6
1 Tua ahiciang, Pathian taw ko ii nasep khopna sungah Pathian ii thuthiamna a saangte in, tua thu thiamna sia a luithawthong a suasak ngawl natu in kong thuum uh hi.
2 Pathian pauna ngai vun:
“Note maipha kong piak tu hun
hong thet ciang,
note ngetna kong za hi;
kong ngup tu ni hong thet ciang,
note kong hu hi.”
Ngai vun! Pathian ii hesuakna saan thei tu sia tu hun hi; hong kingup tu ni sia tuni ahi hi! Ref 6:2 Is 49:8
3 Ka nasepna uh taw kisai in khat pawpo ii mawna hong zon tu sia ka dei bua uh a, tua ahikom kuama haksatnate a nga natu in ka hanciam bua uh hi.
4 Na ka sepna sung theampo ah Pathian naseamte ka hina uh ka lakna uh in, thinsau takin ngimna thuak zawkna, haksatna le buainate ka thuak kenkon zaw uh hi.
5 Kote sia hong kivel a, thong sungah hong khumin, hong vawtsia uh hi; naseam leilam in, mu ngawlin, an ne ngawlin ka om uh hi.Ref 6:5 Sawl 16:23
6 Pathian naseamte ka hina uh sia thiangtho nuntakna, thu heakna, thinsauna le dikna — Thaa Thiangtho taw, ki itna tatak taw,
7 a maan thuhilna le Pathian ii vaangletna teng taw ka lak uh hi. Thutang suana sia ka ngalhiam uh hi a, ngaldo natu le koma le koma kihuukna tu in ka nei uh hi.
8 Kote sia hong kithasia a, hong kizawngsak si hi; hong kilang a hong kipok si hi. Kote sia thumaan ka son uh hang a leilot theite bangin hong kivawt hi;
9 ngual theampo in hong he ahihang a kihe ngeingawlte bangin hong kivawt hi; nong mu uh bangma kote nungta napi a thisate bangin hong kivawt hi. Daan hong kipia ahizong, hong kithatlum ngawl hi;
10 hong heesak ahihang ka lung uh dam tawntung hi; a zawng bang ka hi uh hangin, mihing tam mamate ka hausak uh hi; neisa bangma nei ngawl tu bang ka hi uh hangin, na theampo a nei tatakte ka hi uh hi.
11 Corinth khua a om ka it lawmte awng! No tungah ip nei ngawlin kong son zo uh hi; ka thinsung kongkha uh kong hon siat uh hi.
12 Note tungah kote in ka thinsung uh hong khakbil hi ngawlin; noma in kote sia na thinsung uh hong khabil nu hi.
13 Tu in note sia ka tate bangin kong pau hi: note tungah kong nei uh thinpuak bangin, kote tungah thinpuak nong neina uh hong lak tavun. Na thinsung kongkha uh hongin na taanzausak vun.
Doai biate ii Hong zawna tu pan Kidop natu
14 Thu um ngawlte taw kipawl tu sia suak thei ngawl ahikom amate taw kibangin na na seam khawm heak vun. A maan le a maan ngawl sia bangbangin kipawl khawm thei tu ziam? Bangbangin khuavak le khuazing sia teang khawm thei tu ziam?
15 Christ le Doaimangpa sia bangbangin thu kisi thei tu ziam? Thu um khat in thu um ngawl khat taw bangbangin na khat nei khawm thei tu ziam?
16 Pathian ii biakinn sia doai biakna milimte taw bangbangin thukimna vawt thei tu ziam? Banghang ziam cile eite sia a nungta Pathian biakinn ih hi hi! Pathian in:
“Ka mite sungah
ka inn ka vawt tu a,
amate sungah ka teang tu hi;
keima in amate
Pathian ka hi tu a,
amate in keima mihingte
ahi tu uh hi,” ci hi.Ref 6:16 Thiam 26:12; Eze 37:27; 1 Cor 3:16; 6:19
17 Tuaciangin Topa in,
“Amate nusia nanak in a,
amate taw kikhen tavun.
A thiangtho ngawlte taw
bangma kipeena na nei heak vun,
tua hile note kong saang tu hi, ci hi.Ref 6:17 Is 52:11
18 Vaanglianbel Topa in,
Keima in note ii Pa kong hi tu a,
note sia ka tapate le ka tanute
na hi tu uh hi, ci hi,” a ci hi.Ref 6:18 2S 7:14; 1 Khang 17:13; Is 43:6; Jer 31:9