8
Thingnga A dim Khum khat Mukholna
1 Mu kholna dang khat Vaanglianpipa Topa tung pan ka nei hi. Tua ii sungah thingnga a dim khum khat ka mu hi.
2 Topa in, “Amos awng, bang mu ni ziam?” ci in hong dongh hi.
“Thingnga a dim khum khat” ci in ka zo kik hi.
Topa in kei tungah, “Israel ka mite atu in a tawpna hong theng zo hi. Amate daan ka piak tu huvau ka thin ka kheal kik buatu hi.
3 Tua ni ciang kumpi inn sungah a kisa late sia kaana le mauna aw suak tu hi. Mithi luangte mun theampo ah om tu hi. Tuate a thimtham in kivawk tu hi,” hong ci hi.
Israel ii Lalna
4 Ngamsung a mizawngte susia in, a kitaangsamhte a tuanhpeak note awng, hi thu ngai vun.
5 Noma le noma “ih antang ih zuak thei natu in ni thiangthote a bo tu ih ngak zo bua phial hi. Sumzuak ih kipat thei kik na tu in bang hun ciang Sabbath kiman tu ziam? Tuasia ciang, khaikhin maan ngawlte zanghin van leite a toai phaza theam a, na man ih khan thei tu hi.
6 Zungtaang mannung ngawlte a man tamin ih zuak thei tu hi. A peangdap kop khat ii man zongh a pia zo ngawl, leiba a lo zo ngawl mizawng khat ih mu tu a, ama sal khatin ih lei tu hi,” na kici uh hi.
7 Topa, Israel te ii Pathian in, “Amate tatsiatnate ka mangil ngei buatu hi.
8 Tua ahikom zinliing tu a, ngam sungah a om theampo ngim nga tu hi. Ngam bup liinglawng tu a, Nile ngun bangin khang tuak, kiam tuakin om tu hi.
9 Sun kimlai in ni ka tumsak tu le suntangin leitung khua ka zinsak tu hun hong theng tu hi. Keima Vaanglianpipa Topa ka pau zo hi.
10 Na poaipite mithi vuinate ka suaksak tu a, na lungdamna late sia heena, kaanate taw ka laih tu hi. Na lu uh a tolin meetsak in, khau-ip puan kong silhsak tu hi, tapa khat bek a nei sun thi a, a nu le a pa a kaa bangin kong kapsak tu hi. Tua ni sia a tawp dongin thuak hak tu hi.
11 “Ngam sungah kialpi ka tunsak natu hun hong theng tu hi. Mihingte ngilkial tu ahihang andu ngilkial hi ngawl tu hi; a dangko tu ahihang tuidu dangtaak hi ngawl tu hi. Amate in Topa kung pan thupuak khat a deina in ngilkial dangtaak hi tu hi. Keima, Vaanglianpipa Topa ka pau zo hi.
12 Mihingte sia Tuipi Thi pan Mediterranean ah, tuaciang saksang pan nisuana sangah vakvai tu uh hi. Amate in mun theampo ah Topa ii thupuak kammal khat kan tu ahihang mu ngawl tu uh hi.
13 Tua ni in ciidam khangmoi pasalte le numeite ngawngawn dangtaakin puk tu uh hi.
14 Samaria milimte ahi, ‘Dan pathian min taw’ ahibuale ‘Beersheba pathian min taw’ a kiciam peuma — tua mite puk tu a, tho kik nawn ngawl tu uh hi.”