7
Stephen ii Thusonna
1 Thiampi Lianbelpa in Stephen munah, “Hi thu a maan ziam?” ci in dongh hi.
2 Stephen in zo kik a, “Suapuite le pate awng, hong ngai tavun! Ih taanghpupi Abraham sia Haran ah teang tu in, a pai ma, Mesopotamia ah a ten laitakin, ama tungah vaanglian Pathian kilak a, Ref 7:2-3 Pian 12-1
3 ‘Na innkuanpuite le na ngam nusia in, kong lak tu ngam ah va pai ta'n,’ ci hi.
4 Tua ahikom a ngam nusia in, Haran ah pai hi. Abraham ii pa a thi zawkciang, tu laitak note teenna hi ngam ah Pathian in kikhiinsak hi. Ref 7:4 Pian 11:31; 12:4
5 Tua laitak hunin Pathian in, Abraham aituam neisa tu in, leitangh metre khat kiimhuam zongh a pia bua lai hi, ahihang Pathian in piak tu in, kamciam pia hi, ama nung pan a suan a paalte atu zongh ahi hi. Pathian ii hi kamciam a piak hunin, Abraham in ta a nei bua hi.Ref 7:5 Pian 12:7; 13:15; 15:18; 17:18
6 Pathian kamciam in hi bang ahi hi: ‘Na suan na paalte sia, ngamdang ah peam tu a, amate sila suakin kum zali tawntung kivawtsia cip tu hi.Ref 7:6 Pian 15:13-14
7 Ahihang a silate tungah a kilawm thukhenna ka tungsak tu a, tua zawkciangin amate tua ngam panin pusuak in, hi sungah amate in kei hong bia tu hi,’ ci hi.Ref 7:7 Pu 3:12
8 Tuasia zawkciangin Pathian in, Abraham sia thuciamna ii lim tu in vunteap atsakna zeksa pia hi. Tua ahikom Abraham in, Isaac sua zawk nipi khat a cin ciangin, a vunteap atsak hi, Isaac in a tapa Jacob a vunteap atsak hi; Jacob in a minthang ih taanghpupite sawm le niite ii vunteap atsak hi.Ref 7:8 Pian 17:10-14; 21:2-4; 25:26; 29:31—35:18
9 “Jacob tate in a suapui Joseph sia eang uh a, Egypt ah sila in na zuak uh hi. Ahihang ama taw Pathian omkhawm hi.Ref 7:9 Pian 37:11; 28; 39:2; 21
10 Tuaciangin a ngim ngana theampo pan suatak pia hi. Egypt kumpipa mai ah, Joseph a kilak ciang, Pathian in thuzawkhuaina le ciimna pia a, tuaciang kumpipa in Joseph sia ngamuk mangpa le kumpi bangkua a uk suaksak hi.Ref 7:10 Pian 41:39-41
11 Tua zawkciang Egypt le Canaan ngam bup ah kialpi tung a, ngimna nasia takin piang hi. Ih taanghpupite in anneak tu nei ngawl a,
12 tuasia ciang Jacob in Egypt ngam ah antang om hi, ci in a zaak ciang, ama in ih taanghpupite ahi a tate sia tuak ah a khat veina in paisak hi. Ref 7:11 Pian 42:1-2
13 A nii veina a pai ciang Joseph in ama le ama a suapuite munah kison a, tuasia ciang, Egypt kumpipa in Joseph innkuanpuite huvau he hi.Ref 7:13 Pian 45:1-16
14 Tua ahikom Joseph in, a pa Jacob tungah thupuaksak a, ama le a innkuan bup, a vekpi a kingawm mihing sawmsali le nga teng sia Egypt ngam ah a pai natu in zasak hi. Ref 7:14 Pian 45:9-10; 17-18; 46:27
15 Tuaciangin Jacob sia Egypt ngam ah pai a, tua munah ama le a tate thi hi. Ref 7:15 Pian 46:1-7; 49:33
16 A luanghawmte sia Shechem ah kitua hi. Abraham ii Hamor minamte tung pan a sum taw a lei, tuak a thaan sia sungah amate kiphum uh hi.Ref 7:16 Pian 23:3-16; 33:19; 50:7-13 Jos 24:32
17 “Abraham tungah Pathian ii kamciam teng, a tunsak tu ciangin, Egypt ngam ah ih minamte sia nasia tak khangto zo hi.Ref 7:17-18 Pu 1:7-8
