14
Thaa ii Letsongte huvau Sonthuana
1 Tua ahikom na hanciam tu uh sia, ki itna ahi hi. Thaa Thiangtho letsongte, a tuanin Pathian thu thansak theina letsong na lungngul vun.
2 Kam tumdang a pau sia in ngualdang tungah pau hi ngawlin, Pathian tungah pau ahi hi, banghang ziam cile kuama in tel ngawl hi. Ama in Thaa vaangletna taw a kiseal thumaan thutakte son ahi hi.
3 Ahihang Pathian thu a thangsakte in mihingte tungah pau hi a, amate tungah huna, hanthotna le heenepna pia ahi hi.
4 Kam tumdang taw a paute in ama phat tuam natu bek hi a, Pathian thu a thangsakte in pawlpi bup phattuamna a pia hi.
5 No theampo kam tumdang pau thei le uhte kong oai hi; ahizong Pathian thu thansak theina letsong nei le uhte kong oai zaw hi. Banghang ziam cile pawlpi bup in phattuamna a nga thei natu in, no sungah a khiakna a son thei pai om ahi bua nale, kam tumdang a paute sangin Pathian thu a thangsak sia in man neizaw hi.
6 Tua ahikom ka suapuite awng, no kungah kong pai ciangin, kam tumdangin hong pau leng, note atu in ka kimanna om tu ziam? Pathian tung pan thupualaakna, heakna, thuhilna ahibuale hilcianna khat pawpo ka nei buale note atu in bekcik zongh kimanna ka nei buatu hi.
7 Nuntakna a nei ngawl tumthei tamngai ahizong, tengtonghte ahizong la in —, a aw kitelthiang vaset in a tum buale akua in bang aw hi ci in tel thei tu ziam?
8 Tuaciangin ngalkap sungah lemle tumpa in, sapna aw a kitel takin, a tum buale akua ngalsim tu in kinging thei tu ziam?
9 Tuasia bangma in kam tumdang taw thu na sonte a thiang buale, akua in hong tel tu ziam? Na kammalte sia vui sungah bo thong tu hi!
10 Simleitung ah kampau nam tuatuam om hikale, tuate sung pan khiakna nei ngawl khat zongh a om bua hi.
11 Ahihang a kipau kam sia ka tel buale, hong paupui pa sia kei atu in ngamdang mi suak a, ama mun pan zong, keima sia ngamdang mi ka suak hi.
12 Thaa ii letsongte nga tu sia lawp na hi uh ciang, nadang theampo sangin pawlpi a khanto thei natu a hu tu in tua letsongte zak vaial tu na hanciambel vun.
13 Kam tumdang a pau sia in ama son teng a khiakna pheen theina letsong a nga natu in, thungen nanak tahen.
14 Banghang ziam cile kam tumdang taw thu ka nget ciangin, ka thaa taw thungen takpi ka hihang ka thungetna sungah ka ngaisutna kihel ngawl hi.
15 Tua ahile bangbangin ngamta tu khi ziam? Ka thaa taw thu ka ngen tu hi, ahizong ka ngaisutna taw zong thu ka ngen tu hi; ka thaa taw la ka sa tu hi, ahihang ka ngaisutna taw zong lasa tu khi hi.
16 Pathian tungah lungdam na ko ciangin thaa bek taw na ko le, kikhopna sungah a kihel mihing thawthong khat in, nang lungdamko thungetna sia “Amen” bangbangin hong ci pui thei tu ziam? Ama in nang pauna teng a tel thei natu thu om ngawl hi.
17 Pathian tungah lungdamkona na thungetna sia pha teei ahihang ngualdang khat in phat tuamna nei ngawl het hi.
18 No sangin kam tumdang tamzaw pau ka hikomin, Pathian ka pok hi.
19 Ahihang pawlpi biak kikhopna sungah ngualdangte hilna tu in, kam tumdang kammal a tul simin ka pau sangin, a kitel thei kammal nga ka pau zaw tu hi.
20 Ka suapuite awng, na khua ngaisutna uh ah, patang bang hi heak vun; siatna lam ah patang bang na hi vun, ahihang khua ngaisutna ah na khanthin vun.
21 Laithiangtho sungah,
“Kam tumdangte a pau
mihingte tungtawnin,
ka mihingte tungah ka pau tu hi,
Topa in ci hi.
