6
Israel Lalcipna
1 Samaria ah ngammuang kisate le Zion ah nuntakna ol a sate — hi Israel ngamlian sung a, ngual ii hu hong kingetna, no lampui uliante atu in bangza in lauhuai ziam!
2 Va pai in Calneh khuapi en tavun. Tua zawkciang khuapi lian Hamath ah paisuak tavun a, tuaciang, Philistine te khuapi Gath ah paisuk tavun. Tuate in Judah le Israel kumpi ngamte sangin phazaw ziam? Amate ngam sia no a sangin zaizaw ziam?
3 Tuasiatna ni hong thet tu thu sia na um nuam bua uh a, ahizong noma ii ngamtatna ma in tua ni naisak seseam bek hi.
4 A nuam niknek na lupna tungah nop om a, khuino sa le tuuno sa taw a kivaak note atu bangza in lauhuai ziam!
5 David bangin la phuak nuam in, tengtongh taw lasak sia dik na sa uh hi.
6 Sapittui khawbeam dimin taalin, paaknamtui phabelte zangh nu hi, ahihang Israel zaancipna tungtaang ah na mau bua uh hi.
7 Tua ahiciang note salin a pai phit tute na hi uh hi. Na biakna poaite le anneak poaite bo tu hi.
8 Vaanglianpipa Topa, Vaanglianbelpa in hi a ciliap huai kidopna tu thupia zo hi: “Israel mite ii kiphatsakna ka ngaimaw hi; amate ii inn nuam mamate ka kii hi. Amate khuapi le a sung a om theampo ngalte ka pia tu hi,” ci hi.
9 Innkuan khat sungah pasal sawm a kikhe le amate thi tu uh hi.
10 Mithi vui tu a kisee sa mithipa ii beepa in, inn sung pan a luang pusuapui tu hi. A beepa in inn sungah a taanglai khat pawpo sia tungah “Tua munah khat po nang taw a om dang a om lai ziam?” ci in sam tu hi. Aw khat in, “Om bo!” ci in zo tu hi.
Tuaciang a beepa in, “Thim in! Topa ii min ngawngawn zongh ih law thaak ngawl natu in kidop kul tu hi,” ci tu hi.
11 Topa in thu a piak tak ciang, innte a lian a no a bebekin kisaattham tu hi.
12 Suangte tungah siphute kinuntaw ziam? Mite in khuital taw tuipi tungah lotho ziam? Tua hikasap note in thutang sia nguu na suaksak uh a, a maan sia a khial na suaksak uh hi.
13 Lodebar khua a kilaak huvau in na kiphasak uh hi. “Karnaim a la zo tu in thahat khom ngawp hi zam,” ci in na kiphasak uh hi.
14 Topa Pathian Vaanglianbelpa mama in, “Israel mite awng, na ngam a la tu in ngamdang ngalkaphonpi khat hong paisak tu khi hi. Tuate in saksang Hamath Mual Ciangh pan thangsang Arabah Lui dong ah note hong zothaw tu hi,” ci hi.