THUHILSYA
(Ecclesiastes)
Thuthuk ngaisunpa ii ngaisutna tam mama sia, a sia sang veu hi zaw bang hi a, thinkiam huai hi. Ahizong Lai Thiangtho sungah hi Thuhilsya laibu hong kihel ciang hi bang up laakna le a sia sang bek ngaisutnate ngawngawn a huam zo tu in Lai Thiangtho ii hong hil upna sia zai mama a hina thu hong kilanghsak hi. Mihing tam mama in hi Thuhilna laibu sia limlangh bangin zangh a, khuangaisutna a ki at Lai Thiangtho in Pathian sia lametna hong pia hi, ci in nuntakna ii a khiakna a thupi zaw in saan thiam theina piangsak hi.
1
Nuntakna sia Luithawthong hi
1 Hite sia David ii tapa Jerusalem kumpipa ahi Thuthuk ngaisunpa ii kammalte ahi hi.
2 Thuthuk ngaisunpa in a luithawthong, a luithawthong hi, ci hi. Nuntakna sia luithawthong, a vekpi luithawthong hi.
3 Na nuntak sungah naseam in na diang uh a, ahihang bang teng na lak tu om na ziam?
4 Khang khat piangin, khang khat bo hi, ahizong simlei sia a om ngei in om hi.
5 Ni suak kik lai in, tum kik lai a, a sua natu munah heak kikin suak kik leleau hi.
6 Vui zongh thang sangah vasuk, saksang ah vato, a kot a kotin va a, kipan kik nithi hi.
7 Ngun theampo tuipi sungah luangsuk a, ahihang tuipi dimleet tuan ngawl hi. Ngunte kipatna ah tuite heak kik a, tuaciang kipan kik leleau hi.
8 Na theampo in hong thinngimsak a, thinngimna sia kam taw son zawk hi ngawl hi. Ih mittang in a mu cim thei ngawl a, bil in a zaak cim ngeingawl hi.
9 A piang ngeisa tengma piang kikik tu hi. A kiseam ngeisa tengma kiseam kikik tu hi. Simleitung bup ah a thak bangma om ngawl hi.
10 Amate in, “En vun, hi sungah bang ziam maw a thak khat om hi!” ci uh hi. Hi ngawl hi, a piang ngeisa hi lel hi, ei sua ma pek a, a piang sa hi.
11 Hun bosa sung a thupiangte kuama in ciamtee ngawl a, tu le maisang kilaklaw hun sungah a piang thute kuama in ciamtee tuan ngawl tu hi.
Thuthuk ngaisunpa ii Sin sate
12 Kei, Thuthuk ngaisunpa sia Jerusalem ah Israel te kumpipa ka hi ngei hi.
13 Hi leitung ah a kiseam na theampo kantel in sin tong ci in tupna ka nei hi.
Pathian in eite tungah a ngimhuai haksatna hong pia hi.
14 Hi leitung ah a kiseam theampo ka mu zo a, a luithawthong vive hi ci in kong son hi. Tuasia in vuiva delkot taw kibang hi.
15 A koaite na maam thei bua a, a om ngawl nate na sim thei bua hi.
16 Keima le keima, “Mihing thupi khat ka suak zo a, ka mai ah Jerusalem a ukte sangin ka ciim zaw pek hi. Ciimna le heakna tatak tel ing,” ka kici hi. Ref 1:16 1 Kum 4:29-31
17 Heakna le mawmawtna, ciimna le thin apnate a kilamdanna kan tu in ka khensat hi. Ahihang vuiva del taw ka kiban tu sia ka he hi.
18 Ciim vaial leang thinngimna tam vaial a, heak vaial na in hong ngimsak vaial zawkan hi.