42
Biakinnpi Hui a Inn Niite
1 Tua zawkciang tua pa in suum puanung sungah hong tumpui a Biakinnpi saksang ah hong paipui hi, tuaciang Biakinnpi saksang ah a om inn khat ah hong paipui hi, tua inn sia Biakinnpi nitumna sang a mong ah a om inn taw kikhuala ngawl hi.
2 Hi inn sia metre 50 sau a, metre 25 zai hi.
3 Inn pangh khat in Biakinnpi dung ah a om metre 10 a zai mun awng sia maingat a, a pangh khat in suum puanung ah suang kipha lam sia maingat hi. Tua inn sia dawl thum in kivawt a, a tung dawlte sim sia a nuaidawl sangin nungsang neak zaw in kivawt hi.
4 Hi inn ii saksang pangh dungah metre 5 a zai, metre 50 a sau lamzin khat le sung tumna kongte om hi.
5 A dawl tungnung inndoite sia a lai le a nuaidawl a omte sangin ciak zaw hi, banghang ziam cile a nungsang neak zaw in a kivawt hang ahi hi.
6 A dawl thum sung theampo ah a inndoite sia, a cialte tungah om a, suum sungah a om inn dangte bangin khuam nei ngawl hi.
7-8 A nuaidawl ah inn puanung pang sia metre 225 pha a, a sauna ii lang ahi hi; a taanglai metre 25 sungah inndoite om hi. A dawl tungbel ah innpi a dung sauna bup zui in a sungah inndoite om hi.
9-10 Hi inndoite nii nuai, nisuana sang inn mong, suumsung pang kipatna munah, suum puanung tumna kongkha khat om hi, Biakinnpi thang sangah Biakinnpi nitumna mong, innpi taw a kikhuala ngawlna ah a kibang linlian inn khat om hi.
11 Inndoite mai ah saksang a om sia taw a kibang lamzin khat om hi. A zaina le a sauna kikim a, a vawtzia le sung tumnate zongh kibang hi.
12 A inn ii thangsang nisuana mong, a pang kipatna inndoite nuai ah kongkha khat om hi.
13 Tua pa in keima tungah hong ci hi, “Hi innte ngeal thiangtho hi. A sungsang Topa ompuina ah a tum thiampite in a thiangthobel biakpiakna ante ne uh hi. A inndoite thiangtho ahi manin thiampite in a thiangthobel biakpiaknate: antang biakpiaknate, mawna hang sangaw biakpiaknate, ahibuale mawphel biakpiaknate tua munah koi tu uh hi.
14 Thiampite in Biakinnpi sung a tum zawkciang le a suum puanung ah a pai nop ciang, hi inndoite sungah Topa atu na a sep laitak, a silh puan thiangthote a nusiat kul hi. Ama te sia mipite kikhop na ah a pai ma in puan dang a sil uh kul tu hi”.
Biakinnpi Mun Teena A Phakza
15 Biakinnpi mun sung teng tua pa in a tee zawkciang, ama in nisuana kongpi pan hong pusua pui a, a mun puasang teng tee hi.
16 Ama in piciang la in, nisuana sang teng tee a, metre 250 pha hi.
17-19 Tua zawkciang ama in saksang, thangsang le nitumna sang teng tee a; a sauna kibangin metre 250 tek pha hi,
20 tuabangin a pang ii lang le lang ah a pangh li teng a kikim, pangh khat in metre 250 a pha khat tek uum hi. Tua pang sia a thiangtho mun le a thiangtho ngawl mun a kidaakna hi.