6
1 ယအိၣ်ဒီးတၢ်ထံၣ်လၢညါခီအဂၤတမံၤကဒီးလီၤ. တဘျီအံၤ, ယထံၣ်လ့ၣ်ကဟၣ်လွံၢ်ဆိလၢအဟဲထီၣ်လၢကစၢၢ် တိၢ်ဘီခံဖျၢၣ်အကဆူးန့ၣ်လီၤ.
2 လ့ၣ်ကဟၣ်အခီၣ်ထံးတဆိဘၣ်တၢ်တွံၢ်အီၤလၢကသ့ၣ်ဂီၤတဖၣ်, ခံဆိတဆိဘၣ်တၢ်တွံၢ်အီၤလၢကသ့ၣ်သူတဖၣ်,
3 သၢဆိတဆိဘၣ်တွံၢ်အီၤလၢကသ့ၣ်ဝါတဖၣ်, ဒီးလွံၢ်ဆိတဆိဘၣ်တၢ်တွံၢ်အီၤလၢကသ့ၣ်ဂီၤဃ့တဖၣ်လီၤ.
4 အန့ၣ်ဒီးယသံကွၢ်ကလူးန့ၣ်, “တၢ်ဒိၣ်ဧၢ, လ့ၣ်ကဟၣ်တဖၣ်အံၤအခီပညီမ့ၢ်တၢ်မနုၤလဲၣ်.”
5 အဝဲစံးဆၢယၤ, “တၢ်တဖၣ်အံၤမ့ၢ်ကလံၤလွံၢ်ကျိၤလၢအဟဲဝဲဒၣ် လၢဟီၣ်ခိၣ်ဒီဘ့ၣ်အယွၤအအိၣ်လီၤ.”
6 လ့ၣ်ကဟၣ်လၢအဘၣ်တၢ်တွံၢ်အီၤလၢကသ့ၣ်သူ တဖၣ်န့ၣ်လဲၤဝဲဒၣ်ဆူကလံၤစိးတကပၤဆူကီၢ်ဘၤဘူၤလိၣ်, လၢအဘၣ်တၢ်တွံၢ်အီၤလၢကသ့ၣ်ဝါတဖၣ်န့ၣ်လဲၤ ဝဲဒၣ်ဆူမုၢ်နုာ်တကပၤ, ဒီးလၢအဘၣ်တၢ်တွံၢ်အီၤလၢကသ့ၣ်ဂီၤဃ့ တဖၣ်န့ၣ်လဲၤဝဲဒၣ်ဆူကီၢ်လၢအအိၣ်လၢကလံၤထံးတကပၤန့ၣ်လီၤ.
7 ဖဲကသ့ၣ်တဖၣ်ဟဲထီၣ်ဝဲန့ၣ်, အဝဲသ့ၣ်အသူၣ်ဆူၣ်သးဂဲၤလၢကဃု သ့ၣ်ညါတၢ်လၢဟီၣ်ခိၣ်တုၤဒၣ်လဲာ်အိၣ်ခိးစူၤသးတကဲဘၣ်န့ၣ်လီၤ. ကလူးစံးဝဲဒၣ်, “လဲၤဒီးဃုသ့ၣ်ညါဟီၣ်ခိၣ်တက့ၢ်.” ဒီးအဝဲသ့ၣ်လဲၤမၤဝဲဒ်န့ၣ်လီၤ.
8 အန့ၣ်ဒီးကလူးကိးထီၣ်ဆူယအိၣ်, “ကသ့ၣ်တဖၣ်လၢအလဲၤဆူကလံၤစိးတကပၤဆူကီၢ်ဘၤဘူၤလိၣ်န့ၣ် မၤဂၢၢ်က့ၤယွၤအတၢ်သးထီၣ်လံ.”
