40
Mailam Biakinnpi Mukholna
Jerusalem ah Ezekiel Kipaipui
1 Tua hun sia ih sal tan zawk kum kul le kum nga kum, Jerusalem khua a kilaak zawk kum sawm le kum lina kumthak ni sawm ni hi. Tua ni in Topa ii nasia tak hong ompui hunlam ka phawk a, ama in mundang ah hong paipui hi.
2 Mu kholna khat sungah Pathian in Israel ngam sungah hong paipui a, mualsaang khat tungah hong koi hi. Ka mai ah khuapi khat taw a kibang inn honkhat ka mu hi. Ref 40:2 Tpl 21:10
3 Ama in a nai zaw in hong neaksak a, tuaciang taau bangin a taang mihing khat ka mu hi. Ama in puanneal pikhau khat le piciang khat toai in kongpi hui khat ah ding hi. Ref 40:3 Tpl 11:1; 21:15
4 Ama in “A thithei mihing awng, en in. Pha takin hong ngai ta'n a kong lak na theampo nasia takin kin vawt in, banghang ziam cile nang sia hi thu huvau in hi sungah hong kipuak hi. Na mu theampo Israel mite tungah na son tu ahi hi,” kei tungah hong ci hi.
Nisuana Kongpi
5 Ka mu sia Biakinnpi hi a, a kiimkot ah luphung khat om hi. Tua pa in metre thum a sau ama piciang la in tua luphung tee hi. Tua sia metre thum saang a, metre thum saa hi. Ref 40:5—42:20 1 Kum 6:1-38; 2 Khang 3:1-9
6 Tua zawkciang nisuana sang a maingat kongpi vangah ama pai hi. Keallei tungah ama kaato in a dawn ah a tumna tee a; metre thum thuk hi.
7 Tua ngal khat ah lamzin khat om a, a cingte inndoi thum veu a lang veve ah om hi. Tua inndoite in a kikim king li tek nei a, a pangh sia metre thum veu sau hi, a inndoite kilaklaw pangte metre nii le lang saa hi. A cingte inndoite ngal ah metre thum a sau lamzin khat om a, Biakinnpi a maingat sungtanna inndoi paina ahi hi.
8-9 Ama in hi inndoi tee a, metre lithuk hi. Tua inndoi sia Biakinnpi taw a kinaibel kongpi vang tawpna hi a, a mongbel ah pangte sia metre khat saa hi.
10 Hi a cingte inndoi lamzin lang le lang ah a omte sia a letna kikim linlian siat a, a kilaklaw pangte zongh a saana kibang siat hi.
11 Tua zawkciang tua pa in kongpi vang sung lamzin ii zaina tee hi. Tuasia a kingawm in metre luk le lang pha a, a kihong kongpite kilaklaw sia metre nga pha hi.
12 A cingte inndoi sim ii mai ah pang a niam, centimetre sawm nga a saang le centimetre sawm nga a saa khat om hi. A inndoi kiimkot pangte ii pangh khat sia metre thum veu pha hi.
13 Tua zawkciang, inndoi khat ii a nung pang pan a langkhat lamzin kaantan in inndoi ii nungsang pang dong ama in tee a, metre sawm le nii le a lang pha hi.
14 Inndoi mong khakbel sia suumsung paina hi. Tua inndoi sia ama in tee a, metre sawm zai hi.
15 Kongpi vang sauna sia a puasang pang pan a khakbel inndoi ii pangh dong sia a kingawm in metre kul le nga sau hi.
16 Pusuana suazoai note sia a inndoi theampo ii a puasang pangte sung le inndoite kilaklaw a sungsang pangte zongh ah om siat hi. Lamzin a maingat a sungsang pangte tungah palm kung limte kisuai hi.
A Suum Puanung
17 Tua pa in suum puanung ah kongpi vang zui in hong paipui hi. Tua munah a puasang pangte nealin inndoi sawmthum kivawt a, tuate mai ah suang kipha hi,
18 suum puanung kiimkot dongah kipha hi. Hi suum puanung sia suum sungnung sangin niam zaw hi.
19 A suumsung nung pai natu in kongpi vang khat a saang zawna munah om hi. Tua pa in kongpi vangte nii kilaklaw pitee a, metre 50 kikhuala hi.
Saksang Kongpi
20 Tua zawkciang tua pa in suum puanung paina a saksang kongpi vang tee hi.
21 A cinna inndoi thum, lamzin lang le lang ah a omte, a kilaklaw a om pangte le sungtanna inndoi theampo sia nisuana kongpivang sang a omte bang linlian veu ahi hi. Kongpivang ii sauna bup sia metre 25 hi a, a zaina sia metre 12.5 hi.
22 Sungtanna innkhan, khelkite le palm lim kisuaite sia nisuana kongpi ah a omte taw kibang hi. Kongpi dong kal sali kisuan a, sungtanna inndoi sia suumsung sang maingat in a mong ah om hi.
23 Suumsung langkhat ah hi a saksang kongpi vang pan suum sungnung paina a dang kongpi vang khat om a, nisuana sangah a omte bangma ahi hi. Tua pa in kongpivangte nii kilaklaw tee a, metre 50 pha hi.
Thangsang Kongpi
24 Tua zawkciang tua pa in thang sangah hong paipui a, tua munah kongpivang dang khat ka mu uh hi. Ama in a sungsang pangte le a sungtanna inndoi tee a, a dangte taw ma kikim hi.
