19
Khuangai La
1 Israel te kumpi tapate nii atu in hi khuangai lasa tu in Topa in kei hong sawl hi:
2 Na nu uh sia tawpipui bangza ma a hi bua ziam!
Ama in a note sia a kiitakhuai tawpi talte kawm ah khangsak hi.
3 A no khat khangsakin savaizia hil hi;
mihingte ii sa a ne thei khat suak hi.
4 Minamte in a thu za in, vuum taw a sia uh hi.
Thikkoai zum te taw ama sia Egypt ngam ah kaikeak uh hi.
5 Tua nu in a lametna a bo dong ngak hi.
Tua zawkciang a no dangkhat khangsak leleau a,
tuasia a kiitakhuai tawpi tal khat suak hi.
6 Hong khanthin tak ciang,
tawpi dangte taw kithawlin vak hi.
Ama zongh sa vai thei in mihing te sa ne hi.
7 Ama in kulhte susia in khua te lalcipsak hi.
Ama a hawk simin ngamsung mite lau mama uh hi.
8 Minamte in ama do tu in mun tuatuam pan pai in kikhawm uh hi; mun theampo pan mite hong pai uh hi.
Amate in a sa siana ngeen hong phalh a,
tua thaang sungah ama man uh hi.
9 Bawm khat sungah khumin
Babylon kumpipa kungah paipui uh hi.
Amate in a hawk a kizaak kik ngei nawn ngawl natu in
Israel mualte tungah cing uh hi.
10 Na nu sia luihui ah a kisuan
sapitkung khat taw kibang hi.
Tui tam ahikom, a kung sia tee le nga taw kidim hi.
11 A baakte sia takin kho a, kumpi ciangkhut te a suak tu in hong khang hi.
A kung in meeikaai ban tu za ma a saangin khangto a;
a kuama po in bangza saang a, a tee boai ziam cisia mu uh hi.
12 Ahihang a thin uuk khutte in a zung pan longhto in lei ah vawk uh hi.
Nisuana vui in a ngate kosak hi.
A baakte kithiaktan a; ko in kihaltum hi.
13 Tu in tua sia sennealngamsung
tui om ngawlna lei kona ah kisuan hi.
14 A kung zikpi sia
mei in kaangh a;
a baakte le a ngate
kaanghtum hi.
A baakte bangma hunin takin kho kik ngeingawl tu a,
kumpi ciangkhut suak ngeingawl tu hi.
Hi sia khuangai la hi a; a kisa kikik la ahi hi.