SAWLTAKTE
Ngamtatna
(Acts of the Apostles)
Sawltakte sia khen thum in kikhen thei hi. Jesus huvau Lungdamna Thupha a zai vaial a, a kizelna le pawlpite a kiphuna hi a, (1) Jesus van kaa zawkciang Tapidawte ii Jerusalem ah a tukna a dianna, (2) Palestine ngam mundang ah tua thu a kikeau zia le (3) Mediterranean ngam Rome dongin a kikeauna thu hi.
Sawltakte sung a thupi khat sia Pentecost ni in Jerusalem khua ah thu umte tungah hong pai Thaa Thiangtho ii nasepna hi a, tua Thaa Thiangtho in pawlpi le a lampuite ii hi laibu sungah a ki at thu le la te theampo sungah, lampui in tha a piakna thu ahi hi. Tapidaw thu masa sia thuhilna pawlkhat sungah kitom son a, tuaciang Sawltak sungah a kikhum thute in, a umte ii nuntakna sung le, pawlpi sung kipawlna ah thahatna om hi ci thu lak hi.
1
1 Theophilus awng:
Ka laibu masa sia sungah Jesus nasep a kipat pan a, kipan a sepna le hilnate theampo kong at zo a, Ref 1:1 Lk 1:1-4
2 ama vantung ah a kilaakto ni dong, huam hi. A kilaak to ma in, sawltak tu a tealte tungah Thaa Thiangtho vaang taw thupiakna nei hi.
3 A thi zawk ni sawmli sungah amate tungah tamvei ma kilak a, ama sia nungta nginge ahi hunlam up laak om ngawl tu in, a nanam in kilak hi. Ama sia sawltakte in mu uh a, Pathian Ngam thu ama in sonpui hi.
4 Amate hong kikhoptua uh ciangin, hi bangin thupia hi: “Jerusalem nusia heak vun, no tungah kong sonsa Pa ii kamciam hong piaksa letsong sia, na ngak vun, Ref 1:4 Lk 24:49
5 John in tuidam taw tui hong phum hi, ahihang ni tawmvei no sungin, note Thaa Thiangtho taw na ki baptize tu uh hi,” ci hi.Ref 1:5 Mt 3:11; Mk 1:8; Lk 3:16; Jn 1:33
Jesus Vantung ah Kilato
6 Sawltakte in Jesus taw a kisik uh ciangin, “Topa awng, Israel mite tungah a Ngam na pia kik tu ziam?” ci in dongh uh hi.
7 Jesus in, “Hunte le thunei theinate sia ka Pa zeak hi a, bang hun ciang hi tu cisia no heak tu thu hi ngawl hi.
8 Ahihang Thaa Thiangtho note tungah hong pai ciang, vaangletna taw na kidim tu uh a, Jerusalem pan kipan Judea ngam bup le Samaria ngam le leimong dongin, ka tetti na hi tu uh hi,” ci hi.Ref 1:8 Mt 28:19; Mk 16:15; Lk 24:47-48
9 Hi teng a ci zawkciang, amate mu tangin, van ah ama kilato a, meeikaai in lia hi.Ref 1:9 Mk 16:19; Lk 24:50-51
10 Ama ii paina san vantung salh in, a om uh laitakin, puankaang silh pasal nii sia amate kungah hong ding a,
11 amate in, “Galilee mite awng, van ento in banghangin tua munah ding top nu ziam? Hi Jesus sia note kung pan vantung ah a kilaak to na mu uh bang tatak ma in hong pai kik tu hi,” ci uh hi.
Judas Iscariot Laihpa
(Mt 27:3-10)
12 Tua zawkciang Sawltakte in Jerusalem pan kilometre khat bang a khualana Olive Mual panin, Jerusalem ah cia kik uh hi.
13 Amate Jerusalem khua sungah tumin, a taam ngeina mun inn tung dawl sungah om uh hi. Amate teng sia Peter, John, James le Andrew, Philip le Thomas, Bartholomew le Matthew, Alphaeus, ii tapa James, Minam it Simon, le James ii tapa Judas ahi uh hi.Ref 1:13 Mt 10:2-4; Mk 3:16-19; Lk 6:14-16
14 Jesus ii suapui pate, a nu Mary le numei dangte taw amate pawlkhat, thungen tu in kikhawmtua nithi uh hi.
15 Ni tawmvei zawkciangin, thu um teng kikhopna khat om a, mihing za le kul bang pha uh hi. Tuaciang Peter sia thuson tu in, ding hi.
16 “Ka suapuite awng, Thaa Thiangtho in David tungtawnin, Jesus a man tute, lam a lak Judas huvau a sonkholna laithiangtho kammalte a taangtut kul hi.
17 Judas sia koma ii pawl mi khat ahi hi, banghang ziam cile koma ii nasepna sungah, ama zongh nasep khat nei tu in, a kiteal pa ahi hi.”
18 Judas in ama ii ngitlo ngamtatna taw a nga sum taw lo khat lei a, tuasung ah pukvawk in thi hi; ama sia puaktham in, a ngil keekeak hi.Ref 1:18-19 Mt 27:3-8
19 Jerusalem ah a teang mihing theampo in tua thu za ahikom, tua lo sia, amate kam in Akeldama, a khiakna sia “Chisan Lo” ci in min phuak uh hi.
20 “Banghang ziam cile Psalm late ii sungah,
‘Ama ii bangkua awngthong tahen a,
kuama a teang om heak hen,’ ci in ki at a,
‘A nasepna mun zongh
midang khat in laih tahen,’ ci in ki at si hi. Ref 1:20 Ps 69:25; 109:8
21 “Tua ahikom, Topa Jesus thaw kikna tetti in a pang tu mihing khat kote sungah hong kibelap kul hi.
22 Ama sia bangbang mihing hi tu ziam cile, John ii tuiphumna huvau a hil hun pan kipan Jesus van ah a kilaak to dong a kilaklaw teng, Jesus khualhawna theampo sung, ko pawl sungah hong kihel top khat ahi kul hi,” ci hi.Ref 1:22 Mt 3:16; Mk 1:9;16:19; Lk 3:21;24:51
23 Tua ahikom amate in, mihing nii ii min aap uh hi. Barsabbas a kici Joseph Justus zongh kici si khat le, Matthias ahi uh hi.
24 Tua zawkciang amate in, “Topa awng, mihing theampo ii thinsung na he hi. Tua ahiciang, Topa awng, hite nii sung pan koisia teal ni ziam hong lak ta'n.
25 Judas in a zot natu zuanin a nusiat sawltak za a awng sia dip natu in hong hesak ta'n” ci in thungen uh hi.
26 Tua zawkciangin amate in, tua mite nii sung pan, a kiteal natu in, lai aisaan a, Matthias kiteal ahikom, sawltak sawm le khat te ii pawl sungah ama kibelap hi.