23
Mawnei Unau Numeite
1 Topa in kei hong paupui hi.
2 Ama in, “A thithei mihing awng, khatvei lai in numei unau nii om hi.
3 A khanmoi lai in Egypt ngam ah ngaknu thiangtho a hina bosua a, pumpi zuakte suak uh hi.
4 A u zaw ii min sia Oholah ama sia Samaria taang hi, tuaciang a nau zaw sia Oholibah (ama sia Jerusalem taang) hi. A nii in ka teenpui a, amate in tate hong hinpui uh hi.
5 Oholah sia keima aa hi napi a pumpi zuak ma seam suakin Assyria pan a lawmpate taw omkhop tu lungngul mama hi
6 Amate sia puan sandup a kibang a silh ngalkapte, kumpi uliante le za neite hi a; a vekpi in a mealhoi siphu ngalkap bute ahi uh hi.
7 Ama sia Assyria uliante theampo ii zak pumpi zuak nu hi a, ama ii sikvilna in Assyria milimte a biak dongin ama le ama a kininsak hi.
8 Egypt ngam ah ngaknu thiangtho a hina bosua a, pumpi zuak khat in a kipat sia zom suak lai hi. A ngaknutno lai pan ma in, pate in luppui a, pumpi zuak khat bangma in a zak sa ahi hi.
9 Tua ahikom a dei mama Assyria a lawmpate tungah ama ka aap hi.
10 Amate in a puan suutsakin a pumnguak a koi zawkciang, a tapate le a tanute matsakin ama sia namsau taw thatlum uh hi. Mun theampo ah numeite in tua nu ii thuakna teng nawnsem uh hi.
11 “A suapuinu Oholibah in mu ahihang ama sia Oholah sangin zongh khai zaw a, pumpi zuak hi kaan zaw hi.
12 Tuanu zongh Assyria nampite, min nei za neite — a tee sitset puansilh kibang a silh ngalkapte — siphu ngalkap bute le a mealhoi khangmoite theampo atu in sikvil loklenna taw kidim hi.
13 Ama sia paktat cip a, a nii uh ma, a sia in ka mu hi.
14-15 “Ama sia paktatna sungah a thuksuk vaial in kidia hi. Ama sia Babylon uliante ii limte pang tungah kingelh a, a san sitset dialno khat a kawng ah sawm in, a lu tungah a kizeam dialkhipte in a thin khoi mama hi.
16 Ama in tua limte a mu po ciang uukna taw kidim a, Babylon ah kamtai te paisak hi.
17 Babylon te sia ama taw omkhawm tu in hong pai uh hi. Amate in ama nasia zak mama in, niinsak ngawp ahikom a khakbel ciang ama in thasiathuai sa hi.
18 Ama le ama sia mipi mai ah kipholaak in pumpi zuak nu a hina a kuama theampo in hesak hi. A suapuinu kiihuai ka sak za ma in ama zongh kiihuai ka sa hi.
19 Ama sia a khai zaw seseam pumpi zuak khat hong suak a, a ngaknutno lai Egypt ngam ah pumpi zuak ahi bangma in om suak hi.
20 Ama in siphu ahibuale laa tal te lanna taw a kidim pasalte taw omkhop tu lungngul hi.”
21 Oholibah awng, Egypt ngam ah na ngaknutno lai in na paktat nate, pasalte ii na noai hong sawsak a, ngaknut thianthona bosua a na tat bangin na paktat kik nuam hi.
A Naunu tungah Pathian Thukhenna
22 “Tu ahile Oholibah awng, hisia Keima, Vaanglianpipa Topa ii nang tungah kong ci teng hi. Tua na lawmpate sia cimtak zo ni hi, ahihang nang tungah amate kong thin uuksak tu a, nang hong kiim uum tu in kong paipui tu hi.
23 Babylon te le Chaldean te theampo, Pekod, Shoa, Koa le Assyria pasalte theampo kong paipui tu hi. Tua mealhoi namlian khangnote le zaliante, a thupi ulian theampo le a zalian siphu ngalkap bute kong khawmtua uh hi.
24 Amate in siphu ngalleang le vanh puakna leangte kengin ngalkaphonpi khat taw saksang pan hong sim tu uh hi. Lum le thik lukhu taw kidalin nang hong kiim uum tu hi. Nang sia amate tungah kong aap tu a, amate ii thukham te taw thu hong khen tu hi.
25 Nang tungah thin uuk ka hikom amate zongh a thin uukna taw diangsak tu khi hi. Na naak le na bilte hong at tansak tu a, na tate hong thalupsak tu hi. Hi hi, na tapate na tanute na kung pan la in a hingtangin hal tu hi.
