno khat sim atu in a piak nop pawpo paipui tu hi. Tuabang antang biakpiakna a nei simin olive thau litre thum veu ama in paipui tu hi.
6 Thadet Poai sungah a mealhem ngawl khuital moi khat, tuuno luk le tuutal khat ama in pia tu hi.
7 Khuital khat le tuutal khat a piak simin, antang litre sawm le sali le a lang pia tu a, tuaciang tuuno khat a piak simin kumpipa in a piak nop po taw pia khawm tu hi. Tuabang antang biakpiakna a piak simin olive thau litre thum pia tu hi.
8 Kumpipa in kongpi vang ii sungtanna inndoi sia a nusiat ciang a tumna lampi sia ma zui in a pusua kul tu hi.
9 “Poai khat pawpo ah mihingte in Topa bia tu hong pai ciang, saksang kongpi pan a tumte in, biakna a vawt zawkciang, thangsang kongpi pan pusuak tu a, thangsang kongpi pan a tumte in saksang kongpi pan pusuak tu hi. Kuama in a tumna lampi pan pusuak thei ngawl tu a, a kingalsai kongpi pan pusuak tu hi.
10 Kumpipa sia mihingte pai ciang tum tu a, mihingte pusua ciangin pusuak tu hi.
11 Poai vawt nite le Poaite ah khuital, ahibuale tuutal khat a piak simin antang litre sawm le sali le a lang taw pia tu a, tuuno khat a piak simin biakpiakna a vawt pa in a piak nop pawpo pia tu hi. Olive thau litre thum sia tuabang antang biakpiakna taw veu pia khawm tu hi.
12 “Kumpipa in Topa tungah a thinzaw za biakpiakna sia pum bup meihal biakpiakna taw ahizong, kipawlkhop biakpiakna taw ahizong, a nei nop ciang suum sungnung paina nisuana sang kongpi kihon tu hi. Ama in Sabbath ni a biakpiakna a vawt bangin biakpiakna vawt tu a, kongpi sia ama pusua kik zawkciang kikhak tu hi,” ci hi.
Ni sim Biakpiakna
13 Topa in, “Zing simin, a mealhem ngawl kum khat a pha tuuno khat sia Topa tungah a pum bup biakpiakna in hal tu hi. Hi biakpiakna sia ni simin kinei nanak tu hi.
14 Zing sim biakpiakna ah zungtaang vui kilogramme 2 le tua taw hel tu in olive thau litre khat taw zong pia khawm tu hi. Topa tungah hi biakpiakna ngeinate sia a tawntungin zui tu ahi hi.
15 Tuuno, zungtaang vui le olive thaute sia Topa tungah zing sim a tawntungin biakpiakna in piak tu ahi hi,” ci hi.
Kumpipa le Leitang
16 Vaanglianpipa Topa in thupia hi: “Kumpipa in a neisa leitang mun khat pawpo a tapate khat tungah letsongin a pia le tua tapa in tang tu a, a innkuan ii neisa khat bang hi tu hi.
17 Ahihang kumpipa in a neisa leitang khat pawpo sia a naseam khat po tungah a pia le Puakik Kum a thet ciang, kumpipa ii neisa suak kik tu hi. Tua leitang sia ama ii neisa hi a, ama le a tapate bek in a tawntungin nei thei tu hi. Ref 46:17 Thiam 25:10
18 Kumpipa in a mite ii neisa te peuma laaksak ngawl tu hi. Ama in a tapate tungah a piak leitang khat pawpo sia ama atu a kikoisia sung pan bek hi tu a, tua hile, ama in ka mite khat pawpo sia amate leitang laaksakna taw zothaw ngawl tu hi.
Biakinn Anbukte
19 Tua zawkciang, tua pa in saksang a ngaa, suum sungnung thangsang kongpi mai ah a om inndoite tumna ah kei hong paipui hi. Hite sia thiampite atu a thiangtho inndoite ahi uh hi. Inndoite ii nitumna sang mun khat ama in kawk a,
20 tuaciang “Hi mun sia thiampite ii mawphel sangaw biakpiakna sate huan natu mun, ahibuale kitat natu biakpiakna le biakpiakna anvuite em natu mun ahi hi, tuabangin a thiangtho na khat pawpo mihingte ngim a piak thei natu mun suum puanung ah kipaipui ngawl tu hi,” ci hi.
21-22 Tua zawkciang ama in a suum puanung ah kei hong paipui a, a king li sim ah suum nozaw metre 20 a sau metre 15 a zai khat tek a om sia hong lak hi.
23 Tuate khat sim sia suang pang taw ki um a, pang bealhin meikhukte kivawt hi.
24 Tua pa in kei tungah, “Hite sia mite piak sangaw biakpiakna a sate biakinn ah naseamte ii a huanna mun anbukte ahi hi,” hong ci hi.