2
1 Tuaciang aw khat ka za a, “A thithei mihing awng, ding in. Nang hong paupui nuam khi hi,” hong ci hi.
2 Tua aw ii pau laitakin Pathian ii thaa ka sungah hong tum a, hong phong in ka peang taw ka dingto hi; tuaciang tua aw in,
3 “A thithei mihing awng, Israel mite kungah kong puak tu hi. Amate in hong langpan a, a taanghpupite bangma in hong langpanin tualngalte suak lai uh hi.
4 Amate a thinpui in kei hong zakta bua uh hi, tua ahikom keima Vaanglianpipa Topa in amate tungah ka cinopte a son tu in nang kong puak hi.
5 Tua tualngalte in nang thu hong ngai zong hong ngai bua zong, amate sungah kamsaang khat om ci sia he tu uh hi.
6 “Ahihang a thithei mihing awng, amate ahizong, amate hong ci pawpo ahizong, na kiita bua het tu hi. Amate in nang hong nalh in hong zawngsak tu hi; aikam hon kawm a teen bang hi tu hi. Tuabang ahihang tua tualngalte ahizong, amate ii cite ahizong kiita peang heak in.
7 Amate in hong ngai zong hong ngai bua zong son tu a kong sawl babang na son tu hi. Amate sia bangbang tualngalte ziam cisia ciamtee ta'n.
8 “A thithei mihing awng, kong sonte hong ngai ta'n. Amate bangin tualngal suak heak in. Na kam kaa in a, kong piak tu sia ne ta'n,” a ci sia ka za thua lai hi.
9 Khut khat kei sang hong kithaak ka mu a, laizial khat a toai hi.
10 Tua khut in tua laizial sia phalh a, tuaciang a lang le lang ah lai ki at te — khuangai a kaana te le mauna taunate a ki at ka mu hi. Ref 2:9-10 Tpl. 5:1