2
1 မ့မ့ၢ်နဲဒၣ်အံၤ, သိၣ်လိတၢ်လၢအဃူဃီၣ်လီၤပလိာ်ဒီးတၢ်သိၣ်လိသီလိ အမ့ၢ်အတီတက့ၢ်.
2 သိၣ်လိပှၤလၢအသးပှၢ်တဖၣ်လၢကပာ်အသးသညူးသပှၢ်, ကအိၣ်မူကဒုလီၤတံၢ်, ဒီးကပၢၤသူၣ်ပၢၤသးအဂီၢ်န့ၣ်တက့ၢ်. အဝဲသ့ၣ်ကဘၣ်အိၣ်ဒီးတၢ်စူၢ်တၢ်နာ်အမ့ၢ်အတီ, တၢ်အဲၣ်တၢ်ကွံ, ဒီးတၢ်သ့တူၢ်တၢ်န့ၣ်လီၤ.
3 ဒ်န့ၣ်အသိး, သိၣ်လိပိာ်မုၣ်သးပှၢ်တဖၣ်လၢကအိၣ်မူဒီသူၣ်ပာ်သးဒ် ပိာ်မုၣ်ကြၢးအိၣ်မူဝဲအသိးလၢအမ့ၢ်တၢ်အိၣ်မူအစီအဆှံန့ၣ်လီၤ. အဝဲသ့ၣ်တဘၣ်သီၣ်ဝံသဲကလၤ, မ့တမ့ၢ်ကဲကုၢ်လၢစပံးထံ အဖီလာ်န့ၣ်ဘၣ်. အဝဲသ့ၣ်ကဘၣ်သိၣ်လိတၢ်လၢအဂ့ၤ,
4 ဒ်သိးပိာ်မုၣ်လၢအသးစၢ်တဖၣ်ကအဲၣ်ဖိအဲၣ်ဝၤ,
5 ကပၢၤသူၣ်ပၢၤသးဒီးကကဆှီဝဲ, ဒီးကမ့ၢ်မါလၢအကွၢ်ဟံၣ်ကွၢ်ဃီဂ့ၤဂ့ၤလၢအစူၢ်အဝၤ အကလုၢ်တဖၣ်, ဒ်သိးပှၤသုတကတိၤအၢတၢ်သးခုကစီၣ်လၢ အဟဲလၢကစၢ်ယွၤအအိၣ်တဂ့ၤအဂီၢ်န့ၣ်လီၤ.
6 ဒ်န့ၣ်အသိးသဆၣ်ထီၣ်ပှၤပိာ်ခွါသးစၢ်တဖၣ်အခံလၢ အကပၢၤသူၣ်ပၢၤသးအဂီၢ်န့ၣ်တက့ၢ်.
7 လၢတၢ်ခဲလၢာ်အပူၤန့ၣ်, နကစၢ်ဒၣ်နဲနကဘၣ်ကဲထီၣ် တၢ်ဒိတၢ်တဲာ်လၢတၢ်သကဲာ်ဂ့ၤပဝးဝါအဂီၢ်န့ၣ်လီၤ. အိၣ်ဒီးတၢ်သူၣ်တီသးလိၤဒီးပာ်နသးသညူးသပှၢ် လၢနတၢ်သိၣ်လိသီလိအပူၤန့ၣ်တက့ၢ်.
8 သူတၢ်ကတိၤအမ့ၢ်အတီလၢပှၤဃုတုာ်အတၢ်ကမၣ်တသ့ ဘၣ်, ဒ်သိးနဒုၣ်နဒါတဖၣ်ကဘၣ်တၢ်မၤမဲာ်ဆှးအီၤမ့ၢ်လၢ အကကတိၤအၢကတိၤသီပှၤအလီၢ်တအိၣ်နီတမံၤဘၣ်အဃိ န့ၣ်တက့ၢ်.
