စီၤတံၤမသ့း အအိၣ်
အခီၣ်ထံးတဘ့ၣ်
TIMOTHY
စီၤတံၤမသ့း, ပှၤခရံာ်ဖိသးစၢ်တဂၤလၢကီၢ်အၤစံမံနၤအံၤ အမိၢ်မ့ၢ်ပှၤယူဒၤမုၣ်ဒီးအပၢ်မ့ၢ်ပှၤကြံးခ်န့ၣ်လီၤ. အဝဲကဲထီၣ်စီၤပီလူးအတံၤသကိးဒီးပှၤမၤစၢၤအီၤလၢ အတၢ်သးခုကစီၣ်အတၢ်မၤအပူၤန့ၣ်လီၤ. စီၤပီလူးအလံာ်ပရၢအခီၣ်ထံးတဘ့ၣ်အံၤအတၢ်ဂ့ၢ်မိၢ်ပှၢ်အိၣ်ဝဲ သၢမံၤန့ၣ်လီၤ.
လံာ်ပရၢအံၤအခီၣ်ထံးကတၢၢ်မ့ၢ်တၢ်ဟ့ၣ်ပလီၢ်ဘၣ်ဃးဒီး တၢ်သိၣ်လီၤသီလီၤကမၣ်တၢ်လၢတၢ်အိၣ်ဖှိၣ်အပူၤန့ၣ်လီၤ. တၢ်သိၣ်လီၤသီလီၤလၢအမ့ၢ်ပှၤယူဒၤဖိဒီးပှၤလၢအတမ့ၢ် ပှၤယူဒၤဖိအတၢ်ဆိကမိၣ်တဖၣ်အတၢ်ဃါဃုာ်သးအံၤ, သန့ၤထီၣ်အသးလၢတၢ်နာ်လၢဟီၣ်ခိၣ်အံၤမ့ၢ်တၢ်အၢတၢ် သီဒီးပှၤတဂၤမၤန့ၢ်တၢ်အုၣ်က့ၤခီၣ်က့ၤခီဖျိဒၣ်ထဲလၢ တၢ်သ့ၣ်ညါခူသူၣ်လီၤဆီဒီးတၢ်အိၣ်မူမၤထွဲတၢ်ဒ် တၢ်ပဒ့ၣ်ဟးဆှဲးတၢ်အီၣ်တနီၤဒီးတၢ်တဆီဟံၣ်ဆီဃီ န့ၣ်လီၤ. လံာ်ပရၢအံၤအိၣ်ဃုာ်စ့ၢ်ကီးဒီးတၢ်သိၣ်လိသီလိဘၣ်ဃး တၢ်ပၢဆှၢတၢ်အိၣ်ဖှိၣ်ဒီးတၢ်ဘူၣ်တၢ်ဘါဒီးတၢ်ပာ်ဖျါသကဲာ် ပဝးလၢကြၢးအိၣ်ဒီးတၢ်အိၣ်ဖှိၣ်ခိၣ်နၢ်တဖၣ်ဒီးပှၤမၤစၢၤတၢ် တဖၣ်န့ၣ်လီၤ. လၢခံကတၢၢ်, စီၤတံၤမသ့းဘၣ်တၢ်ဟ့ၣ်ကူၣ် အီၤလၢအကမ့ၢ်ယ့ၣ်ၡူးခရံာ်အခ့အပှၤအဂ့ၤတဂၤဒ်လဲၣ်, ဒီးဘၣ်ဃးအမူအဒါတဖၣ်လၢအအိၣ်ဒီးအီၤလၢပှၤစူၢ်က့ၤ နာ်က့ၤတၢ်အကရူၢ်အကလုာ်ကလုာ်တဖၣ်အဂီၢ်န့ၣ်လီၤ.
