22
1 “Na Israel mipui khat ii khui ahibuale tuu sia suakta in a tai laitak na mu le en thong heak in a; a nei pa kungah paipui kik in.
2 Ahizong a neipa a teenna khuala a, a neipa na he buale na inn ah ciapui in. A neipa hong pai in hong kat ciang pia in.
3 Na Israel mipui ii a laa, a puan ahibuale a bosua na khat pawpo na mu uh le tuabang ma in vawt vun.
4 “Israel na mipui khat ii laa ahibuale a khui a puk le en thong heak in a; a neipa na huna in phongto kik in. Ref 22:1-4 Pu 23:4-5
5 “Numeite in pate puan silh ngawl tu a, pate in numeite puan silh ngawl tu hi; Topa na Pathian in tuabang a silhte ngaimaw hi.
6 “Thingkung tung ahibuale lei ah vacim bu khat nangma in mu luilam in, a pui sia a tuuite op a, ahibuale a note uapin a om le a pui laaksak heak in.
7 Vacim note ahile la thei ni hi, ahihang nuamsa in na khansau natu in a pui tha nanak tu ni hi.
8 “Innthak na sak uh ciang na innkhum kiil kiimkot ah taangban zawl thungin uum hamtang vun. Tua hile mihing khat taakin a thi hial zong mawsiat thuak ngawl tu nu hi.
9 “Lo khat sungah sapit le thaicii dang khat pawpo ciingkhawm heak vun; na ciingkhawm uh le sapit ahizong, an piang dangte ahizong ne thei ngawl tu nu hi. Ref 22:9-11 Thiam 19:19
10 “Khuital khat le laa khat a kaap in lotho khawmsak heak vun.
11 “Samul le puanneal a kitak khawm puan silh heak vun.
12 “Na puan king li ah zepna teapkaaite koi vun.Ref 22:12 Mi 15:37-41
Numei le pa Thianthona taw Kisai Thukhamte
13 “Sonteena in mihing khat in numei khat teenpui a, hun khat ciang dei nawn ngawl hi.
14 Tua ahiciang, a maw natu zongin a kiteen lai in ngaknu thiangtho hi ngawl hi, ci in mawsiat hi.
15 “Hi bang thu a piang le tua nu ii nu le pa in ngaknu thiangtho a hina a heaksak natu in, a kiteen ni zan a, a delpha chi baang puan sia thukhenzum ah a lak tu in khua sung lampuite kungah paipui tu hi.
16 Tua numei ii pa in amate tungah, ‘Ka tanu sia hisia pa taw ka teangsak a, ahizong tu in dei nawn ngawl hi.
17 Ama in ka tanu sia a maan ngawlin mawsiat a, a kiteen lai in ngaknu thiangtho hi ngawl hi, ci hi. Ahizong ka tanu ngaknu thiangtho khat a hina sia hi sungah tetti om hi; a kiteen lai a delpha chibaang puan sia en vun!’ ci tu hi.
18 Tuaciang khua lampuite in a pasal samin saat tu hi.
19 Amate in ngunntang zakhat zongh liausak tu a, tua sumte numei ii pa tungah pia tu hi, banghang ziam cile tua pa in Israel numei khat mindaisak ahi hu hi. Tua bek dom ngawlin tua nu sia ama zi ma hi suak tu a, tua pa in ama nuntak laiteng tua nu khul thei ngawl tu hi.
20 “Ahizong a mawsakna thu sia maanin, ngaknu thiangtho a hina thu tetti a lak thei buale,
21 a pa inn kongbiang ah ama kipaipui tu a, tua khua pasalte in suang taw deanglum tu hi. A pasal nei ma a pa inn ah a om lai in numei le pa khialna taw ih mipuite sungah a maizumhuai vawt zo hi. Tuabangin hi siatnate bosak tu nu hi.
22 “Mihing khat sia midang khat ii zi taw a khial laitak a kiman le, amate ngeal kithat tu hi. Hi bangin hi siatna bosak tu nu hi.
23 “Sonteena in khua sungah mihing khat sia a kidongh sa numei khat a khialpui zawkciang kiman hi.
24 Amate ngeal khua pua sangah paipui in deanglum tu nu hi. Tua nu sia khua sungah a om hi a, midangte zaak thei tu in hu ngenin au thei tu hi napi a au ngawl hu in thina thuak tu ahi hi. Tua pa ahile a kidongh sa numei taw a khial hu in a thi kul hi. Hi bangin hi siatna bosak tu nu hi.
25 “Sonteena in, midang khat in a kidongh sa numei khat daaipaam duisung ah buan hi, tuabang ciang tua pa bek kithatlum tu a;
26 tua numei sia bangma kilaw ngawl tu hi, banghang ziam cile thisak natu za in mawna vawt ngawl hi. Hi thu sia mihing khat in midang khat ngalvawtin a thalup thu taw ma kibang hi.
27 Tua pa in a kidongh sa numei khat daaipaam duisung ah buanin, tua nu in ngalko in au napi a hun tu kuama om ngawl hi.
28 “Sonteena in mihing khat in a kidongh ngawl lai numei khat buanin a khialpui laitakin kiman hi.
29 Tua pa in tua numei ii pa tungah mo man in ngunntang sawmnga pia tu a, tua nu sia ama zi suak tu hi, banghang ziam cile tua pa in zawthawk thu taw a khialpui hang ahi hi. Tua pa in ama nuntak sung teng tua nu khul thei ngeingawl tu hi. Ref 22:28-29 Pu 22:16-17
30 “Kuama in a pa ii zite khat pawpo taw khialin a pa maimawl sak heak hen. Ref 22:30 Thiam 18:8; 20:11; Thkna 27:20