9 ကုၢ်တဖၣ်ကဘၣ်ဒိးပၢအသးလၢအကစၢ်ဒီးမၤဘၣ်အဝဲသ့ၣ် အသးလၢတၢ်ခဲလၢာ်အပူၤလီၤ. အဝဲသ့ၣ်တဘၣ်ကတိၤဆၢက့ၤအကစၢ်တဖၣ်ဘၣ်,
10 ဒီးတဘၣ်ဟုၣ်အတၢ်ဘၣ်. မ့မ့ၢ်တခီ, အဝဲသ့ၣ်ကဘၣ်ဒုးနဲၣ်ဝဲလၢမ့ၢ်ပှၤအဂ့ၤအဝါဒီး အကလုၢ်တီဒီးအကစၢ်ထီဘိဒ်သိးလၢအတၢ်မၤခဲလၢာ် အပူၤန့ၣ်, ပှၤကစံးထီၣ်ပတြၢၤတၢ်သိၣ်လိသီလိဘၣ်ထွဲဒီး ကစၢ်ယွၤ, ပတၢ်အုၣ်က့ၤခီၣ်က့ၤကစၢ်အဂီၢ်န့ၣ်လီၤ.
11 အဂ့ၢ်ဒ်အံၤ, ကစၢ်ယွၤလီၣ်ဖျါထီၣ်အဘျုးအဖှိၣ်လၢပှၤဟီၣ်ခိၣ်ဖိ ခဲလၢာ်ကဘၣ်တၢ်အုၣ်က့ၤခီၣ်က့ၤအီၤအဂီၢ်လီၤ.
12 တၢ်ဘျုးတၢ်ဖှိၣ်အဝဲန့ၣ်, သိၣ်လိပှၤလၢပကညိကွံာ်တၢ်တယူးတယီၣ်ယွၤ အတၢ်အိၣ်မူဒီးဟီၣ်ခိၣ်အတၢ်သူၣ်လီသးကွံတဖၣ်, ဒီးအိၣ်မူလၢတၢ်ပၢၤသူၣ်ပၢၤသး, အိၣ်မူတီတီလိၤလိၤ, ဒီးအိၣ်မူယူးယီၣ်ယွၤလၢဟီၣ်ခိၣ်အံၤအပူၤ,
13 ဖဲပအိၣ်ခိးမုၢ်နံၤဘၣ်ဆိၣ်ဂ့ၤလၢပမုၢ်လၢ်တ့ၢ်, ဖဲပကစၢ်ယွၤလၢအဒိၣ်ဝဲ ဒီးပှၤအုၣ်က့ၤခီၣ်က့ၤပှၤယ့ၣ်ၡူးခရံာ်အလၤကပီၤ ကအိၣ်ဖျါထီၣ်ဝဲန့ၣ်လီၤ.
14 အဝဲဒၣ်ဟ့ၣ်လီၤအသးလၢပဂီၢ်ဒ်သိးကမၤထူၣ်ဖျဲးပှၤလၢတၢ် အၢတၢ်သီခဲလၢာ်ဒီးကဒုးကဲထီၣ်ပှၤ, ပှၤတကလုာ်လၢအကဆှီဝဲလၢအဘၣ်ဃးထဲဒၣ်ဒီးအီၤဒီး အသးဆူၣ်လၢတၢ်မၤဂ့ၤတၢ်အဂီၢ်န့ၣ်လီၤ.
15 သိၣ်လိတၢ်တဖၣ်အံၤဒီးသူနတၢ်စိကမီၤလၢလၢပှဲၤပှဲၤဖဲ နဟ့ၣ်ဂံၢ်ဟ့ၣ်ဘါဒီးသိၣ်ဃီၣ်တၢ်အဆၢကတီၢ်န့ၣ်တက့ၢ်. တဘၣ်ပျဲအဝဲသ့ၣ်ကွၢ်တလီၤနၤနီတဂၤတဂ့ၤ.