9-10 ယွၤဟ့ၣ်လီၤယၤလၢတၢ်ကစီၣ်အံၤလီၤ. အဝဲစံးဝဲ, “ဟံးန့ၢ်တၢ်ဟ့ၣ်ကနၢၤတဖၣ်လၢအဘၣ်တၢ်ဟ့ၣ်အီၤလၢပှၤဘၣ်တၢ်စိာ် မၢကဲကုၢ်တဖၣ်လၢအမ့ၢ်ဝဲ, စီၤဃ့လဒဲၤ, ဒီးစီၤတိၤဘံယၤ, ဒီးစီၤယဒၤယၤ, ဒီးလဲၤတဘျီဃီဆူစီၤစဖါနယၤအဖိခွါစီၤယိၤၡံယၤအဟံၣ်န့ၣ်တက့ၢ်. ပှၤတဖၣ်အံၤခဲလၢာ်ဟဲက့ၤကဒါက့ၤတ့ၢ်လၢတၢ် လဲၤကဲကုၢ်လၢကီၢ်ဘၤဘူၤလိၣ်အပူၤန့ၣ်လီၤ.
11 မၤကဲထီၣ်ခိၣ်သလုးတဖျၢၣ်လၢစ့ဒီးထူလၢအဝဲသ့ၣ်တဖၣ် ဟ့ၣ်တ့ၢ်ဒီးဒုးကုာ်ထီၣ်အီၤလၢစီၤယိၤစါဒးအဖိခွါ, ပှၤလုၢ်တၢ်အခိၣ်အဒိၣ်ကတၢၢ်စီၤယိၤၡူအခိၣ်လိၤတက့ၢ်.
12 တဲဘၣ်အီၤလၢသ့တၢ်လၢာ်ယွၤစံးဝဲလၢ, ပှၤကညီလၢအဘၣ်တၢ်ကိးအီၤလၢတၢ်အဒ့တဂၤန့ၣ်ကဘီၣ်ထီၣ် ညီထီၣ်ဝဲဖဲအအိၣ်ဝဲအလီၢ်, ဒီးကဘှီထီၣ်ကဒါက့ၤယွၤအတၢ်လုၢ်ဟံၣ်လီၤ.
13 အဝဲမ့ၢ်ပှၤတဂၤလၢကဘှီထီၣ်တၢ်လုၢ်ဟံၣ်န့ၣ်, ဒီးဒိးန့ၢ်တၢ်လၤကပီၤဒ်အကြၢးဒီးစီၤပၤတဂၤအသိး, ဒီးအဝဲကပၢအပှၤဂီၢ်မုၢ်န့ၣ်လီၤ. ပှၤလုၢ်တၢ်အခိၣ်တဂၤကဆၢထၢၣ်ဖဲအလီၢ်ပစိာ်ကပၤ, ဒီးအဝဲသ့ၣ်ကမၤသကိးတၢ်လၢတၢ်ဃူတၢ်ဖိးဒီးတၢ် ဘၣ်လိာ်ဖိးဒ့အပူၤလီၤ.
14 ခိၣ်သလုးန့ၣ်ကမ့ၢ်တၢ်သ့ၣ်နီၣ်ထီၣ်တမံၤလၢယွၤအတၢ် လုၢ်ဟံၣ်အပူၤ, လၢတၢ်မၤလၤမၤကပီၤစီၤဃ့လဒဲၤ, စီၤတိၤဘံယၤ, စီၤယဒၤယၤ, ဒီးစီၤယိၤၡံယၤတဖၣ်အဂီၢ်လီၤ.
15 ပှၤတဖၣ်လၢအအိၣ်ဖးယံၤန့ၣ်ကဟဲဒီး မၤတၢ်လၢတၢ်ဘှီထီၣ်ကဒါက့ၤယွၤအတၢ်လုၢ်ဟံၣ်အဂီၢ်လီၤ. ဒီးဖဲတၢ်ဘှီထီၣ်ကဒါက့ၤအီၤန့ၣ်, သုကသ့ၣ်ညါလၢသ့တၢ်လၢာ်ယွၤမၢလီၤယၤဆူသုအိၣ်လီၤ. တၢ်အံၤခဲလၢာ်ကမၤအသးဖဲလၢသုစူၢ်ယွၤ, သုကစၢ်ယွၤအ ကလုၢ်လၢလၢပှဲၤပှဲၤအခါန့ၣ်လီၤ.”