1
1 လၢစီၤပီလူး, ယ့ၣ်ၡူးခရံာ်အပှၤတၢ်မၢဖိတဂၤဒ်ကစၢ်ယွၤ ပတၢ်အုၣ်က့ၤခီၣ်က့ၤကစၢ်ဒီးယ့ၣ်ၡူးခရံာ်ပတၢ်မုၢ်လၢ်အတၢ် ဟ့ၣ်လီၤအကလုၢ်အသိး,
2 ဆူ, စီၤတံၤမသ့း, ယဖိခွါနီၢ်နီၢ်လၢတၢ်စူၢ်တၢ်နာ်အပူၤအအိၣ်, မ်ပၢ်ကစၢ်ယွၤဒီးပကစၢ်ယ့ၣ်ၡူးခရံာ်ဟ့ၣ်လီၤနၤ တၢ်ဘျုးတၢ်ဖှိၣ်, တၢ်သးကညီၤ, ဒီးတၢ်ဃူတၢ်ဖိးတက့ၢ်.
3 ယအဲၣ်ဒိးလၢနကအိၣ်လၢဝ့ၢ်အ့းဖ့းစူးအပူၤ, ဒ်ယမၢန့ၢ်ဆီၣ်ခံနၤဖဲယလဲၤဆူကီၢ်မၤက့းဒနံအခါအသိးန့ၣ် လီၤ. ပှၤအိၣ်ဖဲန့ၣ်တနီၤ သိၣ်လီၤသီလီၤတၢ်စူၢ်ကမၣ်နာ်ကမၣ် တဖၣ်, သတးဒီးနကဘၣ်ဟ့ၣ်လီၤနကလုၢ်လၢ အဝဲသ့ၣ်ကဆိကတီၢ်ကွံာ်ဝဲအဂီၢ်လီၤ.
4 စံးဘၣ်တဲဘၣ်အဝဲသ့ၣ်လၢအသုတမၤလၢာ်အဆၢကတီၢ် လၢတၢ်စံၣ်ဃဲၤတဲဃဲၤလၢပျၢၤတဖၣ်ဒီးတၢ်ယၢၤထီၣ်ဖးထီ တၢ်ဟဲလီၤစၢၤတဖၣ်န့ၣ်တဂ့ၤ. တၢ်သ့ၣ်တဖၣ်အံၤဒုးအိၣ်ထီၣ်ဒၣ်တၢ်ဂ့ၢ်လိာ်ဘှီလိာ်တဖၣ်ဒီး တမၤထီၣ်မၤထီကစၢ်ယွၤအတၢ်ကူၣ်ထီၣ်ဖးလီၤလၢ တၢ်သ့ၣ်ညါအီၤသ့ဒၣ်ထဲလၢတၢ်စူၢ်တၢ်နာ်န့ၣ်ဘၣ်.
5 တၢ်ဟ့ၣ်လီၤကလုၢ်အံၤ, အတၢ်တိာ်မ့ၢ်ဒ်သိးအကထိၣ်ဟူးထိၣ် ဂဲၤတၢ်အဲၣ်တၢ်ကွံလၢအဟဲထီၣ်ဝဲလၢသးလၢအကဆှီတဖျၢၣ် အပူၤ, သးလၢအသ့ၣ်ညါဒၣ်တၢ်ဆှံဆှံ, ဒီးတၢ်စူၢ်တၢ်နာ်နီၢ်နီၢ် အပူၤန့ၣ်လီၤ.
6 ပှၤတနီၤဃၣ်ကွံာ်အသးလၢတၢ်သ့ၣ်တဖၣ်အံၤဒီးလဲၤကမၣ် ဆူတၢ်ကတိၤသကိးတၢ်လၢအခီပညီတအိၣ်တဖၣ်အပူၤ န့ၣ်လီၤ.
7 အဝဲသ့ၣ်အဲၣ်ဒိးကဲထီၣ်ကစၢ်ယွၤအတၢ်သိၣ်တၢ်သီအသရၣ် တဖၣ်, ဘၣ်ဆၣ်ဒီးအဝဲသ့ၣ်တနၢ်ပၢၢ်က့ၤအတၢ်ကတိၤဒၣ်ဝဲ တဖၣ်မ့ၢ်ဂ့ၤ, တၢ်ဂ့ၢ်တၢ်ကျိၤတဖၣ်လၢအဝဲသ့ၣ်စံးကတိၤ ဝဲလၢအဂ့ၢ်လၢတၢ်စူၢ်ဂၢၢ်နာ်ကျၢၤအပူၤတဖၣ်မ့ၢ်ဂ့ၤန့ၣ်ဘၣ်.
