20
Macedonia le Achaia ah
1 Tua buaina a thim zawkciang Paul in thu umte khawmtua a, hanthotna kammalte taw vaithakna nei hi. Tuaciang ama vaiding in Macedonia ah paisuak hi.
2 Ama in tuak a ngamte kaantan in pai a, thu tam mamate taw hanthawn hi. Tua zawkciangin Achaia ah pai in,
3 tua munah tha thum taam hi. Syria ah pai tu in a kingin laitak, tuak ah Jew te in ama a thasawm hunlam phawk hi; tua ahikom Macedonia tawnin, heak kik tu khensat hi.
4 Berea khua mi Pyrrhus ii tapa Sopater in ama tonpui hi; Thessalonica khua pan Aristarchus le Secundus; Derbe khua panin Gaius; Asia ngamkhen panin Tychicus le Trophimus; Timothy zongh in tonpui uh hi.
5 Amate pai masa a, Troas panin ko hong ngak hi.
6 Tol saw ngawl Anluum Poai zawkciang Philippi panin, teambaw taw ka ding uh a, ni nga zawkciangin amate taw Troas ah kisitua in, tua munah nipi khat sung hun ka zangh uh hi.
Paul ii Troas khua A haw khakbelna
7 Nino nitakin neakkhopna nei tu in, ka kikaikhawm uh hi. Paul in a zing ciang vaiding tu ahikom, mite paupui a, zankim dong thuson hi.
8 Ka kikhopna uh inn tung dawl sungah meiinn tam ma kide hi.
9 Eutychus kici tangval khat khelki tungah to a, Paul in tatsat ngawlin thuson ahikom, Eutychus zongh a mut suak vaial a, a khakbel ciangin, mutthip in, inn tung dawl thum panin, lei ah taaksuk hi. Amate in a top ciang, ama thi zo hi.
10 Ahihang Paul tuaksuk a, ama tungah bok in koai a, “Patau heak vun, ama nungta lai hi!” ci hi.
11 Tuaciang ama in inn tungah kaato in, anluum baltham in ne hi. Nisua dong amate taw ngei ma thu a son zawkciang, Paul in paisan hi.
12 Amate in tangvalpa sia a inn ah, a nungta in ciapui a, a thin uh nuam mama hi.
Troas pan Miletus ah
13 Koma in teambaw kungah ka pai masa uh a, teambaw taw Assos ka zuan uh hi. Tua munah, Paul in teambaw tungah hong kaa tu ahi hi. Ama in hi bang tu ma in, hong sonsa hi a, ama in lei lam tawnin tua munah pai hi.
14 Assos ah ka kisik uh ciangin, teambaw tungah ama hong kaato a, Mitylene khua ah ka paisuak uh hi.
15 Tua mun panin teambaw taw ka ding uh a, a zing ciangin, Chios ngal ka theng uh hi. Ni khat zawkciangin, Samos ka theng uh a, a zing ciangin, Miletus ka theng uh hi.
16 Asia ngamkhen sung tengah hun a bo thong ngawl natu in, Paul in Ephesus khua kaantan in, teambaw taw pai tu khensat hi. Hi thei le Pentecost ni lapin, ama Jerusalem khua a theng tu in pai memeang hi.
Ephesus Upate tungah Paul ii Vaithakna
17 Paul in Miletus panin, Ephesus ah thu zasak a, pawlpi upate ama taw a kimu natu in vaitha hi.
18 Amate hong thet ciangin, Paul in amate tungah, “Asia ngamkhen ah kong thet phit ni pan kipan no taw hun bup bangbangin zangh khi ziam, ci sia na heak uh ahi hi.
19 Jew te ii hong thasawm hu in, haksatna hunte sungah Topa ii naseam bangin kiniamkhiakna theampo le, thitui tam mama taakin na ka seam zo hi.
20 Mipite mai le noma inn uh ah thuhilna le hilciannate kong nei ciangin, note phattuam natu in bangma kheet ka nei ngawl sia na heak uh ahi hi.
21 Jew te le Gentile te tungah a kibangin a mawna tetek pan Pathian sangah kiheak kik a, ih Topa Jesus a up natu in, thupi takin kong phawksak hi.
22 Tu in Thaa Thiangtho thu ka nitna taw Jerusalem ah pai tu khi hi, tua munah bang tat tu khi ziam he ngawl khi hi.
23 Ngimnate le thonginn in, keima hong ngak hi, ci in khuapi sim ma ah Thaa Thiangtho in hong phawksak hi ci sia bek ka he hi.
24 Ahihang keima nuntakna sia bangma man nei ka sa bua hi; keima vaipuak ka khuangkhim natu le Topa Jesus ii nasep hong piak ahi, Pathian ii thuthiamna Lungdamna Thupha ka thansak tu ka man thiang tu bek ka uuk hi. Ref 20:24 2 Tim 4:7
25 “Pathian Ngam thuhil in, note theampo sungah kong vak zo hi. Tuaciang note sung pan kuama in, kei nong mu kik ngei nawn ngawl tu uh sia tu in ka he hi.
26 Tua ahikom tuni mama in, no tungah a ciliaphuai takin kong taangko hi: a mangthang khat po na om uh le, kei ii ka vaipuak lel hu hi ngawl tu hi.
27 Banghang ziam cile Pathian tupna a buppi in kong sonna ah bangma kheet nei ngawl khi hi.
28 Tua ahikom noma le noma kikeam tavun a, Thaa Thiangtho ii noma khut sung a hong aap tuuhonte zongh en in keam tavun. A Tapa ii chisan tungtawnin, ama atu a piansak Pathian ii pawlpi ii tuucingte na hi tavun.
29 Kong nusiat zawkciangin, a kiitakhuai ngiate, no sungah hong pai tu a, tua tuuhon a khoaikhet ngawl tu sia ka he hi.
30 Noma pawlsung pan ma in, pawlkhat in thu umte sia leilot thu taw amate a zui tu in, a zol tu hun hong theng tu hi.
31 Tua ahiciang encik tavun, kum thum sung sun taw zan taw thitui tam ma taakin note khat sim kong hilcian sia ciamtee tavun.
32 “Tu in no sia Pathian kepna sung le a thuthiamna thu sungah kong aap hi, tuasia in ama mihing theampo hong puuato thei a, Pathian thuphate hong pia thei hi.
33 Khamh ahizong, ngunn ahizong, puansilhte ahizong, kuama ii neisa ka dungawk ngei bua hi.
34 Ka kitholpuite le keima kitaangsapna teng ka sik natu in hi ka khutte taw na ka sep sia noma tatak ma in, na he uh hi.
35 Topa Jesus mama in, ‘Saanna sangin piakna in lungdamna tamzaw hi’, a ci thu phawk kawmin, hi bangin nasia tak na sepna taw na theampo ah, a thazawmte ih hu nanak tu hi, ci in no tungah kong lak zo hi,” ci hi.
36 Paul in a son tu teng a man ciang, amate taw khupdin in, thungen hi.
37 Amate in ama koai a namhin, a vaithak uh ciang, a vekpi ma in kap uh hi.
38 Ama a mu kik nawn ngawl natu, a son hu in, amate a tuanin khuangai uh hi. Tuaciang amate in teambaw kungah ama tha uh hi.