25 Hi kongpivang ii inndoite sungah a dangte sung bangma in khelkite om hi. Kongpivang ii sauna a vekpi metre 25 pha a, metre 12.5 zai hi.
26 Kal sali suan ciang kongpivang kitheng a, sungtanna inndoi zongh suumsung maingatin a mong ah om hi. Pusuana lampi a maingat a sungnung pangte tungah palm kungte lim kisuai hi.
27 Hi lai zongh ah suum sungnung paina kongpivang om hi. Tua pa in hi a niina kongpi dong tee a, metre 50 pha hi.
Suum Sungnung: Thangsang Kongpi
28 Tua pa in thangsang kongpivang kaantan in suum sungnung ah hong tumpui hi. Ama in kongpi vang tee a, a puasang pangh ah a om kongpivangte taw kikim hi.
29-30 A cingte inndoi, sungtanna inndoi le a sungnung pangte sia a dang kongpivangte ah a omte taw kibang hi. Hi kongpivang ii inndoite ah khelkite zongh om hi. A sauna bup sia metre 25 hi a, metre 12.5 zai hi.
31 Sungtanna inndoi sia suumsung dang khat sang nga a, palm kung limte sia lamzin dung pangte tungah kisuai hi. Hi kongpi dong kal liat kisuan hi.
Suum Sungnung: Nisuana Kongpi
32 Tua pa in nisuana kongpivang zui in suum sungnung ah hong tumpui hi. Ama in kongpi tee a, a dangte taw kikim hi.
33 A cingte innkhan, sungtanna inndoi le a sungnung pangte sia a dang kongpivang ah a omte taw kikim hi. A kiimkot khelki om kawkoai a, sung tumna inndoi sung zongh ah om hi. A sauna vekpi sia metre 25 hi a, metre 12.5 zai hi.
34 Sungtanna inndoi in suum puanung maingat hi. Palm limte sia lamzin dung pangte tungah kisuai hi. Hi kongpi dong kal liat kisuan hi.
Suum Sungnung: Saksang Kongpi
35 Tua zawkciang tua pa in saksang kongpivang ah hong paipui hi. Ama in tuasia tee a, a dangte taw in kikim hi.
36 Tuate bangma in tuasia in a cingte inndoite, a kizeam sungnung pangte, sungtanna inndoi le a kiimkot theampo ah khelkite nei hi. A sauna vekpi sia metre 25 hi a, a zaina sia metre 12.5 ahi hi.
37 Sungtanna inndoi in a suum puanung maingat hi. Palm kungte lim lamzin dung pangte tungah kisuai hi. Hi kongpi dong kal liat pha hi.
Saksang Kongpi Nai ah a om Innte
38 Suum puanung ah saksang sungnung kongpi vang taw kipee in a kipeam inndoi khat om hi. Suum sung a maingat sungtanna inndoi dong kihong a, tualai ah sangaw biakpiakna in a kihal tu nganhing luangte amate in tui taw sil uh hi.
39 Hi sungtanna inndoi sungah sabuai li om a, a lang le lang ah ni veve kikoi hi. Hi sabuaite tungah amate in sangaw biakpiakna in a nei nganhingte, a pum bupin kihal tu ahizong mawna le khialna hang a biakna ah piak tu nganhingte ahizong ngo uh hi.
40 Inndoi pua sangah a kibang sabuai li om a, saksang kongpi tumna lang le lang ah nii veve kikoi hi.
41 Biakpiakna nganhingte a tungah a kingawlup thei natu in a vekpi in sabuai liat om a: sabuai li sia a inndoi sung sangah a dang li sia a suum pua ah om hi.
42 Innpeam sungah a om pum bup meihal biakpiakna vawt natu in a kizangh sabuai li te sia a ki attan suangtum taw a kivawt ahi hi. Tuate sia centimetre 50 saang a, a dawn kiimkot a kikim pangh li te sia centimetre 25 veu pha hi. Sangaw biakpiakna ah ngan ngawna a zak vanh teng tua sabuaite tungah kikeam hi.
43 Sabuaite mong kiimkot ah millimetre 25 a zai khinte a paisuak in om hi. Sabuaite tungah biakpiakna nganhing sate theampo kikoi hi.
44 Tua zawkciang ama in a suum sungnung ah hong tumpui hi. Suum sungnung sangah a nga inndoi nii om a, khat in saksang kongpivang hui pan thangsang maingat a, khat in thangsang kongpivang hui pan saksang maingat hi.
45 Tua pa in thangsang a nga inndoi sia Biakinnpi ah a seam thiampite atu hi a,
46 saksang a nga inndoi sia biaknatau ah a seam thiampite atu hi hong ci hi. Thiampi theampo sia Zadok ii suan le paalte hi a; amate sia Topa omna munah ama naseam tu in a kipaisak Levi minamte bek ahi uh hi.
Suum Sungnung le Biakinnpi
47 Tua pa in suum sungnung tee a, a pangh li khat simin metre 50 veu pha hi. Nitumna sangah Biakinnpi om a, tua ii mai ah biaknatau om hi.
48 Tua zawkciang ama in Biakinnpi sung tumna inndoi ah kei hong tumpui hi. Sungtanna teng ama in tee a; metre 2.5 thuk a, metre zai in, metre 6.5 a saa pangte a lang le lang ah om hi.
49 Sungtanna inndoi sia metre 10 zai in, metre 6 thuk a, tua mun thet natu in keallei kithung hi. A sung tumna a lang le a lang ah khuam khat veve om hi.