COLOSSAE TE
Tungah Paul ii Laithak
(Paul's Letter to the Colossians)
Paul ii Colossia te tungah a laithak a kici bangma Asia Minor ngam Ephesus khua ii nisuana sangah a om Colossae khua pawlpi tungah a thaak ahi hi. Hi pawlpi sia Paul ii phu pawlpi hi ngawl hi, ahihang Paul ii et tu kilawm a sak ngamkuam sungah om a, Ephesus panin naseamte veu a paisak, Asia ngam ah Rome kumpite ii khuapi ahi hi. Colossae pawlpite sungah thuhil maan ngawl pawlkhat om hi ci in Paul in za a tua mite upna sia Pathian heakna tu le ngupna a cingin nga natu in mihingte in “Thaa lam ah a ukte le thunei te” biak kul tu hi ci uh hi. Tua tungsia ah, hi thuhilte in ngeina pawlkhat ahi, vunteap atna an neak lamsang le a dang ngeina te nasia tak zuina sungah ki aap kul tu hi ci uh hi.
Paul in hi thuhilnate sia a maan Tapidawte zui tu thute taw nial natu in a at ahi hi. Ama zo kikna thubulpi sia Jesus Christ in ngupna a cing takin pia thei a, tua upna le zuina dangte in ama kung panin lam hong pialsak thei zaw hi, ci in a at ahi hi. Pathian in Jesus Christ tungtawnin leitung bitphua a, tuaciangin ama tungtawn mama in tua leitung ama mama ii kungah then kik hi. Tua zawkciangin Paul in, thu umte nuntakna sungah hi kihilna lianpite a kizakzia teng at hi.
Colossae pawlpite tungah Paul ii laithak a puaksak pa Tychicus sia Paul ii Philemon tungah laithak taw a aap kik, a silapa Onesimus in tonpui ahi hunlam sia a teptee tuak thu khat ahi hi.
1
1 Pathian ii deina taw Jesus Christ ii sawltak khat ahi Paul le ih suapuipa Timothy in —
2 Colossae khua ah a om Christ taw pumkhat ahi a thumaan suapui le Pathian mite tungah lai kong thaak uh hi.
Ih Pa Pathian in thuthiamna le thinnopna hong pia tahen.
Lungdamko Thungetna
3 No atu thu ka nget uh ciangin, ih Topa Jesus ii Pa ahi Pathian tungah lungdam ka ko tawntung uh hi.
4 Banghang ziam cile Jesus Christ na upna uh le Pathian ii mite theampo na itna uh ka za uh hi.
5 Lungdamna Thupha a maan thuhilna no tungah hong theng masa a, tua ii hong piak tu lametna sia na za zo uh hi. Tua ahikomin vantung ah no atu in hong kikoisak na lamet uh sia ii tungah na upna le na itna uh, kingaa in om hi.
6 Pathian ii thuthiamna na zaak phit ni uh pan kipan, no in a maan tatakin na heak uh bangma, tua lungdamna thu in, thuphate no tungah hong puapuak a, leitung theampo ah kizel hi.
7 Pathian ii thuthiamna sia kote taangin Christ ii thumaan naseampa ka nasep pui Epaphras tung panin heakna na nga uh hi. Ref 1:7 Col 4:12; Phm 23
8 Ama in Thaa ii hong piak itna na neina uh ko tungah hong son zo hi.
9 Tua thu hangin note thu ka zaak pan kipan thu kong ngetsak tawntung uh hi. Ama deina tel theina le a Thaa ii hong piak ciimna le heakna theampo taw note hong kidimsak natu in Pathian tungah ka ngen uh hi.
10 Tuaciang Topa deina bangin na nungta thei tu uh a, ama ii diksak bangin na vawt tawntung tu uh hi. Na nuntakna in nasep pha theampo piangsak tu a, Pathian heakna sungah na khangto tu uh hi.