8 ပသ့ၣ်ညါလၢယူဒၤအတၢ်သိၣ်တၢ်သီန့ၣ်, ဂ့ၤဝဲဖဲပသူအီၤဒ်အကြၢးဘၣ်တၢ်သူအီၤအသိး န့ၣ်လီၤ.
9 ပကဘၣ်သ့ၣ်နီၣ်ထီၣ်က့ၤလၢတၢ်သိၣ်တၢ်သီတဖၣ်ဘၣ်တၢ် ဒုးအိၣ်ထီၣ်အီၤတမ့ၢ်လၢပှၤအဂ့ၤအဝါတဖၣ်အဂီၢ်ဘၣ်. မ့မ့ၢ်တခီ, မ့ၢ်လၢပှၤမၤကမၣ်တၢ်သိၣ်တၢ်သီတဖၣ်, ပှၤအၢပှၤသီတဖၣ်, ပှၤတယူးတယီၣ်ယွၤဒီးမၤတၢ်ဒဲးဘးတဖၣ်, ပှၤလၢအတၢ် အဲၣ်ထူအဲၣ်ယွၤမ့ၢ်ဂ့ၤ, တၢ်အိၣ်မူလၢသူၣ်လၢသးမ့ၢ်ဂ့ၤ တအိၣ်ဘၣ်တဖၣ်, ပှၤလၢအမၤသံအပၢ်မ့တမ့ၢ်အမိၢ် တဖၣ်, ပှၤလၢအမၤသံပှၤကညီတဖၣ်,
10 ပှၤမၤကမၣ်မုၣ်ကမၣ်ခွါတဖၣ်, ပှၤအဲၣ်တလ့ၤအဲၣ်တဘီတၢ် တဖၣ်, ပှၤဟုၣ်ဖီၣ်န့ၢ်ပှၤကညီဝံၤဃ့စ့တဖၣ်, ပှၤလၢအလီတၢ်ဒီးအုၣ်အသးကဘျံးကဘျၣ်, မ့တမ့ၢ်မၤတၢ်တမံၤမံၤလၢအထီဒါလိာ်အသးဒီးတၢ်သိၣ်လိ သီလိအမ့ၢ်အတီတဖၣ်အဂီၢ်န့ၣ်လီၤ.
11 တၢ်သိၣ်လိသီလိအံၤဘၣ်တၢ်ထံၣ်န့ၢ်အီၤလၢတၢ်သးခု ကစီၣ်အပူၤ, လၢတၢ်ဟ့ၣ်လီၤအီၤလၢယစုပူၤဒ်သိးယကတဲ ဖျါထီၣ်အီၤအဂီၢ်, ဒီးမ့ၢ်တၢ်သးခုကစီၣ်လၢအဟဲလၢကစၢ်ယွၤလၢအအိၣ်ဒီး အလၤကပီၤဒီးဘၣ်တၢ်စံးထီၣ်ပတြၢၤအီၤတဂၤအအိၣ် န့ၣ်လီၤ.
12 ယစံးဘျုးပကစၢ်ယ့ၣ်ၡူးခရံာ်, လၢအဟ့ၣ်တ့ၢ်လံယၤတၢ်ဂံၢ် တၢ်ဘါလၢယတၢ်မၤအဂီၢ်အဃိန့ၣ်လီၤ. ယစံးဘျုးအီၤလၢအပာ်ယၤလၢပှၤအကလုၢ် တီဒီးဃုထၢထီၣ်ယၤလၢယကမၤအတၢ်မၤအဂီၢ်,
13 ဖဲလၢအပူၤကွံာ်ယကတိၤအၢကတိၤသီအီၤ, မၤနးမၤဖှီၣ်အီၤ, ဒီးကတိၤဒုၣ်ဒွဲၣ်အီၤအခါဒၣ်လဲာ်န့ၣ်လီၤ. ဘၣ်ဆၣ်ဒီး, ကစၢ်ယွၤသးကညီၤယၤမ့ၢ်လၢယတအိၣ်ဒီးတၢ်စူၢ် တၢ်နာ်ဒံးဘၣ်ဒီးယတသ့ၣ်ညါတၢ်လၢယမၤဘၣ်တဖၣ် အဃိလီၤ.
