12
Biak natu Mun khat
1 “Na pu na pate Pathian, Topa ii note hong piak ngam ah na teen hunsung teng na zui tu uh sia hi thukhamte ahi hi. Tuate na ngai vun!
2 Na laak tu ngamsung mihingte ii a pathian biakna mun ahi mualsaangte tung, mualnote tung le thingkung hing nuai theampo suksiatsak vun.
3 A biaknataute baltham vun a, a suangkhuam thiangthote sutham vun. Tua munte ah tuate a kibiak nawn ngawl natu in Asherah numeipathian limte mei taw halin, a milimte semneen vun. Ref 12:3 Thkna 7:5
4 “Hi mihingte ii a pathiante a biak bangin Topa na Pathian bia heak vun.
5 Topa in noma nam teng ii ngamsung pan mun khat teal tu a, tua mun ama ompuina mai ah a mihingte pai in bia tu uh hi.
6 Tualai ah na biakpiakna theampo, meihal biakpiakna le a dang sangaw biakpiaknate, sawm a khat le na sumpite, Topa tungah na kamciam letsongte, thinzaw biakpiaknate, le na khui le na tuute sung pan a no suakciilte pia vun.
7 Tua munah note thupha hong pia Topa na Pathian mai ah nangma le na innkuanpuite in an ne in na vawt sa thuphate tungtawnin na lungdam tu uh hi.
8 “Tua hun hong thet ciang na sep ngei uh bangin na seam nawn bua het tu uh hi, tu ciang dong noma lungkim bang pawpo in na bia uh hi,
9 banghang ziam cile Topa na Pathian ii hong piakna ngam, nuam takin na teen thei natu uh mun na theng bua lai uh hi.
10 Jordan ngun na kan uh ciang Topa in tua ngam hong ngasak tu a, tualai ah hong teangsak tu hi. Ama in na ngalte theampo khut sung pan hong keamcing tu a, lungmuangin na teang tu uh hi.
11 Topa in ama a kibiak natu in mun khat tealtuam tu a, kong thupiak bangin tua munah na theampo na puak tu uh hi: tuate in meihal biakpiakna le a dang sangaw biakpiaknate, na sawm a khat le na sumpite le Topa tungah na kamciam a tuam vilvel letsongte ahi hi.
12 Tua mun Topa mai ah na tate, na naseamte le na khuate sungah a teang Levi te taw lungnuam khawm tavun; Levi te in lo ngam a nei ngawl natu thu phawk tavun.
13 Na tealna mun pawpo ah sangaw biakpiakna na pia buatu uh hi;
14 Topa in noma nam khat ii ngam sungah mun khat teal tu a, tua mun bek ah na pia tu uh hi. Tua mun bek ah meihal biakpiakna na pia tu uh a, ka thupiak bangin a dangte theampo na vawt siat tu uh hi.
15 “Ahizong na teenna mun po ah na ngannote ngoin, na ne thei tu uh hi. Topa hong piak zaza na ne thei tu uh hi. Na vekpi in biakna taw kisai a thiangte zongh, a thiang ngawlte zongh in sangai sa le sathak sa na neak uh bangin ne thei nu hi.
16 Ahizong a chi na ne bua het tu uh a; tuasia lei ah tui sun bangin na sung tu uh hi. Ref 12:16 Pian 9:4; Thiam 7:26-27; 17:10-14; 19:26; Thkna 15:23
17 Na teenna munte ah Topa tungah na piak uh nate na ne buatu uh hi: tuate in sawm a khat in na piak antang, sapittui, olive thau, na khui le na tuu a no suakciilte, Topa tungah na kamciam letsongte, thinzaw biakpiaknate, ahibuale a dang biakpiaknate ahi hi.
18 Nang le na tate in na naseamte le na khuate sungah a teang Levi te taw Topa na Pathian ii tealsa biakna mun, Topa na Pathian ompuina mun bek ah hi biakpiaknate nekhawm tu nu hi. Na nasepna sa theampo hu in tua munah na lungdam tu uh hi.
19 Na ngam sungah na teen uh laiteng Levi te zongh na ngaingon peuma heak vun.
20 “Ama kamciamsa bangin, Topa na Pathian in na ngam hong keaksak ciang, na du hun pawpo ciang sa na ne thei tu uh hi.
21 Tua biakna mun sia a khuala lei ahile, kong cisa bangin Topa hong piaksa khui ahibuale tuute khat pawpo na uuk hun po ngoin inn ah a sa na ne thei tu uh hi.
22 Sangai sa le sathak sa a neak uh bangin biakna taw kisai a thiang khat zongh, a thiang ngawl khat zongh in tua sa ne thei tu hi.
23 A sungah chi om lai sate ne heak vun; banghang ziam cile chi sungah nuntakna om a, nuntakna sia sa taw nekhawm peuma heak vun.
24 Chi sia an in nei heak vun, tui bangin lei ah sung zaw vun. Ref 12:23-24 Thiam 17:10-14
25 Hi thupiak na zui uh le Topa lungkim tu a, nangma le na suan na paalte theampo na ma uh vang tu hi.
26 Na biakpiaknate le Topa na kamciamsa letsongte biakna munah paipui vun.
27 Topa biaknatau tungah a kihaltum tu in sangaw biakpiaknate tua munah pia vun. A sa na neak tu uh sangaw biakpiakna zongh biaknatau tungah pia vun a, biaknatau tungah a chi sung vun.
28 No tungah kong thupiak theampo thumaan takin zui vun, tua hile nangma le na suan na paalte a tawntungin na ma uh vang tu hi, banghang ziam cile noma in a maan nate le Topa na Pathian a lungkimsak nate a seam tu na hi uh hi.
Milim Biak ngawl natu Kidop tu thu
29 “A ngam na sim uh ciang Topa na Pathian in hi minamte mon tu a, a ngam la in na teang tu uh hi.
30 Topa in tua minamte a mot zawkciang a biakna vawtziate na zui ngawl natu uh in kidawm vun, banghang ziam cile tua in thina bona hi tu hi. Amate biak bangin na biak thei natu in a pathian te, a biakna vawtzia te kan sese heak vun.
31 Amate ii a pathiante a biakzia bangin Topa na Pathian bia heak vun, banghang ziam cile a pathiante a biak uh ciangin Topa ii ngaimawk, a kiihuai nate theampo vawt uh hi. Amate in a tate ngawngawn pia in a biaknataute tungah mei taw hallum uh hi.
32 “Kong thupiak theampo zui siat vun; khat zongh belap heak vun a khat zongh vawk heak vun. Ref 12:32 Thkna 4:2; Tpl 22:18-19