12
Kamsaangpa Ngaltai khat bang
1 Topa in kei hong paupui hi.
2 Ama in, “A thithei mihing awng, nang sia tualngal thin neite sungah teang ni hi. Amate in mit nei ahihang khuamu ngawl uh hi; bil nei ahihang khua za ngawl uh hi, banghang ziam cile amate in tualngal thin a nei hang ahi hi.
3 “Tu in, a thithei mihing awng, ngaltai khat ii vawt tu bangin vanh khat heang in khuazin ma in ding in. Mun khat nusia in mundang khat na zot sia a kuama theampo in musak in. Tua hile a langpante in nang hong phawk tha tu hi.
4 Amate in nang hong mu thei natu in, khuavak lai in saltaang tu bangin na vanh heang in, tuaciangin saltaang tu bangin nitak a na din sia ensak in.
5 Amate in hong etcik laitakin, na inn pang tungah a hawng khat vutlet in, na vanh sia tuasung panin la keak in.
6 Na vanhte na liangko ah kisuanhin, na pai natu lampi na mu thei ngawl natu in na mit sawm in, khuazing sungah na pai sia musak in. Na vawt teng sia Israel te kidop natu hi tu hi,” hong ci hi.
7 Topa ii vawt a hong sawl teng ka vawt hi. Tua ni in ngaltai tu khat bangin ka vanhte ka heang hi. Tua nitak khuazin ciang, ka khut taw pang hawng khat ka vut a, ka pusuak hi. Mihing theampo mu tangin ka liangko ah ka vanh kisuanhin ka ding hi.
8 A zingsang ciang Topa in kei hong paupui hi.
9 Ama in “A thithei mihing awng, tu in Israel tualngalte in bang vawt ni ziam ci in nang hong dongh tu hi.
10 Vaanglianpipa Topa, Keima ii amate tungah ka ci teng son in. Hi kam vaithak sia Jerusalem a uk kumpipa le tua munah a teangte theampo atu ahi hi.
11 Na vawt teng sia amate tungah a piang tu thute limlakna ahi sia va son ta'n — amate sia ngaltaite le ngalmatte hi tu hi.
12 Amate kumpipa in khuazing sungah a liangko ah a vanh pua in, ama atu a kitolet panghawng panin a suakta tu hi. Ama in a mit hong sawm tu a, a pai natu mun a mu buatu hi.
13 Ahihang ka ngeen ka phalh tu a, a sungah ama ka awksak tu hi. Tua zawkciang ama sia Babylon khuapi ah ka paipui tu a, tua khuapi mu ngawlin a thi tu hi.
14 A zum naseppuite, ngaisutna a piate le ama a cingte theampo, mun theampo ah ka thethaang tu a, mihingte in thalup tu in amate zong tu uh hi.
15 “A dang minamte sung le ngamdang te ah ka thethaang tak ciang amate in Kei, Topa ka hi hunlam hong he tu uh hi.
16 Amate sungah tawmno khat sia ngal kidona, kialpi le natnate pan ka luhaisak tu hi, tuasia ciangin, tua mun minamte sungah amate in a ngamtatnate sia bangza in thasiathuai ci sia phawk tu a, Kei Topa ka hi hunlam hong tel tu uh hi,” hong ci hi.
A liing Kamsaangpa ii Limlakna
17 Topa in kei hong paupui hi.
18 Ama in, “A thithei mihing awng, an na neak ciang liing in a, tui na dawn ciang launa taw na ci ngawksak in.
19 A ngam ah a teang lai Jerusalem mite tungah Vaanglianpipa Topa ii kam vaithak sia hisia hi, ci in ngam bup ah son in: amate in an a neak uh ciangin a ci liing tu a, tui a dawn uh ciangin launa taw a ci ngawk tu uh hi. A ngam uh sia bangma om nawn ngawl dongin kithiak kilkel tu hi, banghang ziam cile tua munah a teang teng theampo in thukham a palsat hang ahi hi.
20 Tu laitak mihing a dim omna khuapite sia kilalcipsak tu a, tuaciangin a ngam sia duisung ngampa kisuaksak tu hi. Tuasia ciangin, amate in Kei Topa ka hi hunlam hong he tu uh hi,” hong ci hi.
A dei huai Paunak khat le A kidei ngawl Kam vaithak khat
21 Topa in kei hong paupui hi.
22 Ama in, “A thithei mihing awng, Israel mite in hi paunak; ‘Hunte papai a, thu a kison kholte taangtung ngawl hi,’ ci sia banghang lo kikik nuam hi tu ziam?
23 Tu in Kei Vaanglianpipa Topa in tuasia huvau ka ci nop sia amate munah son in. Tua paunak sia ka bosak tu hi. Tuasia Israel ah kison kikik ngawl tu hi. Tuasia sangin hi bang sonzaw in: a hun hong theng zo hi, sonkholnate hong taangtung tu hi!
24 “Israel mite sungah mukholna maan ngawl om nawn ngawl tu a, lam khialsak thei kamsaanna om nawn ngawl tu hi.
25 Keima Topa in amate tungah son tu khi hi, tuaciangin ka son babangin kiseam tu hi. Hai nawn ngawl tu hi. No tualngalte awng, noma nuntakna hun sungah na kingaisut khol tu kong sonte vawt tatak tu khi hi, kei hong son zo khi hi,” Vaanglianpipa Topa in kong ci hi.
26 Topa in kei tungah,
27 “A thithei mihing awng, Israel te in na mukholnate le kamsaannate sia maisang a khuala mama hun atu hi, ci in a ngaisun uh hi.
28 Tua ahikom, amate tungah va son ta'n, Keima, Vaanglianpipa Topa in hi bangin ci zo khi hi: Haisaang nawn ngawl tu hi. Ka sonsate kiseam tu hi. Kei, Vaanglianpipa Topa in son zo khi hi!” hong ci hi.