14 ဒီးပကစၢ်လူလီၤဂၢ်လီၤအဘျုးအဖှိၣ်အါအါကလဲာ်လၢယလိၤ, ဒီးဟ့ၣ်ယၤတၢ်စူၢ်တၢ်နာ်ဒီးတၢ်အဲၣ်တၢ်ကွံလၢအအိၣ်လၢ ယ့ၣ်ၡူးခရံာ်အပူၤန့ၣ်လီၤ.
15 အအံၤမ့ၢ်တၢ်ကတိၤအမ့ၢ်အတီလၢပှၤဂ့ၤတူၢ်လိာ်ဒီးနာ် အီၤလၢာ်လၢာ်ဆ့ဆ့, လၢယ့ၣ်ၡူးခရံာ်ဟဲလီၤဆူဟီၣ်ခိၣ်ချၢဒ်သိးအကအုၣ်က့ၤ ခီၣ်က့ၤပှၤတၢ်ဒဲးဘးဖိတဖၣ်လၢယမ့ၢ်အဒိၣ်ကတၢၢ်တဂၤ န့ၣ်လီၤ.
16 ဘၣ်ဆၣ်ဒီးကစၢ်ယွၤသးကညီၤယၤ, မ့ၢ်ဒ်သိးယ့ၣ်ၡူးခရံာ်ကဒုးနဲၣ်အတၢ်ဝံသးစူၤအလၢ အပှဲၤလၢယၤ, ပှၤတၢ်ဒဲးဘးဖိအအၢကတၢၢ်တဂၤ, ဒ်သိးကကဲထီၣ်တၢ်အဒိအတဲာ်လၢပှၤလၢအကနာ် က့ၤအီၤလၢခံဒီးဒိးန့ၢ်ဘၣ်တၢ်မူအထူအယိာ်တဖၣ် အဂီၢ်န့ၣ်လီၤ.
17 စီၤပၤလၢအပၢတၢ်လီၤထူလီၤယိာ်လၢအသံတသ့ ဒီးတၢ်ထံၣ်အီၤတသ့, ကစၢ်ယွၤထဲတဂၤဧိၤအံၤ, မ်တၢ်ယူးယီၣ်ဒီးတၢ်လၤကပီၤအိၣ်ဒီးအီၤအစိၤစိၤ အဃၣ်ဃၣ်တက့ၢ်. အၤမ့ၣ်.
18 ယဖိခွါစီၤတံၤမသ့းဧၢ, ယဟ့ၣ်လီၤနၤတၢ်မၤလိာ်အံၤမ့ၢ်ဒၣ်တၢ်မၤပိာ်ထွဲဝံအတၢ် ကတိၤတဖၣ်လၢအကတိၤတ့ၢ်ဝဲလၢအပူၤကွံာ်ဘၣ်ဃးဒီးနၤ န့ၣ်လီၤ. သူတၢ်ကတိၤတဖၣ်အံၤဒ်စုကဝဲၤတဖၣ်အသိး, ဒ်သိးနကဒုးတၢ်ဂ့ၤဂ့ၤဘၣ်ဘၣ်အဂီၢ်,
19 ဒီးပၢၤဃာ်နတၢ်စူၢ်တၢ်နာ်ဒီးသးလၢအသ့ၣ်ညါဒၣ် တၢ်ဆှံဆှံန့ၣ်တက့ၢ်. ပှၤတနီၤတဒိကနၣ်သးလၢအသ့ၣ်ညါ ဒၣ်တၢ်န့ၣ်ဘၣ်အဃိ, အတၢ်စူၢ်တၢ်နာ်လီၤပှီၢ်ကွံာ်ဝဲဒၣ်န့ၣ်လီၤ.
20 လၢအဝဲသ့ၣ်အကျါမ့ၢ်စီၤဟူၤမ့းနဲဒီးစီၤအလ့းစၣ်ဒြူးလၢ ယစံၣ်ညီၣ်တ့ၢ်ဒီးဟ့ၣ်လီၤကွံာ်အီၤဆူမုၣ်ကီၤလံၢ်အစုပူၤ, ဒ်သိးတၢ်အံၤကကဲထီၣ်တၢ်သိၣ်လိအဝဲသ့ၣ်လၢကဆိကတီၢ် အတၢ်ကတိၤတရီတပါယွၤအဂီၢ်န့ၣ်လီၤ.