26 Na puansilh lai hong laaikeaksak tu a, na suangmanphate hong laaksak tu uh hi.
27 Egypt ngam ah na om lai pan kipan na sikvil na loklenna te le a maizumhuai na ngamtatnate kong khealsak tu hi. Milimte na en nawn buatu a, Egypt ngam na lungngul nawn buatu hi.”
28 Hisia Vaanglianpipa Topa ii ci ahi hi: “Na ngaimawk le kiihuai na sak mite khut sungah nang kong aap tu hi.
29 Tuaciang amate in nang hong ensan ahikom, na thalaw sa theampo hong laaksak tu a, tuaciang na puan hong suutsakin pumpi zuak khat bangin hong pholaak tu hi. Na sikvilna le na pumpi zuakna in
30 hi teng na tungah hong tungsak hi. Nang sia ngam tuatuam te a tu pumpi zuak na hi a, milimte taw nangma le nangma na kininsak zo hi.
31 Na suapuinu ii khuani teng ma zui na hikom, daan piakna hai a kibangin kong dawnsak tu hi”.
32 Vaanglianpipa Topa in,
“Na suapuinu hai panin na dawn tu hi;
tua hai sia lian in thuk hi.
Mihing theampo in
hong maisiat in,
hong nunau tu hi;
tua hai sia dim hi.
33 Nang hong lungmangsak tu a, hong luvaisak tu hi.
Tua kiitakna le lalna hai sia
na suapuinu Samaria ii hai ahi hi.
34 Na dawn tu a na dawnkang tu hi,
tua hai tamhbekte taw na noai na at tu hi.
Vaanglianpipa Topa in ka son zo hi,” ci hi.
35 Tu in hisia Vaanglianpipa Topa ii ci ahi hi: “Kei hong mangil in hong nungngat na hi ciang na sikvilna le na pumpi zuakna hu in ngim na thuak tu hi.”
Unau Numei Niite tungah Pathian Thukhenna
36 Topa in kei tungah, “A thithei mihing awng, Oholah le Oholibah tungah thukhen tu in na kinging ziam? A kiihuai a ngamtatna te taw amate mawsiat in,
37 Amate in palngul mawna le mihing thana vawt zo hi — palngul mawna sia milimte taw vawt a, kei a tu a hin tapate thatlum hi. Ka tapate milim biakpiakna in hong neisak hi.
38 Tua teng bek vawt ngawl hi. Ka Biakinnpi ninsakin, ka piansak sa Sabbath sia paltan uh hi.
39 Ka tate milim biakpiakna in a thalup ni mama in ka Biakinnpi ah hong pai in ninsak uh hi!
40 “Amate in ngam khualana ah a om pasalte tungah kamtaite pehialin paisak kikikin samsak uh a, amate hong pai tek hi. Unau numeite nii in kibual in mitkhu vom za kinoai in suangmanphate taw kizeam uh hi.
41 Amate tokhum hoi khat tungah to in, a mai ah sabuai khat dim a koi naphate sungah ngimnamtui le olive thau ka piakte zongh koikhawm uh hi.
42 Sennealngam panin hong kipaipui pasal honkhat ahi bangma thinngimna a nei ngawl mihon khat ii aw kiza thei hi. Amate in numeite ii baan ah haak bulsakin a lu tungah a hoi kumpi lukhute a khusak uh hi.
43 Keima le keima ka kici na ah, palngul mawna taw a tul sa numei khat sia pumpi zuak te bangin zangh hi ta a, ka ci hi.
44 Amate in hi pumpi zuakte kungah pai kikik uh hi. Amate in tua a paktat Oholah le Oholibah te kung zuan kikik uh hi.
45 Mihing thutang te in amate sia palngul mawna le mihing thana vawt nu hi ci in a ningkhiin tu uh hi, banghang ziam cile palngul mawna vawt in a khut uh chisan baang hi.”
46 Hisia in Vaanglianpipa Topa ii ci ahi hi: “A lausak tu le a suttol tu in a ngilo nuam honkhat hong paipui tavun.
47 Tua mi ngilote in suang taw deang tahen a, a namsaute taw simin a tate thalupsakin, a innte haltumsak tahen.
48 Amate paktat ngamtat bang palngul mawna vawt ngawlin numei a minpiang ii a kidop thei natu in ngamsung teng ah paktat nate ka khealsak tu hi.
49 Tuaciang no unau numei niite — noma paktatna le milim biakna mawnate hu in daan kong pia tu hi. Tuasia ciang Keima sia Vaanglianpipa Topa ka hi hunlam nong he tu uh hi.”