12
Thaa Thiangtho Letsongte
1 Tu in Thaa Thiangtho letsong huvau nong at uh teng kong son tu hi.
Ka suapuite awng, tuate huvau thumaan thutak sia na heak tu uh ka dei hi.
2 Pathian he ngawlte na hi uh lai in, note sia nuntakna a nei ngawl milimte biakna sungah lampialna tam mama taw hong kipaipui ahi sia na heak uh hi.
3 Pathian Thaa ii a lampuite kuama in, “Jesus in haamsiat thuak hen,” ci thei ngawl a, tuaciang Thaa Thiangtho ii lamlakna a om ngawl po kuama in, “Jesus in Topa hi,” ci thei ngawl hi ci thu kong hesak nuam hi.
4 Thaa Thiangtho letsongte sia a nam tuatuam om hi, ahihang a kibang Thaa khat bek in tuate pia hi.Ref 12:4-11 Rom 12:6-8
5 Nasepna a nam tuatuam om hi, ahihang a kibang Topa khat atu kiseam hi.
6 Sepna sungah thiamna nam tuatuam om hi, ahihang mihing sim atu amate sepna san tek ah thiamna nam tuatuam a pia Pathian sia a kibang hi.
7 Mihing theampo phattuam natu in mihing khat sim sungah Thaa a om hunlam a nanamin kilak hi.
8 Thaa in mihing khat tungah ciimna taw kidim thu khat pia a, a dang khat tungah tua Thaa ma in heakna taw kidim thu khat pia hi.
9 Tua a kibang Thaa khat sia ma in mihing khat tungah upna pia a, a dang khat tungah ciina damsak theina vaang pia hi.
10 Thaa in khat tungah nalamdang lak theina vaang pia a; a dang khat tungah Pathian Thuhil theina letsong pia hi; tuaciang a dang khat tungah, letsongte sia Thaa Thiangtho pan hong pai ahile ahi ngawl khentel theinate pia lai hi. Khat tungah kam tumdang pau theina pia a, a dang khat tungah kam tumdangte pheen theina pia hi.
11 Ahihang hite theampo a vawtpa in a kibang Thaa khat bek ahi hi; tuaciangin ama uuk babangin letsong tuatuam mihing khat sim tungah pia hi.
Pumpi khat sungah Khentuamte
12 Christ in khen tuatuam tam mama a nei pumpi khat taw kibang hi. Khen tuatuam nei ahihang, pumpi khat hi veve hi.Ref 12:12 Rom 12:4-5
13 Tuasia bangma in, eite theampo sia Jew te ih hizong, Gentile te ih hizong, sila le sila ngawlte ih hizong, a kibang Thaa khat in, pumpi khat sungah hong ki baptize a, tuaciangin ih dawn tu in Thaa khat sia ei theampo hong kipia zo hi.
14 Banghang ziam cile pumpi in khen khat bek taw a kivawt bua a, khentuam tam mama taw a kivawt ahi hi.
15 Peang in, “Kei sia khut hi ngawl ka hi ciang pumpi ii neisa ka hi bua hi,” cile zong tua in pumpi ii khen khat a hina a bosak tuan buatu hi.
16 Tuaciangin bil in, “Kei sia mittang hi ngawl ka hi ciang, pumpi neisa ka hi bua hi,” cile zong tua in pumpi ii neisa a hina a bosak tuan buatu hi.
17 Pumpi buppi in mittang khat hile bangbangin khua za thei tu ziam? Tuaciangin bil bek hile bangbangin a ngimnam he thei tu ziam?
18 Ahizong Pathian in pumpi khen tuatuamte sia ama deina sasan tek ah koi hi.
19 A buppi in a khen tuam nam khat bek hile pumpi a om buatu hi!
20 A khentuam tam mama om ahihang pumpi khat bek om hi.
21 Tua ahikom mittang in khut kungah, “Nang kong tulmaw bua hi!” ci thei ngawl tu hi. Lutang in peang munah, “Nang kong tulmaw bua hi!” ci thei ngawl tu hi.
22 Tua hi ngawlin, pumpi sungah a thazawm tuak zaw pumpi khentuamte ngawl taw bangma ih vawt thei bua hi;
23 tuaciangin kimanna tam nei ngawlin ih hen tua khentuamte sia ih thupi vawt tu te hizaw hi; tuaciang pumpi khentuamte sungah a et hoi keak ngawlte ahile ciliapna taw a tuan in ih kep kul a,
24 tuabang kep tuam tu sia pumpi sungah a hoi zaw khentuamte in a tulmaw bua hi. Pathian mama in ciliap tu a taangsamh khentuamte a kiciliap thei zawk natu in pumpi sia ngawmtua hi.
25 Tuabangin pumpi sungah kikhenna a om bua hi, ahihang ama ii khen tuatuamte khat le khat kithinbotna nei uh hi.
26 Pumpi sungah khen tuam khat in, thuakna a nei le, a dang khentuam theampo in thuakpui hi; khentuam khat a kipok le, a dang khentuam teng in lungdam pui tek hi.
27 Note theampo in Christ ii pumpi na hi uh a, tuaciang khat sim sia tua ii khentuam khat veu ahi hi.
28 Pawlpi sungah Pathian in a vekpi ma a om natu san tek ah koi hi: a masa phit in sawltakte, a niina ah kamsaangte, a thumna ah lai hil syate; tua zawkciangin nalamdang lakna a vawtte, tua zom ah ciidamsakna vaang a kipiate, ngual hu thei ahibuale, lamlak thiamte, tua ahibuale kam tumdang taw a paute ahi uh hi.Ref 12:28 Eph 4:11
29 Amate in sawltakte, kamsaangte, lai hil syate hi siat ngawl hi. Mihing khat simin nalamdang lakna vawt thei natu in vaang ahizong,
30 ciina damsak theina ahizong, kam tumdang taw pauna le tua kamte pheen theina ahizong, vawt theina vaang a nei kim bua uh hi.
31 Tua ahikom, letsong a thupizawte deibel in na nei tavun.
Ahitazong, a vekpi sung pan a phabel sia in a nuai a bang ahi hi.