2
1 ပှၤကလုာ်လၢအတၢ်မဲာ်ဆှးတအိၣ်ဘၣ်ဧၢ, အိၣ်ဒီးတၢ်သးဆး,
2 တချုးလၢသုဘၣ်တၢ်တြူာ်ကွံာ်သုဒ်ဖ့လၢကလံၤအူဒံကွံာ်အသိး, တချုးလၢယွၤအတၢ်သးကဲၤထီၣ်လီၤဘၣ်လၢသုလိၤ, တချုးလၢအပာ်ဖျါထီၣ်အတၢ်သးကဲၤထီၣ်ဒံးဘၣ်န့ၣ်တက့ၢ်.
3 ကယဲၢ်ပှၤလၢအဆီၣ်လီၤအသးလၢထံဧိၤကီၢ်ဧိၤအပူၤ, ပှၤလၢအစူၢ်အတၢ်မၤလိာ်တဖၣ်သ့ၣ်ဧၢ, ဃၣ်က့ၤသုသးဆူ ယွၤအအိၣ်တက့ၢ်. မၤတၢ်တီတၢ်လိၤဒီးဆီၣ်လီၤသုသးလၢယွၤအမဲာ်ညါန့ၣ်တက့ၢ်. ဘၣ်တဘၣ်မုၢ်တနံၤလၢယွၤပာ်ဖျါထီၣ်အတၢ်သးထီၣ်န့ၣ်သုကပူၤ ဖျဲးလၢအတၢ်စံၣ်ညီၣ်န့ၣ်လီၤ.
4 ပှၤတအိၣ်တီၢ်ဘၣ်နီတဂၤလၢဝ့ၢ်ဂါစၤအပူၤဘၣ်. ဝ့ၢ်အၤၡကလိၣ်ကဘၣ်တၢ်ဟးဂီၤလဲၤသဒၣ်ကွံာ်အီၤလီၤ. ပှၤလၢဝ့ၢ်အၤစဒိးတဖၣ်ကဘၣ်တၢ်ဟီထီၣ်ကွံာ်အီၤလၢတမုၢ်ထူၣ် အတီၢ်ပူၤဒီးပှၤလၢဝ့ၢ်ဧ့ကြိၣ်တဖၣ်ကဘၣ်တၢ်နီၣ်ထီၣ်ကွံာ်အီၤ လၢအဝ့ၢ်ပူၤန့ၣ်လီၤ.
5 သုဝဲပှၤဖလ့ၡသးဖိ, ပှၤအိၣ်ဝဲဆိးဝဲလၢပီၣ်လဲၣ်နံၤသ့ၣ်တဖၣ်ဧၢ, သုဘၣ်တၢ်စံၣ်ညီၣ်ဃါမနၤလီၤ. ယွၤဟ့ၣ်လီၤတ့ၢ်တၢ်စံၣ်ညီၣ်လၢသုဖီခိၣ်လီၤ. အဝဲဒၣ်ကမၤဟးဂီၤကွံာ်သုဒီးပှၤလၢသုကျါတအိၣ်တီၢ်ဘၣ်နီတဂၤဘၣ်.
6 သုတၢ်အိၣ်တၢ်ဆိးအလီၢ်လၢပီၣ်လဲၣ်နံၤကကဲထီၣ်တၢ်အီၣ်ဆၣ်အလီၢ် အိၣ်ဒီးပှၤကွၢ်သိအဒဲတဖၣ်ဒီးသိအကရၢတဖၣ်န့ၣ်လီၤ.
7 ပှၤဂီၢ်မုၢ်လၢကီၢ်ယူဒၤလၢအအိၣ်မူတ့ၢ်တဖၣ်ကဟံးန့ၢ်သု တၢ်အိၣ်တၢ်ဆိးအလီၢ်န့ၣ်လီၤ. အဝဲသ့ၣ်ကဒုးကိာ်လီၤအသိ ဒီးအမဲာ်တဲးလဲးတဖၣ်ဖဲန့ၣ်ဒီးကမံဝဲလၢပှၤအၤၡကလိၣ်ဖိအ ဟံၣ်တဖၣ်အပူၤန့ၣ်လီၤ. ယွၤ, အဝဲသ့ၣ်အကစၢ်ယွၤကအိၣ်ဒီးအီၤဒီးဒုးဘီၣ်ထီၣ်ညီထီၣ် ကဒီးအီၤလီၤ.
8 ယွၤသ့တၢ်လၢာ်စံးဝဲ, “ယနၢ်ဟူတ့ၢ်လံပှၤမိၤအးဖိဒီးပှၤဧၣ်မိၣ်ဖိဒုၣ်ဒွဲၣ်ဒီး ကတိၤဆါယပှၤဂီၢ်မုၢ်ဒီးကတိၤဒိၣ်ကတိၤသွါအသးလၢကဂုာ်န့ၢ် ကွံာ်အဝဲသ့ၣ်အကီၢ်န့ၣ်လီၤ.