Ngamdangmite kam le muk
tungtawnin ka pau tu hi,
tua ahitazongin ka mite in
kei hong ngai buatu hi,” ci hi.Ref 14:21 Is 28:11-12
22 Tua ahikom, kam tumdang pauna letsong sia thu um ngawlte atu in a maan lakna hi a, thu umte atu hi ngawl hi, thuhilna letsong ahile thu umte atu in a maan lakna hi a, thu um ngawlte atu hi ngawl hi.
23 Tua ahikom pawlpi bup kikhawm hen a, tuaciangin mihing sim in, kam tumdangte taw a pau siasua laitakin — mihing thawthong pawlkhat ahizong, thu um ngawl pawlkhat ahizong hong pai le, note sia mawmaw siat hi hong ci ngawl tu ziam?
24 Ahihang mihing khat simin Pathian thu a son laitakin thu um ngawl pawlkhat ahizong, mihing thawthong pawlkhat ahizong hong pai le a zaak thu taw a mawna kitel tu uh hi. Ama zaakna teng taw ama tungah thu kikhen tu hi,
25 ama ii thuku a ngaisut teng a pua ah hong kilangh tu a, ama in kunin Pathian bia in, “A maan tatakin Pathian sia hi sung, note sungah om hi!” ci in pualaak tu hi.
Pawlpi sungah Kalsuanzia
26 Suapuite awng, ka ci nop sia hi teng hi. Biakpiakna nei tu in na kikhop uh ciang, mihing khat in biakna la a sak tu khat nei tu a, a dang khat in hilciannatu khat, a dangkhat in Pathian tung pan thupualaakna, a dang khat in kam tumdang taw thusonna, a dangkhat ma in thu kison teng pheen theina, nei tu hi. Na theampo sia pawlpi phattuamna ahi tu kisamh hi.
27 Khat po in kam tumdang a pau le, nii ahibuale a tambel in thum in pau tu a, tua zom ah khat zawkciang khat in a ban in pau tu hi, tuaciangin a dangkhat in a kipau teng ii khiakna a pheen kul tu hi.
28 Ahihang a pheen thei a om buale, kam tumdang a paute thim tahen a, ama le Pathian kilaklaw bek ah pau tahen.
29 Pathian thupuak a sang nii le thum te in son tu a, a dangte in, a pauna teng sia a maan le a maan ngawl khensat tu hi.
30 Ahizong kikhopna sungah a to khat po in, Pathian ii thupuakna a saang le, a pau masa sia tawlnga tu hi.
31 Na vekpi in khat zawkciang khat in, Pathian thupuak sia thangsak thei tu nu hi, tuasia ciangin mihing sim in, heakna hong nei tu a, tha hong nga tu hi.
32 Pathian thu thansak thei na letsong sia a pau sia ii ukna nuai ah om tu hi.
33 Banghang ziam cile Pathian in note sia ahi bialbual tu in hong dei ngawl a, thu kihual le a kilem tu in hong dei hi.
Pathian ii mihingte ii pawlpi theampo te ah a kizangh bangma in,
34 numeite sia kikhopnate sungah thim khipkhep in om tu hi. Amate a pau tu ki oai ngawl hi; Jew te thukham ii a ci bangma in amate sia a ukte hi thei ngawl tu hi.
35 Amate in bang khat po heak nop a nei le, inn ah a pasalte uh dongh tahen. Pawlpi sungah numeite a pau tu sia kilawm ngawl hi.
36 Tua ahibuale Pathian kammal sia no kung panin hong pai a hi thei tu ziam?. Tua ahibuale note tung bek ah hong tung a hi ziam?
37 Mihing khat po in ama le ama Pathian kamtaipa a kisa a, tua ahibuale thaa letsong nei a kisa le, tu a note tungah kong at teng sia Topa thupiak hi ci in tel nanak tu hi.
38 Ahizong ama in hi thu a nadon buale ama na nadon heak vun.
39 Tua ahikom ka suapuite awng, Pathian thuthansakna ah, na lungngul tavun a, ahizong kam tumdang paunate na khaam heak vun.
40 Na theampo ahi tu bang le, a kiphu a kilawm bangin vawt tu ahi hi.