AMOS
Thubu
1
1 Hite sia Tekoa khua pan tuu cingpa khat ahi Amos ii kammalte ahi hi. Judah kumpi in Uzziah maang a, Israel kumpi in Jehoash tapa Jeroboam a khan hun, zinliin ma kum nii lai in, Pathian in Amos tungah Israel huvau hi thute theampo lak hi. Ref 1:1 2 Kum 15:1-7; 2 Khang 26:1-23; 2 Kum 14:23-29
2 Amos in,
“ Topa sia Zion mual pan hawk a;
Jerusalem pan a aw sia hong nging keak hi.
Ngan thana munte ko a,
Carmel mual a lopate vul hi,” ci hi. Ref 1:2 Jol 3:16
Israel ii Ngampaamte tungah Pathian ii Thukhenna.
Syria
3 Topa in, “Damascus mite maw kikik khial kikik ahiciang amate daan pia tatak tu khi hi. Amate in Gilead mite tungah ngilo in vawtsia hi. Ref 1:3-5 Is 17:1-3; Jer 49:23-27; Zec 9:1
4 Tua ahikom Kumpipa Hazael saksa kumpi inn sia meikuang khiakin Kumpi Benhadad ii kulhte haltham tu khi hi.
5 Damascus khuapi kongpite sutham in, Aven Kuam a teang mihingte le Betheden a ukpa heam tu khi hi. Syria mite sia Kir ngam ah luangta tu hi,” ci hi.
Philistia
6 Topa in “Gaza mite maw kikik khial kikik ahiciang amate daan ka pia tatak tu hi. Amate in minam bup paipui in Edom mite tungah salin zuak uh hi. Ref 1:6-8 Is 14:29-31; Jer 47:1-7; Eze 25:15-17; Jol 3:4-8; Zep 2:4-7; Zec 9:5-7
7 Tua ahiciang Gaza khuapi luphung tungah meikuang ka khiak tu a, a kulhte ka haltum tu hi.
8 Ashdod le Ashkelon khuapite a ukte ka heam tu hi. Ekron khuapi daan ka pia tu a, Philistine mite a taanglai theampo thi tu uh hi,” ci hi.
Tyre
9 Topa in, “Tyre mite maw kikik, khial kikik ahiciang amate daan ka pia tatak tu hi. Amate in minam bup Edom ah sal tang tu in paisak a, kipawlmat natu thukimna a vawt sia len ngawl hi. Ref 1:9-10 Is 23:1-18; Eze 26:1—28:19; Jol 3:4-8; Zec 9:1-4; Mt 11:21-22; Lk 10:13-14
10 Tua ahikom Tyre khuapi luphung tungah meikuang ka khiak tu a, a kulhpite ka haltham tu hi,” ci hi.
Edom
11 Topa in, “Edom mite maw kikik khial kikik ahiciang daan ka pia tatak tu hi. Amate in a suapui Israel te savai bangin vai a, hesuak ngawl hi. Amate thin uukna sia ciangtan nei ngawl a, thaisak ngeingawl uh hi.
12 Tua ahikom Teman khuapi tungah meikuang ka khiak tu a, Bozrah kulhpite ka haltum tu hi,” ci hi. Ref 1:11-12 Is 34:5-17; 63:1-6; Jer 49:7-22; Eze 25:12-14; 35:1-15; Oba 1-14; Mal 1:2-5
Ammon
13 Topa in, “Ammon mite maw kikik khial kikik ahiciang amate daan ka pia tatak tu hi. Amate in ngamkeau ngal kisimna sung Gilead khua ah naupaai numeite ngawngawn ii ngil kuikeak uh hi. Ref 1:13-15 Jer 49:1-6; Eze 21:28-32; 25:1-7; Zep 2:8-11
14 Tua ahikom Rabbah khuapi luphungte tungah meikuang ka khiak tu a, a kulhpite ka haltum tu hi. Tuasia ciang ngal kisim ni in auna awsa om ngawp tu a, kidona nasia in vuipi suangval bang phet ma hi tu hi.
15 Amate kumpipa le a uliante saltaang in pai tu uh hi,” ci hi.