9 ဒ်ယမ့ၢ်နီၢ်နီၢ်ယွၤလၢအမူဝဲ, ပှၤအံၣ်စရ့လးဖိအကစၢ်ယွၤအသိးန့ၣ်ယဆိၣ်တၢ်လၢကီၢ်မိၤအးဒီး ကီၢ်ဧၣ်မိၣ်ကဘၣ်တၢ်မၤဟးဂီၤကွံာ်အီၤဒ်ဝ့ၢ်စဒိၣ်ဒီးဝ့ၢ်ဂမိၤရၤ အသိးန့ၣ်လီၤ. အဝဲသ့ၣ်ကကဲထီၣ်အံသၣ်အပူၤတဖၣ် အလီၢ်တတီၤဒီးတၢ်ဟးဂီၤအထူအယိာ်လၢအဘၣ် တၢ်ခဲဘၢကွံာ်အီၤလၢနီၣ်ဧိၤမံၤဧိၤန့ၣ်လီၤ. ယပှၤဂီၢ်မုၢ်လၢအအိၣ်မူတ့ၢ်တဖၣ်ကဂုာ်န့ၢ်မၤဟးဂီၤဒီးဟံး န့ၢ်အကီၢ်န့ၣ်လီၤ.”
10 တၢ်န့ၣ်မ့ၢ်ကီၢ်မိၤအးဒီးကီၢ်ဧၣ်မိၣ်အပှၤဂီၢ်မုၢ်တဖၣ်ကဘၣ်တၢ် စံၣ်ညီၣ်လၢအတၢ်ပာ်ထီၣ်ထီအသးဒီးအတၢ်ပာ်ကဖၢလၢ အသးဒီးအတၢ်ဒုၣ်ဒွဲၣ်ယွၤသ့တၢ်လၢာ်အပှၤဂီၢ်မုၢ်အဃိဒ် လဲၣ်ဒ်လဲၣ်န့ၣ်လီၤ.
11 ယွၤကမၤပျံၤမၤဖုးအဝဲသ့ၣ်လီၤ. အဝဲကမၤဆံးလိီၤစှၤလီၤကစၢ်တဖၣ်လၢဟီၣ်ခိၣ်ချၢဒီဘ့ၣ်ဆူတၢ် နီတမံၤအပူၤန့ၣ်လီၤ. တုၤနုၤတစုပှၤကလုာ်ခဲလၢာ်ကဘူၣ်ထီၣ်ဘါထီၣ်အီၤလၢအထံအကီၢ် ဒၣ်ဝဲအပူၤန့ၣ်လီၤ.
12 ယွၤကမၤသံကွံာ်စ့ၢ်ကီးပှၤကူၤၡးဖိတဖၣ်န့ၣ်လီၤ.
13 ယွၤကသူအစိအကမီၤလၢကမၤဟးဂီၤကီၢ်အၤၡူၢ်န့ၣ်လီၤ. ကဒုးကဲထီၣ်ဝ့ၢ်နံၤနဝ့လၢတၢ်ဟးဂီၤအိၣ်သယုၢ်အလီၢ်, မဲးမုၢ်ခိၣ်လၢထံတအိၣ်အလီၢ်န့ၣ်လီၤ.
14 ဒီးကကဲထီၣ်တၢ်လီၢ်တတီၤလၢသိ, မဲာ်တဲးလဲးဒီးကယဲၢ်ဆၣ်ဖိကီၢ်ဖိကိးဖုကိးကလုာ်ဒဲးကမံ လီၤဝဲန့ၣ်လီၤ. ဒိကအိသ့ၣ်တဖၣ်ကအိၣ်လၢတၢ်ဟးဂူာ်ဟးဂီၤန့ၣ် အကျါ, ဒီးကကအုကစွါထီၣ်လၢပဲတြီတဖၣ်န့ၣ်လီၤ. စိးဝၣ်ဃးတဖၣ်ကတူထီၣ်ဝဲလၢတြဲၤခီၣ်ထံးတဖၣ်န့ၣ်လီၤ. အတၢ်သူၣ်ထီၣ်တဖၣ်လၢအဘၣ်တၢ်ဘှီအီၤလၢသ့ၣ်ဆှိးအ့ရ့းန့ၣ်ဘၣ် တၢ်ဘ့ၣ်ကွံာ်အိးကွံာ်လၢာ်လံ.
15 တၢ်န့ၣ်မ့ၢ်တၢ်ကမၤအသးဒီးဝ့ၢ်လၢအပာ်ကဖၢလၢ အသးလၢအစိအကမီၤဒၣ်ဝဲဒီးဆိကမိၣ်လီၤအသးလၢ အပူၤဖျဲးလံန့ၣ်လီၤ. အပှၤဝ့ၢ်ဖိသ့ၣ်တဖၣ်ဆိကမိၣ်ဝဲလၢအဝဲသ့ၣ်အဝ့ၢ်မ့ၢ်တၢ်အဒိၣ် ကတၢၢ်လၢဟီၣ်ခိၣ်ချၢလီၤ. ကကဲထီၣ်တၢ်အိၣ်သယုၢ်အလီၢ်တတီၤဖဲဆၣ်ဖိကီၢ်ဖိအမံၤတဖၣ်အိၣ် ဘှံးအိၣ်သါဝဲန့ၣ်လီၤ. ကယဲၢ်ပှၤလၢအလဲၤတြူာ်အီၤကိးဂၤဒဲးကသံးက့ၤအသးဆူအလီၢ်ခံ လၢတၢ်ပျံၤတၢ်ဖုးအပူၤန့ၣ်လီၤ.