3
Nebuchadnezzar in Mihing Theampo Khamh Milim Bia tu in Thupia
1 Kumpipa Nebuchadnezzar in metre 27 a saang le metre 3 dektak a lian khamh milim khat vawt a, Babylon ngamkhen Dura zaangtam ah phut hi.
2 Tua zawkciang kumpipa in a ulian theampo — kumpinote, ngamkhen ukte, ngamkhen uk domte, menzite, sumkeamte, thukhenmangte le ngamkhente ii ulian dangte theampo a kikhop tek natu in thupia hi. Amate sia Kumpipa Nebuchadnezzar ii milim aapna poai siim tek tu ahi hi.
3 Hi uliante theampo milim aapna vawt tu in kikhawmtua a, milim mai ah a din uh ciang,
4 thu puak khat in aw nging takin au a, “Ngam theampo, minam theampo le paunam theampo pan mihingte awng!
5 Lemle aw na za tu uh a, tua zomin tum thei oboe te, liamlo te, zither te le tengtonghte; tuaciang a dang tum thei theampo in hunghuan tu hi. Tum thei teng hong kitum po ciang, Nebuchadnezzar ii phu sa khamh milim mai ah kunin na bia tu uh hi.
6 Kun in a bia ngawl peuma sia thakhat thu in a lingh meiphual sung denna kinei tu hi,” ci hi.
7 Tuabangin, ngam theampo, minam theampo le paunam theampo pan mihingte in tum theite awte a zaak pawpo uh ciang, kunin Nebuchadnezzar phu sa khamh milim bia uh hi.
Daniel ii Lawmte Thum Thu ni ngawlin Kimawsiat
8 Tuasia ciang Babylon mite pawlkhat in Jew mite a siat son natu hunpha khat nga uh hi.
9 Amate in Nebuchadnezzar kumpipa tungah, “Kumpipa awng, nungta tawntung ta'n!
10 Tum theite hong kitum pawpo ciang, mihing theampo kunin khamh milim bia tu hi,
11 tua milim mai ah a kun ngawl, a bia ngawl peuma meiphual lingh sungah kibum tu hi ci in Nangma Kumpipa in thu na pia zo hi.
12 Babylon ngam khen uk tu a na koi Nangma Kumpipa ii thu a ni ngawl — Shadrach, Meshach le Abednego — Jew mi pawlkhat om hi. Amate in na pathian le bia ngawl, na phu sa milim mai ah le kun ngawl uh hi,” ci uh hi.
13 Tuasia po ciang kumpipa a thin uuk ngawp a, tua mihing thumte a mai ah a kipuak natu in thupia hi.
14 Kumpipa in amate tungah, “Shadrach, Meshach le Abednego awng, keima ii pathian bia nuam ngawl a, ka phu sa khamh milim mai ah kun nuam ngawl hong kici sia a maan ma ahi na'am?
15 Tua ahiciang tu in lemlete, oboe te, liamlo te, zither te, tengtonghte le a dang tum thei tuatuam theampo ii aw na zaak po uh ciang kun in tua milim bia vun. Na bia bua uh le, thakhat thu in a lingh meiphual sungah hong kikhia tu hi. No hong hun zo tu pathian khat pawpo om tu in um nu ziam?” ci hi.
16 Shadrach, Meshach le Abednego in, “Kumpipa awng, ko le ko kihuuk natu hanciam ngawl tu khu hi.
17 Ka biak ka paai uh Pathian in a naseam kote meiphual sung pan le na khut sung panin hong hun thei ahi nale hong hun tu hi.
18 Ahizong hong hun buahial zong Nangma Kumpipa awng, na pathian ka bia tuan buatu uh a, na phu sa khamh milim mai ah ka kun buatu uh hi, cisia hong heaksak ta'n” ci in zo uh hi.
Daniel ii Lawmte Thum Thalup tu Thu Kikhen
19 Tuasia ciang Nebuchadnezzar kumpipa in Shadrach, Meshach le Abednego tungah a thin uuk mama a, a mai san liang hi. Tua ahikom ama in meiphual sia a sat ngeina sang a salivei in a satsak zawk natu in a mite thupia hi.
20 Tuaciang ama in a ngalkaphonpi sung pan a thahat belte in hi mihing thum teng heencip in a lingh meiphual sungah khia tu in thupia hi.
21 Tua ahikom amate thum sia a puansilh theampo a cingin — laktongte, puantualte silh sa le lukhu khu sa in heencip uh a, a lingh meiphual sung denna in nei uh hi.
22 Tu in, kumpipa in meiphual a sat mama natu in ngat takin thupia ahikom tua mite meikuang sungah a khia a cing teng sia meikuang in kaanghlum hi.
23 Tuaciang Shadrach, Meshach le Abednego sia heencip sa in a lingh meikuang laizang ah taaksuk hi.
24 Tha khat thu in Nebuchadnezzar sia lamdang sa in dingto vat hi. Ama in a uliante tungah, “Mihing thumte heencip in meiphual sungah khia zo hi ka na ngawl hi ziam?” ci in dongh hi.
Amate in, “Hi hi, Kumpipa awng,” ci in zo uh hi.
25 “Tua ahile banghangin meikuang sungah mihing li kot vavaa in mu khi ziam?” ci in dongh hi. “Amate kiheencip ngawl a, liam zongh liam tuak beak ngawl uh hi — tuaciang a lina pa sia vantunglalang khat taw kibang hi,” ci hi.
Tua Mihing Thumte Kisuatak a, Za Khanna Kipia
26 Tuaciang Nebuchadnezzar sia meiphualpi kongkha kungah paito a, “Shadrach! Meshach! Abednego! Lianbel Pathian ii naseamte awng, hong pusuak tavun!” ci in sam hi. Tuaciang amate thakhat thu in pusuak uh hi.
27 Kumpinote, ngamkhen ukte, ngamkhen uk domte le kumpi ulian dangte theampo in mei ii kak ngawl mihing thumte en tu in hong kikhawm uh hi. Amate a sam kaang ngawl, a puante kaang ngawl a, meikhu ngim zongh nam ngawl uh hi.
28 Kumpipa in, “Shadrach, Meshach le Abednego ii Pathian pok vun! Ama in a vantunglalang sawl a, ama muangin, ama na a seam hi mihingte suatak hi. Amate in ka thupiakte ni ngawlin amate ii Pathian simngawl pathian dang khat pawpo mai ah kunin a biak tu sangin a nuntak nate khaam zaw uh hi.
29 “Tuaciang tu in minam, minam khen ahibuale paunam khat po sung pan a kuama po in Shadrach, Meshach le Abednego ii Pathian sonsiatna kampau a om le a khut a peang kisemtham tu a, a inn sia niinthuk kisuaksak tu hi, ci in thu ka pia hi. Hi bangin a suatak thei pathian dang om ngawl hi,” ci hi.
30 Tuaciang kumpipa in Shadrach, Meshach le Abednego sia Babylon ngamkhen sungah a za uh khangsak hi.