18 A khakbel ciangin, Joseph a he ngawl kumpi khat sia Egypt ngam uk tu in kipan hi.
19 Ama in ih taanghpupite theambawl in, ngitlona taw a nausente a thi tu in daaipua ah a vawk natu thupia hi.Ref 7:19 Pu 1:10-11,22
20 Hi hun sia Moses ii pian hun hi a, ama in a mealhoi mama patang khat ahi hi. Ama sia inn ah tha thum kikeam a, Ref 7:20 Pu 2:2
21 inn panin a hep uh ciangin, kumpipa ii tanu in, ama sung pan a piang ta bangin vawt a, vaak in taa hi.Ref 7:21 Pu 2:3-10
22 Egypt te ciimna theampo kisinsak a, mihing thupi khat ii kampau luheakzia hong nei hi.
23 “Moses sia kum sawmli a phak ciangin, a minampui Israel te bangbangin kivawt ziam ci in kan tu in khensat hi.Ref 7:23-29 Pu 2:11-15
24 Egypt mite khat in a minampui Israel te khat a vawtsia zazaan sia ama in mu hi, tua ahikom hun tu in pai a, Egypt pa thatlum in phulam hi.
25 Ama ngaisutna ah, a minampuite suatak natu in, Pathian in ama zangh tu hi ci in a mite in tel tu in um a, ahihang amate in a tel bua uh hi.
26 A zing ciangin Israel te nii, kihau in om mu a, ama in lemtua tu in hanciampui hi. ‘Hong ngai tavun, note unau khat na hi uh hi; banghangin khat le khat kihau nu ziam?’ ci hi.
27 A lawmpa a vawtsia sia pa in, Moses sawn a, ‘Akua in nang sia ko hong uk tu le ko tungah, thukhen tu in hong koi ziam?
28 Zeini a Egypt te khat na thalup bangin, kei hong thatlum nuam ni ziam,’ ci hi.
29 Moses in hi thu a zaak ciangin, Egypt ngam pan tai a, Midian ngam ah teang hi. Tua munah tapa nii nei hi.Ref 7:29 Pu 18:3-4
30 “Kum sawmli hong kan zawkciangin Sinai mualhui sennealngam sung sawlpaang kuang khat sungah vantunglalang khat Moses mai ah hong kilak hi.Ref 7:30-34 Pu 3:1-10
31 Moses in a mu teng lamdang sa in, a kitel zaw in a mu thei natu sawlpaang sang neak hi. Ahihang Topa ii aw hi bangin za hi:
32 ‘Kei sia na taanghpupi Abraham, Isaac le Jacob te ii Pathian ka hi hi’ ci hi. Moses lau in liing ngawp a, en ngam ngawl hi.
33 Topa in ama tungah, ‘Na peangdap suut in, banghang ziam cile na dinna mun sia thiangtho hi.
34 Ka minamte Egypt ngam ah vawtsiat a thuakna teng ka mu zo hi. Amate tauna ka za a, amate suatak tu in kong paisuk zo hi. Tu in hong pai ta'n; Egypt ngam ah hong paisak tu khi hi,’ ci hi.
35 “Moses sia Israel te ii a nial pa ahi hi. ‘Akua in nang sia, ko hong uk tu le ko tungah thukhen tu in, hong koi ziam?’ ci in dongh uh hi. Sawlpaang kuang sung pan ama tungah a kilak vantunglalang ii huna taw, Pathian in amate a uk tu le a suaktasak tu in ukpa le hunpa tu in, a thataak pa ahi hi.Ref 7:35 Pu 2:14
36 Ama in Israel te sia Egypt ngam pan pusua pui a, Egypt ngam le San Tuipi ah ahizong, kum sawmli sung sennealngam sungah ahizong, nalamdang laknate le a lamdangte ama in vawt hi.Ref 7:36 Pu 7:5; 14:21; Mi 14:33
37 Israel te tungah, ‘Pathian ii kei hong thataak bangma in, Pathian in note atu kamsaang khat hong paisak tu hi,’ tua pa in noma mi pui khat hi tu hi’ a ci pa sia Moses ahi hi. Ref 7:37 Thkna 8:15-18
38 Sennealngam ah a kikhawmtua Israel mite taw a omkhawm pa sia Moses ahi hi; Sinai mual tungah ama a paupui vantunglalang sia le ih taanghpupite taw tua munah omkhawm a, ei tungah hong piak sawn tu, Pathian ii a nungta thute ama in saang hi.Ref 7:38 Pu 9:1—20:17; Thkna 5:1-33
39 “Ahihang ih taanghpupite in ama thu a ni nuam bua uh hi; amate in Moses puavawk in, Egypt ngam ah heak kik thei le uuk uh hi.
