7
Nuntakna huvau Ngaisutna
1 Min phatna sia a manham paaknamtui sangin phazaw a, na thi ni sia na sua ni sangin phazaw hi. Ref 7:1 Pau 22:1
2 Khuangaina inn ah pai sia poai vawtna inn ah pai sangin phazaw hi, banghang ziam cile a nungta lai eite theampo thina in hong ngak nginge hi cisia hong phawksak hi.
3 Heena in nuina sang phazaw a; na mai hong khingsak tha tu ahitazong, na heakna khangsak hi.
4 Lungdamna thu a ngaisun tawntung mihing sia mihing mawmaw ahi hi. Mihing ciim khat in thina thu ngaisun hi.
5 Mihing mawmawte ii pokna la hong sak sangin mihing ciimte ii hong teih sia phazaw hi.
6 Mihing mawmaw khat a nui ciang, mei sungah lingkung hal puak vazak bang ahi hi. Bangma khiakna nei ngawl hi.
7 A ciim khat in mihing khat pawpo a theam ciang a mawmaw khat bangin ngamta na suak hi. Sumnguk na ne le na ngamtatzia lalsak, na hi hi.
8 Na khat pawpo ii a tawpna sia a kipatna sangin phazaw hi. Thin sauna sia kiphatsakna sangin phazaw hi.
9 Na thin tomna uk in; diksak ngawlna nei top tu sia mawmawthuai hi. Ref 7:9 Jas 1:19
10 “Oh! banghangin nidang in na theampo phazaw ziam?” ci in dongh peuma heak in. Tua in pil thudok hi ngawl hi.
11 Mihing nungta peuma sia a ciim tu kilawm a, tua in ngamhlua bangza in pha hi.
12 Sum in hong thin nopsak za in ciimna zongh in hong thinnuamsak hi. Ciimna in hong keamcing a, hisia in heakna ii phattuamna ahi hi.
13 Pathian ii sep sate ngaisun in. Pathian ii a koaisak sate akua in bangbangin maamsak thei tu ziam?
14 Nang atu in nate a dik a pha in a pian ciang lungdam in a, ngimna hong pai ciang phawk lel in: Pathian in lungdamna le ngimna pia khawm a; a zawkciang bang piang tu ci, na he ngei bua hi.
15 Ka nuntakna sia a luithawthong hi a, ahizong ka nuntak sungin thu theampo ka mu zo hi. Mihing khat sia pha napi thi a, a dang khat sia, sia napi nungta hi.
16 Tua ahikom pha lei heak in a, ciim lei heak in — banghangin nangma le nangma kithatlum tu ni ziam?
17 Ahizong ngilo lei heak in a, mawmaw lei heak in — banghangin na hun a tun ma in thi tu ni ziam?
18 Tua a leilam te ngeal pial in. Pathian na thasia le na ma vang tu hi.
19 Khuapi uk mihing sawmte ii khuapi khat atu a vawt thei sangin ciimna in mihing khat atu tam vawt zaw hi.
20 Leitung ah a maan bek seam tawntung in, khialna khat a vawt ngeingawl kuama om ngawl hi.
21 Mihingte ii thuson theampo ngai heak in — na naseampa ii hong sonsiatna za tha tu ni hi,
22 Nangma zongh in midangte tamvei mama na sonsiat sia kihe nginge ni hi.
23 Hite theampo ahile ahi ngawl khentel tu in ka ciimna ka zangh hi. A ciim tu ma in khensatna ka nei hi, ahizong kei ii hi zawk hi ngawl hi.
24 Nuntakna ii a khiakna akua in mu thei tu ziam? Tuasia eite atu in thuk lei a, heak tu in haksa lei hi.
25 Ahihang keima in pilna, thiamna heak natu in ka ki aap a, pilna mu in, thupiangte ahang ka heak natu, pil ngawlna sia bangza in ngitlo huai a mawmawthuai ziam ci thu ka heak natu in nasia takin ka hanciam hi.
26 Thina sangin a khaa zaw khat ka mu hi — tua in thaang taw a kibang numei ahi hi. Ama ii hong itna in ngeen bangin nang hong man tu a, ama hong koaina in thikkhau khat bangin nang hong heencip tu hi. Pathian ii deina bangin a ngamta sia in tuabang numei pial thei a, ahizong a khial sia, a thaang sungah awk hi.
27 Hi hi, hi thute ii a khiakna ka zawzon ciang tawtawm in ka mu hi. Thuthuk ngaisunpa in ci hi.
28 A khiakna dang ka zon hangin ka mu bua hi. Tulkhat sung pan ka zatak tu pasal khat ka mu thei a, ahizong numei khat zongh ka mu bua hi.
29 Hisia in ka sin theampo ahi hi: Pathian in eite a thumaan tu in hong vawt hi napi paulap tuatuam zongin eima le eima ih kikai awksak hi.