33
Pathian in Ezekiel Ngalvil nasep pia
(Ezekiel 3:16-21)
1 Topa in keima hong paupui hi.
2 Ama in, “A thithei mihing awng, ngam khat tungah ngal ka thetsak ciang bang suak tu ci thu na mite son in. Tua ngammite in amate sung pan ngalvil tu khat teal uh hi.
3 Ngalte hong nai a mu ciang a kidop thei natu in ama in patau daak tum hi.
4 Tua sia za napi khat po in awlmawk ngawl a, ngalte hong pai in ama a that le ama ii thina sia ama ii mawna ahi hi.
5 Ama khialna hu in ama thi hi, banghang ziam cile a kidop natu patau daak sia thusim ngawl hi. Thusim hi ka pole ama suakta tu hi.
6 Ahizong ngalvilpa in ngalte hong pai mu napi, patau daak a tum buale ngalte hong pai in tua mawneite that tu uh hi, ahihang mawneite thina sia ngalvilpa ka mawsak tu hi.
7 “Tu in, a thithei mihing awng, nang Israel minam ii ngalvilpa in kong koi hi. Nang tungah kidop natu thu kong piak pawpo sia amate zasak sawn tu ni hi.
8 Mihing ngilo khat a thi tu in ka taangko a, ahizong a nuntakna a ngup thei natu a ngamtatna kikhealin a kidop natu na son bua ahile, ama sia mimaw khat ma in a thi tu hi, tuaciang ama ii thina sia nang hang a hi tu hi.
9 Mihing ngilo khat kidop natu thu na son a, ahihang a mawna kheal ngawlin mimaw khat ma in thi tu hi, ahihang nang nuntakna hong kikhoaikhe tu hi.
Mi sim ii sep tu Vaipuak
10 Topa in keima hong paupui hi. Ama in, “A thithei mihing awng, Israel te tungah amate ci teng son kik in: ‘Eite ii ih vawtsa ih mawna le ih khialna vanhngit te ih pua hi. Ih tha bo hi, bangbang nungta thei tu hi ziam?’
11 Amate tungah son in a, Keima, Vaanglianpipa Topa in a nungta takpi Pathian ka hi bangma in, mawnei te a thi ka mu sia lungdamin ka nei bua hi. A mawna kikheal in a nuntak tu ka dei zaw hi. Israel awng, na tatsiatna pan kheal in. Banghang thi nuam ni ziam?
12 “A thithei mihing awng, tu in Israel te tungah mihing pha khat in mawna khialna a vawt le a pha a sepnate in ama ngum zo ngawl tu hi. Mi ngilo khat in siatna a vawt nawn buale ama daan kipia ngawl tu a, mipha khat in mawna vawt tu a kipan le a nuntakna kikhoaikhe ngawl tu hi.
13 Mipha khat po tungah nuntakna kamciam pia thei khi hi, ahihang ama in a pha a vawt sate kicing zo sa in, mawna a vawt le phatna a vawt sate peuma ka tepteesak nawn buatu hi. A mawnate hu in ama thi tu hi.
14 Mi ngilo khat po thi tu hi ci in a kidop natu sonkhol zo ka hihang, ama in mawna vawt nawn ngawlin a maan le a pha nate a vawt le —
15 sonteena in, a sum pukthaak manin a laak vanhte pia kikin a nguk sa vanhte a pia kik le — mawna a vawt kheal in, nuntakna a pia thukhamte a zui le ama thi ngawl tu a, nungta tu hi.
16 A vawt sa mawna khialna te ka maisak tu a, a maan le a pha a vawtte hu in ama nungta tu hi.
17 “Tuaciang na mite in ka vawt sia maan ngawl hi hong ci hi! Hi ngawl hi, amate pai zia a maan ngawl hi zaw hi.
18 A thutang khat in a pha a vawt tawlnga in a sia a vawt le tua hu in ama thi tu hi.
19 Mi ngilo khat in a mawna kheal in, a maan le a pha a vawt le a nuntakna ngum zo hi.
20 Ahihang Israel te awng, ka vawt sate maan ngawl hi nong ci uh hi. Keima in na sepna bangin thu kong khen tu hi,” hong ci hi.
Jerusalem khua Bona Thu
21 Ih sal tan zawk kum sawm le kum nii kum a ni nga ni in, Jerusalem khua pan hong suakta khat in Jerusalem khuapi bo zo hi ci in hong son hi. Ref 33:21 2 Kum 25:3-10; Jer 39:2-8; 52:4-14
22 Ama hong pai ma a zei nitakin, Topa ii nasia takin hong ompui na ka phawk hi. A zing ciang zingsang in tua pa hong thet ciang, Topa in kampau theina vaang hong pia kik hi.
Mihingte Mawna Khialnate
23 Topa in kei hong paupui hi.
24 Ama in, “A thithei mihing awng, Israel ngam sungah a siacip sa khuapite sungah a teang mite in: ‘Abraham sia mihing khat bek hi a, ama tungah ngam bup kipia hi. Ei, mihing tam mama ih hiciang, tu in tua ngam sia eima ngam ahi hi,’ ci uh hi.
25 “Keima, Vaanglianpipa Topa ii ci teng amate son in: A chi thai ngawl lai sa na ne uh hi. Milimte na bia uh hi. Mihing na that uh hi. Hi leitang sia koma neisa hi ci in, bang in hong ngaisunsak ziam?
26 Na namsaute suang nu hi. Na ngamtatna uh thasiathuai hi. Mihing theampo in palngul mawna vawt nu hi. Hi leitang sia noma neisa hi ci in, bang in hong ngaisunsak ziam?
27 “Keima, Vaanglianpipa Topa in a nungta takpi Pathian ka hi bangma in, tua khuapi siacip sate sungah a teang mihingte kithat tu hi ci in a kidop natu thu ka piak sia son in. Ngam sungah a teang teng sia ngamsate in ne tu hi. Mualtung le suanghawng sungah a buu te natna taw thi tu hi.
28 Keima in tua ngam sia a kinusia ngamtongta ka suaksak tu a, a kiphatsak pui a vaangletna bo tu hi. Israel mualte sia dui thukpui suak tu a, kuama in khualhaw in kaantan thei ngawl tu hi.
29 Mihingte a mawna a khialna te hu in daan ka piak ciang le a ngam sia ngamtongta ka suasak ciang Topa ka hi hunlam amate in hong he tu uh hi,” hong ci hi.
Kamsaangpa Thu puakna pan Thupiangte
30 Topa in, “A thithei mihing awng, na mite in khuapi uumna pang hui ahibuale a inn kongbiangte ah a kisik uh ciang nangma thu son tu uh hi. Amate khat le khat ‘Tu in Topa kung pan bang kammal hong suak ziam, pai in ngai tawng,’ kici uh hi.
31 Tua ahikom, ka mite na son tu thu a ngai tu in a hon in hong pai uh hi, ahihang seam tu na sawlte a seam bua uh hi. Ki itna kamthumte pau ahihang a duhop ngei ma in duhop veve lai uh hi.
32 Amate atu in nang sia tengtongh tum a, lawmla a sasa zindo khat bang lel na hi hi. Na kampau theampo hong ngai napi kam khat beak zongh hong ni ngawl hi.
33 Ahizong, na kampau theampo hong taangtun ciang — hong taangtung takpi tu a, tuasia ciang kamsaang khat amate sungah om ahi hunlam amate in he tu uh hi,” ci hi.