25
Ammon Langpanin Kamsaanna
1 Topa in kei hong paupui hi. Ref 25:1-7 Jer 49:1-6; Eze 21:28-32; Amo 1:13-15; Zep 2:8-11
2 Ama in, “A thithei mihing awng, Ammon ngam sonsia in.
3 Keima, Vaanglianpipa Topa ii ci teng hong ngai natu in va son tan: Ka Biakinnpi minpaan a na mu tu, Israel ngam a lalthapna na mu tu le Judah mite sal in a pai na mu tu lawp nu hi.
4 Tuabangin lawp na hi uh kom, nisuana sennealngam pan minamte in kong zothalsak tu hi. Amate in na ngam sungah ngiaphual hong saat tu a, tua munah teang tu uh hi. Noma neak tu noai le thingngate a ne tu uh hi.
5 Rabbah khuapi sia kalaoh khoaina mun ka suaksak tu a, Ammon ngam bup sia tuu khoaina mun ka suaksak tu hi, tuasia ciang Keima, Topa ka hi sia nong he tu uh hi.
6 Hi sia Vaanglianpipa Topa ii ci ahi hi: “Na khut beangin, lungdam in na kilawn uh hi. Israel ngam na zawngsak uh hi.
7 Tuabang na hi hu in minam dangte tungah kong aap tu a, amate in hong suttol in, hong phuulsak tu uh hi. Kong sucip tu a, ngam khat in na ding kik zo nawn buatu a, noma ngam na ci tu uh a om nawn buatu hi. Tuasia ciang Keima, Topa ka hi sia nong he tu uh hi.”
Moab Langpanin Kamsaanna
8 Vaanglianpipa Topa in, “Moab in Judah sia minam dangte theampo taw kibang hi a ci hu in, Ref 25:8-11 Is 15:1—16:14; 25:10-12; Jer 48:1-47; Amo 2:1-3; Zep 2:8-11
9 Moab ii ngamngi a cing khuapite ngual in ka simsak tu a, khuapi phabel teng — Beth Jeshimoth, Baal Meon le Kiriathaim te ngawngawn kihel tu uh hi.
10 Nisuana sennealngam minamte in Moab le Ammon te ka zothalsak tu hi, tuasia ciang Moab sia ngam khatin ding zo nawn ngawl tu hi.
11 Moab daan ka pia tu a, amate in Keima, Topa ka hi sia hong he tu uh hi,” ci hi.
Edom Langpanin Kamsaanna
12 Vaanglianpipa Topa in, “Edom mite in Judah tungah a tatkha phulamna nei a, tua phulamna in Edom tungah a kiphel thei ngawl mawna then hi. Ref 25:12-14 Is 34:5-7; 63:1-6; Jer 49:7-22; Eze 35:1-15; Amo 1:11-12; Oba 1-14; Mal 1:2-5
13 Tu in ka taangko na ah Edom daan ka pia tu a, tua munah mihing le nganhing theampo ka that tu hi. Teman khuapi pan Dedan khuapi dong lei awng thong ka suaksak tu a, a mite ngal sungah kithatlum tu uh hi.
14 Israel ka mite in kei atu in Edom tungah phulam tu a, tuaciang Edom sia ka thin uuk ka thinsona a phawksak tu uh hi. Kei ii phulamna a thuakte bangbang ziam ci sia Edom in he tu hi,”ci hi. Vaanglianpipa Topa in son zo hi.
Philistia Langpanin Kamsaanna
15 Vaanglianpipa Topa in, “Philistine te in a taangh ngalte tungah tatsia takin phula a, ngaimawkna taw susia uh hi. Ref 25:15-17 Is 14:29-31; Jer 47:1-7; Jol 3:4-8; Amo 1:6-8; Zep 2:4-7; Zec 9:5-7
16 Tua ahikom Philistine ka sim tu a ka maaimot tu hi, ci in ka taangko hi. Philistine Zaangtam ah a nungta lai theampo ka lalcipsak tu hi.
17 Amate nasia takin daan ka pia tu a, a kicing phulamna ka nei tu hi. Amate in ka thin uukna phawk tu uh hi. Tuasia ciang Keima, Topa ka hi sia he tu uh hi,” ci hi.