11 Na theampo thinsauna taw na thuak zawk natu uh in, ama ii minthang vaangletna in note hong thahatsak tahen.
12 Thinnopna taw Pa tungah lungdam na ko tavun. A ma in khuavakna ngam sungah a mite ii lua tu a khealsiate nga tu in hong kilawmsak hi.
13 Ama in khuazing vaangletna sung pan eite hong hun a, a it a Tapa ngam sungah bit takin hong paipui hi.
14 A chisan hangin eite ih suakta a, ih mawnate hong kimaisak zo hi. Ref 1:14 Eph 1:7
Christ ii Mihing A hina le A nasep
15 Christ sia mu thei ngawl Pathian ii pianzia muna ahi hi. Ama sia bitphua sa theampo sung pan Tapa upabel ahi hi.
16 Banghang ziam cile vantung leitung na theampo, a kimu thei le a kimu maw nate thaa taw kisai vaangletna neite, tote, a ukte le thuneite theampo sia ama tungtawnin Pathian in bitphua hi. Pathian in ama tungtawnin vaannuai buppi ama atu in bitphua hi.
17 Christ sia tuate theampo om ma in om a, ama taw kikopin a omna mun tu tek ah om uh hi.
18 Ama in a pumpi ahi pawlpi lutang hi a, ama in pumpi ii nuntakna naak ahi hi. Ama in Tapa upabel hi a, na theampo sungah ama bek a masa phitbel ahi natu in thina panin tho kiksak zo hi. Ref 1:18 Eph 1:22-23
19 Banghang ziam cile Pathian ii khensatna om bangin Tapa in Pathian ii zia theampo nei hi.
20 Tuaciang Tapa tungtawnin Pathian in vaannuai buppi sia ama kung a thet kik thei natu in khensat hi. Thinglamtee tungah a kibua Tapa ii chisan tungtawnin Pathian in kilemna piangsak a, leitung vantung ah a om, na theampo ama kungah then kik siat hi. Ref 1:20 Eph 2:16
21 Hun khat lai in note in Pathian taw na kikhuala uh a, ngitlo ngamtatna le ngitlo khua ngaisutna na nei uh manin a ngalte na hi uh hi.
22 Ahihang tu in ama omna munah a thiangtho, a kidoituam, a sitbaang ngawlin hong thet thei natu in a Tapa ii pumpi thina hangin Pathian in a lawmte hong suaksak zo hi.
23 A kho thu doppha tungah na thumaan tawntung vun a, lungdamna thu na zaak ciil uh lai a na nga uh lametna taw na kipeal nuam heak vun. Leitung mihing sim tungah a kihil hi lungdamna thu hu in keima Paul sia naseam khat suak ka hi hi.
Pawlpi Naseam khat bang a Paul ii Nasepna
24 Tu in no atu ka thuak nate tungtaang ah ka lungdam hi, banghang ziam cile a pumpi ahi pawlpi atu Christ ii thuak tu a om laite a khuangkhim natu in keima in cii le sa taw ka thuak ciangin a hu ka hi hi.
25 Tuaciangin kei sia Pawlpi naseam tu in Pathian in hong vawt hi a, note phat natu in hi nasep lian sia sep tu in hong kipia hi. Tua nasep lian sia ama thu a cing takin thansak natu hi a,
26 tua thu in hun bosa sungah mihing nam theampo te sung pan a kiseal, tuciangin ama mite tungah a kilak thuku ahi hi.
27 Pathian ii ngealna sia ama ii thuku, mihing theampo atu in, ama ii a nei a tuanngen thuku sia a mite ii a heaksak tu ahi hi. Tua thuku in bangziam cile Christ in note sungah om a tua hu in note in Pathian ii vaangletna na lua tu uh hi.
28 Tua ahikom Christ sia mihing khat sim tungah ka hil uh hi. Pathian omna munah mihing khat simin Christ taw kikop in, a khanthin natu in ciimna theampo taw hil in a kidop natu thu ka pia uh hi.
29 Hi nasep a kizaw thei natu in ka sungah na hong seam Christ ii nasia tak a tha hong piakna zanghin diangin ka kisaan hi.