40 Tua ahikom Aaron munah, ‘Eite hong lampui tu in milim pathian pawlkhat hong vawtsak ta'n. Egypt ngam pan hong pusua Moses sia bang tawk hi tu ziam he bua hing,’ ci uh hi.Ref 7:40 Pu 32:1
41 Tuasia ciangin, amate in khuital khat ii lim taw a kibang milim khat vawt a, sangaw biakpiakna nei in, amate vawttawm vangiat khat sia upat piakna in poaikhaam uh hi.Ref 7:41 Pu 32:2-6
42 Tua ahikom Pathian in amate nungngat in, kamsaangte laibu sungah, a om bangma in, van a aksite bia tu in thazau hi:
‘Israel mite awng!
Kum sawmli tawntung
sennealngam sungah,
sa na ngo uh a, nganhing taw
biakpiakna, na vawt uhte sia,
kei tungah hong vawt na hi bua uh hi.Ref 7:42-43 Amo 5:25-27
43 Na puak uh sia Molech
pathian ii tuipuan buk le
noma ii aksi pathian
Rephan lim ahi hi.
Tuate in noma ii na biak tu in,
na vawttawm uh milimte ahi hi.
Tua ahikom Babylon kalh ah
sal in kong puak tu hi,’ kici hi.
44 “Ih taanghpupite in Pathian ompuina a kilakna Puanbuk sia sennealngam sungah keng kawkoai hi. Tua Puanbuk sia Moses tungah Pathian sawl bang le a kilak lim bangin a kivawt ahi hi.Ref 7:44 Pu 25:9,40
45 A khaksang ciangin tua tuipuanbuk a lua, ih taanghpupite in amate mai ah, Pathian ii hawlkeak minamte ii ngam a suan tu in, Joshua taw a pai uh ciangin, tua tuipuan buk sia keng uh hi. David khan hun dong, tua munah om hi.Ref 7:45 Jos 3:14-17
46 Ama in Pathian maipha nga a, Jacob ii Pathian inn tu khat a sak thei natu in Pathian tungah ngen hi.Ref 7:46 2 Sa 7:1-16; 1 Khang 17:1-14
47 Ahihang Pathian inn tu a sa pa sia Solomon ahi hi.Ref 7:47 1 Kum 6:1-38; 2 Khang 3:1-17
48 “Ahihang a saangbel Pathian sia mihingte sak inn sungah a teang bua hi; kamsaangpa ci bangma in,
49 ‘Vantung in ka kumpi tokhum hi,
Topa in ci hi,
tuaciangin leitung sia
ka peang ngakna ahi hi.
Bangbang innte, kei atu
hong saksak tu ni ziam?
kei teen natu mun sia koisung ziam?Ref 7:49-50 Is 66:1-2
50 Hite theampo keima vawtsa hi ngawl ziam?’ Ref 7:51 Is 63:10
51 Stephen in, “Note bangza in thinpui nu ziam! Bangza in note thin in Pathian he ngawl ziam? Pathian kammal na zaak ngawl natu in, bangza in nangong nu ziam! Na taanghpupite bang lian hi nu hi: note zongh in Thaa Thiangtho nalh tawntung nu hi!
52 Na taanghpupite ii a vawtsiat ngawl kamsaang khat beak om ngei kana ziam? Khuangei pek panin, Pathian ii a thutang Naseampa hong pai natu a sonkhol, Pathian kamtaite na thatlum uh hi. Tu in, note in ama leeheak a, suamlum nu hi.
53 Vantunglalangte hong piak Pathian ii thukham a saangte na hi uh hi — ahihang tua thukhamte ni ngawl nu hi!” ci lai hi.
Stephen Suangtum taw Kidenlupna
54 Council sung a kihelte in, Stephen thuson a ngai uh ciangin, amate in thin uukna taw a ha ngoai san uh hi.
55 Ahihang Stephen sia Thaa Thiangtho taw kidim a, vantung ento in, Pathian ii minthanna le Pathianziatsang ah a ding Jesus mu hi.
56 “En vun! Vantung kihong mu khi hi, tuaciang Mihing Tapa sia Pathianziatsang ah, dingin om hi!” ci hi.
57 Council sung kihel mihingte in nging takin au a, a khut taw a bil uh hum hi. Tua zawkciang amate teng in, thakhatin ama del uh a,
58 khuapi pua ah lawn in, suangtum taw deang uh hi. Tua tetti te in amate puantualte sia, Saul kici tangval khat ii kep tu in, aap hi.
59 Amate in Stephen sia, suang taw a hawhua laitakin, ama in Topa biakpui a, “Topa Jesus awng, ka thaa hong saang ta'n!” ci hi.
60 Ama in khupdin a, awnging tak taw, “Topa! hi mite mawna na tepteesak heak in!” a ci zawkciangin thi hi.