6
Tapidaw puite taw Thu kineina
1 Mihing khat in a Tapidawpuite khat taw thu a nei ciangin, Pathian ii mihingte ii a khensak tu luangin, bangbangin Pathian he ngawl thukhenmangte mai ah pai ngam ziam?
2 Pathian ii mihingte in leitung ii thukhen tu ahi hunlam he ngawl nu ziam? Pha hi, leitung ii thukhen tu na hi uhle, thunote tungtaang ah thukhen zo ngawl nu ziam?
3 Vantunglalangte tungah thukhen tu na hi uh hunlam kihe ngawl nu ziam? Tua ahile hi nuntakna sungah thute na khen thei zaw kan tu uh hi!
4 Tuabang thute hong piang le, pawlpi sungah dinmun a nei ngawl mihingte ii thukhen tu in paipui tu nu ziam?
5 Note atu in maizumhuai mama hi! Thu kinei Tapidaw puite kilaklaw ah thu a khen thei tu mihing ciim khat beak na pawl sungah om nanak tu hi.
6 Tua hi napi in Tapidaw thunei khat in a dang khat sia thukhenzum then a, thu um ngawlte in tua thu na khensak zawpum uh hi!
7 Note sungah na thu kineina uh mama in na nginat ngawlna uh lak hi. Ngual in no tungah hong khial le no atu phazaw ngawl ziam? Ngual in hong suttol le no atu phazaw ngawl ziam?
8 Tuabang hi tu kimlai, khat le khat tungah khialna na kivawt uh a, suapui tatakte ngawngawn na kisuttol uh hi!
9 Mihing ngilote in Pathian Ngam lua ngawl het tu ci in he nu hi. Noma le noma kitheam heak vun; mihing a paktatte le milim a biate, palngul mawna a vawtte, pa le pa, numei le numei a khialte,
10 na ngu theite, a duhopte, zukhamte, ngual ngensia theite, ngutate, hite kuama in Pathian Ngam lua ngawl tu hi.
11 Note pawlkhat in tuabang na ngamta ngei uh hi. Ahihang note sia mawna panin hong kithiansua zo hi; Pathian tungah hong ki aaptuam zo hi. Topa Jesus Christ le eite Pathian ii Thaa in Pathian mai ah note thutang hong suaksak zo hi.
Na Pumpite Pathian Minthan natu zangh vun
12 Khat po in, “Na khat pawpo ka vawt thei natu thu om hi,” ci tu hi. Hi hi; ahihang na theampo sia nang atu pha siat ngawl hi. Kei zongh na theampo ka vawt thei natu thu om hi ci thei khi hi, ahihang kei sia na khat pawpo ii sila ka kisuaksak buatu hi.Ref 6:12 1 Cor 10:23
13 Khat po in, “An sia ngilpi atu hi a, ngilpi sia an atu hi,” ci tu hi. Hi hi; ahihang tuate ngeal sia Pathian in bosak tu hi. Pumpi sia numei le pa paktatna a zak tu hi ngawl a, Topa ii na seam tu ahi hi; tuaciang Topa in pumpi sia vaakin taa hi.
14 Pathian in Topa sia thina pan tho kiksak a, tuaciang ama ii vaangletna taw eite zongh hong tho kiksak tu hi.
15 Na pumpite uh sia Christ' pumpi ii a khen tuatuamte ahi hunlam na he uh hi. Christ ii pumpi sungah a kihel khen khat la in pumpi zuak numei ii khen khat, suaksak tu khi ziam? Tuabang suak thei ngawl hi!
16 Ahibuale pumpi zuak numei taw a pumpi a ngawm sia in ama taw cii le sa in pumkhat tak khat suak ahi hunlam he ngawl na hi bua uh ziam? Laithiangtho in, “Tuate nii in pumkhat suak tu hi,” ci in thiang takin son hi.Ref 6:16 Pian 2:24
17 Topa taw a kingawm khat sia ahile ama taw Thaa thu sungah pumkhat suak tu hi.
18 Paktatnate na pial vun. Mihing khat ii mawna dang khat a vawt sia in a pumpi a lalsak bua hi; ahihang numei le pa lamsang a paktatna taw a maw sia ama pumpi tungah maw ahi hi.
19 Na pumpi uh sia Pathian hong piak, note sungah a teang Thaa Thiangtho ii biakinn ahi hunlam he ngawl nu ziam? Note pumpi sia noma neisa hi ngawl a, Pathian neisa ahi hi;Ref 6:19 1 Cor 3:16; 2 Cor 6:16
20 ama in note man pia a, hong leisa na hi uh hi. Tua ahikom na pumpi uh sia Pathian minthan natu in zangh tavun.