11
Paul le Sawltak Maan ngawlte
1 Ka mawmaw phial zonghin, nong thuak zawk natu ka dei hi. Hong khual tavun!
2 Pathian in note hong thinbot bangma in kei zongh in kong thinbot hi; note sia pasal khat bek taw kiteang tu a kamciam ka piaksa ngaknu thiangtho khat bang na hi uh a, tua pasal in Christ mama ahi hi.
3 Eve sia ngul ii leilot pilnate taw a theam bangma in — na thinsung uh lalin Christ tungah a kicing le a thiangtho in na kipiakna uhte na nusiat thaak tu uh ka lau hi.Ref 11:3 Pian 3:1-5;13
4 Banghang ziam cile kote ii kong hil Jesus ahi ngawl, Jesus a dang khat ii thu, hil a hong pai pawpo sia lungdamin saang nu hi; kote tung panin, na nga uh Thaa le lungdamna thu taw a kibang ngawl het thaa le lungdamna thu na saang uh hi!
5 Note ii “sawltakte” na ci tuamte sangin kei sia bekcik zongh nozaw tuanin ka kingaisun bua hi!
6 Thu sonna ah a kipan tuung hi kaleng heakna ah tuabang ka hi bua het hi; hi thu sia hun theampo sung le a omzia theampo thiang takin kong son tawntung sa ahi hi.
7 Pathian Lungdamna Thupha sia note tungah kong hil ciangin thaman bangma kong la bua a; noma kong thupi vawt na in keima le keima ka kiniamkhiak hi. Tuasia in khial ka hi ziam?
8 Note sungah kong sep laitakin pawlpi dangte in kei sia sum taw hong tham hi. Note kong hu natu in amate a suasuam ci tu bang ahi hi.
9 Note sungah na ka sep laitakin, huna sum ka kisap ciang, no kong konlaw bua hi; Macedonia pan hong pai suapuite in ka kisap theampo hong puak hi. A bosa hunsung bangma in mai sang zongh ah: note atu in vanhngit ka hi ngei buatu hi! Ref 11:9 Php 4:15-18
10 Achaia ngam koima theampo ah hi keima kisuantaakna sia, kuama in hong khaam ngawl tu ci in ka sungah a om Christ ii thumaanna taw kong kamciam hi.
11 Kong it ngawl hu in hi bangin pau ka hi ziam? Pathian in note kong it hunlam hong tel hi!
12 Tua “sawltak” te in kote sep bangma ka seam uh ci in kisuantaak natu thu khat po a nei thei ngawl natu in, tu a ka sep teng ma ka seam tan lai tu hi.
13 Tua mihingte sia sawltak tatakte hi ngawl hi — amate sawltak maan ngawlte hi a, a nasepna huvau leilot in Christ sawltak tatak te bangin a kimealsealte ahi uh hi.
14 A lamdang hi ngawl hi! Satan ngawngawn zongh khuavak vantunglalang khat taw kibang tu in, kimealseal thei lai hi!
15 Tua ahikom ama ii naseamte in, thutang naseamte taw kibang tu in a kimealseal le a lamdangpi hi ngawl hi. A tawpna ah amate in a ngamtatnate uh taw a kiphu bang tatakin nga tu hi.
Sawltak khat a hina taw Paul ii Thuaknate
16 Keima sia a mawmaw in kuama in hong tuat heak hen kong ci kik hi. Ahizong tuabangin, nong ngaisun uh le zong, kiphatsak pui tu tawmno ka nei thei natu beak in a mawmaw khat bangin hong saang lamh tavun.
17 Tu a ka papau teng ahile Topa ii hong pausak tute hi ngawl hi; hi kisuantaakna vai ah a mawmaw khat bangin ka pau takpi hi.
18 Ahihang mihing ngaisutna lelte taw zong a kisuangtaak om ahiciang, kei zongh tuabang ma ka ngamta tu hi.
19 Noma tek ma ciim mama na hi uh komin, mihing mawmawte sia lungdam takin na dual uh hi!
20 Note a uk bang po hong sawlte, note tung pan na neisa hong duupte, thaang taw hong siate, hong nomute ahibuale na maitang hong beangte khat pawpo na dual uh hi.
21 Tuabangte vawt tu in ih lauthauh leihna teng ka pualaak tu sia ka maizum hi!
Ahihang khat pawpo in bang khat po huvau in a kisuangtaak ngam le — a mawmaw bangin pau tu ci leang — kei zongh ka kisuangtaak ngam tu hi.
22 Amate sia Hebrew mi ahi uh ziam? Kei zongh ka hi hi. Amate sia Israel te ahi uh ziam? Kei zongh ka hi hi. Amate sia Abraham suante ahi uh ziam? Kei zongh ka hi hi.
23 Amate sia Christ ii naseamte ahi uh ziam? A mawmaw bang ka hi tha ta zong, amate sangin a phazaw naseampa ka hi hi! A nasia zaw in na ka seam a, thong zong tamvei ka taak zaw hi, tamvei hong kivel zaw a, a tamvei zaw ka thi dektak bul hi.Ref 11:23 Sawl 16:23
24 Jew te in sawmthum le kuavei veu, ngavei tak hong saat hi;
25 thumvei sia Rome mite in hong saat hi; khatvei sia suangtum taw hong kihua hi.Ref 11:24 Thkna 25:3Thumvei teambaw lal ka tawk a, khatvei sia nai kul le nai li sung tui sungah ka om hi.Ref 11:25 Sawl 16:22; 14:19
26 Ka khualhawna tam mama sungah namthuamna pan, ngualsuamte pan, Jew mipuite le Gentile te tung panin, lauhuaina ka thuak hi; khuapi sung, duisung ngampa, tuipi tung le ngualtamh thumaan ngawlte tung panin lauhuaina tuatuam ka thuak hi.Ref 11:26 Sawl 9:23; 14:15
27 Nasep thil vawt kitatsat ngawl a, mut ka nga ngawl hun tamvei mama hi; ka ngilkial hun le ka dangko hun om a; an ngina ka neak ngawl hun, belh tu nei ngawlin, puansilh ka nei ngawl hun tam pheivei hi.
28 Thildang a vaal lai, pawlpite theampo atu in, ka thinbotna in, ni simin ka ngim hi.
29 Mihing khat po a tha zawm ciangin, kei zongh in ka tha zawmpui hi; khat po mawna sungah a puk ciangin, thin heena taw ka kidim hi.
30 Kisuantaak tu a kul le zong, ka thazawmna hong laknate tungah ka kisuangtaak tu hi.
31 Topa Jesus ii Pathian le Pa — a tawntungin ama min in thupha nga tahen! — tua Pathian in ka leilot ngawl hunlam hong he hi.
32 Damascus khua ah ka om lai in Kumpipa Aretas khutnuai a om ngamkhen uk mangpa in kei hong mat natu in khuapi kongpite ah a cingte koi hi.Ref 11:32-33 Sawl 9:23-25
33 Ahihang khuapi luphung vang khat panin bawm khat taw kei hong kikhiaksuk ciang ama kung pan ka suakta hi.